អាជ្ញាធរ​ឃាត់​រថយន្ត​០២​គ្រឿង ​និង​មនុស្ស០៤​នាក់​ពី​បទ​លួច​ដឹក​កូន​គ្រែង​ឈាម​ ដោយ​គ្មាន​លិខិត​អនុញ្ញាត​​

វេលាម៉ោង១៤និង០០នាទី ថ្ងៃទី១២ ខែឧសភា ឆ្នាំ២០២១ កម្លាំងអ/ហស្រុកព្រៃនប់ ចំនួន០៨នាក់ ដឹកនាំដោយលោក អនុសេនីយឯក ម៉ែន វណ្ណា មេបញ្ជាការស្តីទី សហការជាមួយកម្លាំងខណ្ឌរដ្ឋបាលជលផលកំពុងសោម ដឹកនាំដោយលោក ឯម ភា នាយរងខណ្ឌ រដ្ឋបាលជលផលទទួលបន្ទុកក្តាប់រួម បានធ្វើការឃាត់រថយន្តចំនួន ០២គ្រឿង និងមនុស្សចំនួន០៤នាក់ សង្ស័យពាក់ព័ន្ធករណីលួចដឹកកូនគ្រែងឈាមដោយគ្មានលិខិតអនុញ្ញាតច្បាប់ ស្ថិតនៅចំណុចភូមិត្រពាំងគា ឃុំជើងគោ ស្រុកព្រៃនប់ ខេត្តព្រះសីហនុ។

ក្នុងនោះអាជ្ញាធរបានឃាត់ រថយន្តម៉ាកសាំងយ៉ុង ពណ៌ស ពាក់ស្លាកលេខ ភ្នំពេញ២AD-៥៩៧៤ ម្ចាស់ឈ្មោះ ១/ឈ្មោះ ឈិន ជិន ភេទប្រុស អាយុ២៨ឆ្នាំ មុខរបរបើកបរ ទីលំនៅភូមិថ្មរស ឃុំថ្មរស ស្រុកបុទុមសាគរ ខេត្តកោះកុង។២/ឈ្មោះ ពេជ្រ លី ប្រុស អាយុ២៥ឆ្នាំ មុខរបរនេសាទ ទីលំនៅភូមិថ្មរស ឃុំថ្មរស ស្រុកបុទុមសាគរ ខេត្តកោះកុង។

និងរថយន្តម៉ាកសាំងយ៉ុង ពណ៌ខៀវ ពាក់ស្លាកលេខ ភ្នំពេញ២Q-៨៦៦៤ ម្ចាស់ឈ្មោះ ១/ឈ្មោះ តឹក សុខុម ភេទស្រី អាយុ៦៦ឆ្នាំ មុខរបរអាជីវករ ទីលំនៅភូមិកំពង់ត្រាចខាងកើត ឃុំកំពង់ត្រាច ស្រុកកំពង់ត្រាច ខេត្តកំពត។ ២/ឈ្មោះ ម៉េង សុធា ភេទប្រុស អាយុ២៩ឆ្នាំ មុខរបរបើកបរ ទីលំនៅភូមិកំពង់ត្រាចខាងកើត ឃុំកំពង់ត្រាច ស្រុកកំពង់ត្រាច ខេត្តកំពត។

វត្ថុតាង ឃាត់បានចំនួន៦០០០គីឡូក្រាម ត្រូវបានក្រុមការងារយកទៅប្រលែងនៅក្នុងតំបន់សហគមន៍ព្រៃនប់ទី២ ស្ថិតក្នុងភូមិព្រែកប្រស់ ឃុំទឹកថ្លា ស្រុកព្រៃនប់ ខេត្តព្រះសីហនុ ។ បច្ចុប្បន្ន កម្លាំងជលផលបានអោយអ្នកដឹកជញ្ជូនទាំងបួនអ្នកខាងលើធ្វើកិច្ចសន្យា និងរក្សាទុករថយន្តដើម្បីអោយម្ចាស់កូនគ្រែង ចូលខ្លួនមកដោះស្រាយ។

អត្ថបទ៖ ស៊ុយ ចាន់ធា​