ខេត្តតាកែវមានអ្នកស្លាប់ម្នាក់ទៀតដោយជំងឺកូវីដ-១៩

រដ្ឋបាលខេត្តតាកែវនៅថ្ងៃទី១៣ ខែមិថុនា ឆ្នាំ២០២១​ នេះ បានប្រកាសមានករណីស្លាប់ដោយជំងឺ​កូវីដ-១៩ លើស្ត្រីម្នាក់ ឈ្មោះ អ៊ូច ខែម អាយុ៥៣ឆ្នាំ មានអាសយដ្ឋាននៅភូមិត្រពាំងរកា ឃុំអង្គខ្នុរ ស្រុកទ្រាំង ដោយសារវិបត្តិផ្លូវដង្ហើមស្រួចស្រាវធ្ងន់ធ្ងរ និងរលាកសួតទាំងសងខាង ដោយវីរុស​កូវីដ-១៩ ។

រដ្ឋបាលខេត្តបានបញ្ចាក់ថា ស្ត្រីរងគ្រោះខាងលើ បានចូលមកសម្រាកព្យាបាលនៅមន្ទីរពេទ្យ​បង្អែក​គិរីវង់ នៅថ្ងៃទី១៣ ខែមិថុនា ឆ្នាំ២០២១ វេលាម៉ោង៩និង៣០នាទីព្រឹក ក្នុងស្ថានភាពហត់ ដង្ហក់ សម្ពាធឈាមយកមិនបាន ជីបចរខ្យោយ រួមទាំងបាត់បង់ស្មារតី។

ដោយស្ថានភាពធ្ងន់ធ្ងរអ្នកជំងឺបានស្លាប់បាត់បង់ជីវិតនៅថ្ងៃទី១៣ ខែមិថុនា វេលាម៉ោង១៥និង៣០​នាទី រសៀល ទោះបីមានការជួយសង្គ្រោះយ៉ាងយកចិត្តទុកដាក់ពីក្រុមគ្រូពេទ្យយ៉ាងណាក៏ដោយ។

តាមការសន្និដ្ឋានរបស់ក្រុមគ្រូពេទ្យ អ្នកជំងឺបានស្លាប់បាត់បង់ជីវិតដោយសារ​វិបត្តិផ្លូវដង្ហើមស្រួច​ស្រាវធ្ងន់ធ្ងរ និងរលាកសួតទាំងសងខាង ដោយវីរុស​កូវីដ-១៩៕

អត្ថបទ ៖ សុខុម​