ខឹងម្ដាយហាមមិនឱ្យផឹកស៊ីបុរសម្នាក់រត់ឡើងទៅចងកស្លាប់លើដើមឈើ

បុរសម្នាក់ត្រូវបានគេប្រទះឃើញសាកសពចងកស្លាប់ព្យួរនៅលើមែកឈើដើមម្តេញ កម្ពស់​ប្រមាណ ៤ ម៉ែត្រពីដី។ ករណីប្រទះឃើញសាកសពចងករនេះ បានភ្ញាក់ផ្អើលនៅវេលាម៉ោង ៧៖៣០ នាទី ព្រឹកថ្ងៃទី ៥ ខែមិថុនា ស្ថិតនៅចំណុចដីចម្ការ ភូមិ​ទួលទទឹង១ ឃុំទួលទទឹ​ង ស្រុកព្រៃនប់ ខេត្តព្រសីហនុ។

សមត្ថកិច្ចមូលដ្ឋានបាននិយាយថា សពបុរសជនរងគ្រោះមាន ឈ្មោះ ចាន់ កង អាយុ​២៥ឆ្នាំ​មុខរបរកម្មកររោង​ចក្រ មានទីលំនៅក្នុងភូមិកើតហេតុ។ ជនរងគ្រោះបា​នយកអាវចងព្យួរ កទៅនឹងមែកដើមម្តេញដីចំ​ការ ឈ្មោះ ម៉ាត់ ហ្សេន បណ្តាលអោយស្លាប់នៅ​នឹងកន្លែង មូលហេតុខឹងម្តាយស្តីបន្ទោសរឿងផឹកស្រា។ 

សមត្ថកិច្ច បាននិយាយទៀតថា យោងតាមការរៀបរាប់របស់ឈ្មោះផាន់ រ៉េន ត្រូវម្តាយបង្កើតរប​ស់ជនរងគ្រោះ បានអោយដឹងថា មុនពេលកើតហេតុ នៅព្រលប់ថ្ងៃទី ៤ ខែមិថុនា កូនគាត់បាននាំមិត្តភ័ក្ត្រមកផឹកស៊ីនៅផ្ទះប៉ុន្តែគាត់មិន​ឱ្យផឹកទេខ្លាច នគរបាលចាប់ ពេល​នោះជនរងគ្រោះខឹងហើយបានឈ្លោះប្រកែកជាមួយគាត់និងបងប្អូនរកវាយគ្នាទៀតផង ក្រោយពីឈ្លោះគ្នាចប់ពួកគាត់ក៏ចូលដេកអស់ទៅ នៅសល់តែជនរងគ្រោះនៅក្រៅ​ផ្ទះតែម្នាក់ឯងមិនព្រមចូលដេក លុះព្រឹកឡើង ស្រាប់តែអ្នកជិតខាងមកប្រាប់គាត់ថា ជនរងគ្រោះចងកស្លាប់បាត់ទៅហើយ​។ ​

សាកសព សមត្ថកិច្ចបានប្រគល់ជូនគ្រួសារ​ធ្វើបុណ្យតាមប្រពៃណី៕ អត្ថបទ៖ស៊ុយ ចាន់ធា