មន្ត្រីជាន់ខ្ពស់ក្រសួងធនធានទឹក ចុះអន្តរាគម៍សង្គ្រោះស្រូវវស្សា ដែលកំពុងខ្វះខាតទឹកជិត ២ពាន់ហិកតា ក្នុងខេត្តកំពង់ធំ

លោក ចាន់ យុត្ថា រដ្ឋលេខាធិការ និងជាប្រធានក្រុមសម្របសម្រួលការងារគ្រប់គ្រងធនធានទឹក និងឧតុនិយមខេត្តកំពង់ធំ បានអញ្ជើញចុះពិនិត្យស្ថានភាពជាក់ស្តែង និងកិច្ចអន្តរាគមន៍សង្គ្រោះស្រូវរដូវវស្សាជិត ២ពាន់ហិកតា ដែលកំពុងជួបប្រទះការខ្វះខាតទឹក នៅក្នុងភូមិសាស្ត្រស្រុកស្ទោង ស្រុកកំពង់ស្វាយ និងស្រុកប្រាសាទបល្ល័ង្ក ខេត្តកំពង់ធំ។ ការចុះអន្តរាគមន៍នេះ ធ្វើឡើងកាលពីថ្ងៃទី៤ ខែកក្កដា ឆ្នាំ២០២៦។

តាមរបាយការណ៍របស់មន្ទីរធនធានទឹក និងឧតុនិយមខេត្តកំពង់ធំ គិតត្រឹមដើមខែកក្កដានេះ ស្ថានភាពរបាយទឹកភ្លៀងមានការថយចុះ បណ្តាលឱ្យផ្ទៃដីដាំដុះស្រូវវស្សារបស់ប្រជាពលរដ្ឋរងផលប៉ះពាល់សរុបចំនួន ១៥ ០៧៣ ហិកតា ក្នុងនោះផ្ទៃដីដែលកំពុងជួបប្រទះការខ្វះខាតទឹកខ្លាំង និងត្រូវការសង្គ្រោះបន្ទាន់មានចំនួន ១ ៧២៥ ហិកតា។

ឆ្លើយតបនឹងស្ថានភាពបន្ទាន់នេះ មន្ទីរធនធានទឹក និងឧតុនិយមខេត្តកំពង់ធំ បាន​ប្រើប្រាស់​ម៉ាស៊ីនបូមទឹកចល័តចំនួន ៦គ្រឿង ជាកិច្ចអន្តរាគមន៍។

ក្នុងឱកាសចុះពិនិត្យផ្ទាល់ ដោយពិនិត្យឃើញតម្រូវការទឹកមានកម្រិតខ្ពស់ និងដើម្បីសង្គ្រោះស្រូវប្រជាកសិករឱ្យបានទាន់ពេលវេលា លោករដ្ឋលេខាធិការ បានណែនាំ​មន្ទី​រ​ឱ្យដំឡើងម៉ាស៊ីនបូមទឹកកម្លាំងខ្លាំងចំនួន ១គ្រឿង បន្ថែមទៀតជាបន្ទាន់៕