ព័ត៌មានជាតិ

អាជ្ញាធរសង្កាត់ដងទង់ ចែកម៉ាសជូនពលរដ្ឋជិត៨០០នាក់ ខណៈពលរដ្ឋមួយចំនួនខ្វះការប្រុងប្រយ័ត្នពីជំងឺកូវីដ

បានផុស

៥ years មុន

នៅ

ថ្ងៃអង្គារ ១៥ មិថុនា ២០២១

ដោយ

ចៅសង្កាត់ដងទង់ មេភូមិ និងកម្លាំងប្រជាការពារ ចុះចែកម៉ាសជូនប្រជាពលរដ្ឋជិត៨០០នាក់ដោយឥតគិតថ្លៃ ខណៈមានការផ្ទុះជំងឺកូវីដគួរឱ្យកត់សម្គាល់ រីឯពលរដ្ឋមួយចំនួនធ្វេសប្រហែសពីការពារ។

មិនមែនជាដំបូងនោះទេ អាជ្ញាធរក្រុងសង្កាត់ពន្យល់ណែនាំពីវិធីសាស្ត្រទប់ស្កាត់ការពារជំងឺកូវីដ១៩នៅក្នុងមូលដ្ឋានគ្រប់គ្រងរបស់ពួកគាត់ ដើម្បីបញ្ចៀសការចម្លងជំងឺដ៏កាចសាហាវនេះទៅមនុស្សម្នាក់ទៅមនុស្សម្នាក់ផ្សេងទៀត នាំឱ្យលំបាកដោះស្រាយស្ថានការណ៍។

លោក លឹម ឌី ចៅសង្កាត់ដងទង់ បានឱ្យដឹងនៅរសៀលថ្ងៃទី១៥ ខែមិថុនា ឆ្នាំ២០២១ថា ស្ថានភាពនៃការរីករាលដាលជំងឺកូវីដកាន់តែគួរឱ្យព្រួយបារម្ភខ្លាំង មិនធ្លាប់មានពីមុនមក ចំណែកឯពលរដ្ឋមួយចំនួននៅតែខ្វះការប្រុងប្រយ័ត្នពីការឆ្លង។ ទើបរូបលោក មេភូមិ និងកម្លាំងប្រជាការពារសង្កាត់ប ន្តចែកម៉ាសជូនពលរដ្ឋសរុបជិត៨០០នាក់ ក្នុងម្នាក់ទទួលបាន២ម៉ាស។ លោកចៅសង្កាត់ដងទង់ បន្ថែមថា ម៉ាសដែលចែកជូនដល់ពលរដ្ឋនៅពេលនេះ គឺជាជំនួយដែលបានមកពីសប្បុរសជនផ្តល់ឲ្យសង្កាត់កន្លងទៅ ហើយសង្កាត់រៀបចំបែងចែងទុកសម្រាប់ជូនពលរដ្ឋដូចពេលព្រឹកមិញ។

ក្រៅពីចែកម៉ាស អាជ្ញាធរពន្យល់ណែនាំហើយណែនាំទៀតអំពីផលវិបាកជំងឺកូវីដ ព្រមទាំងវិធីសាស្ត្រការពារឲ្យបានទាំងអស់គ្នា។ ករណីបុគ្គលណានៅតែមិនចូលរួម នឹងរងការផាកពិន័យតាមច្បាប់គ្មានការយោគយល់សោះ។ ត្បិតសព្វថ្ងៃពុំមិនទាន់មានការចាប់ផាកពិន័យអ្នកល្មើសណាម្នាក់ក៏ដោយ។

បើតាមលោក លឹម ឌី នៅក្នុងមូលដ្ឋានសង្កាត់របស់លោក ក៏មានអ្នកពាក់ព័ន្ធនឹងការឆ្លងថ្មីនៃជំងឺកូវីដ១៩ខ្លះដែរ ករណីផ្ទុះជំងឺនេះនៅតំបន់រោងចក្រ ស្រុកមណ្ឌលសីមា ដោយមួយចំនួនបានរកឃើញនិងកំពុងព្យាបាលនៅអគារវិទ្យាល័យចាំយាម។ ដូច្នេះលោកសុំឱ្យពលរដ្ឋចូលរួមបង្កើនការយកចិត្តទុកដាក់ឡើងវិញ ពីការការពារខ្លួនរួចផុតពីជំងឺកូវីដ តាមការអនុវត្តវិធានការសុខាភិបាល ៣កុំ និង៣ការពារ ឱ្យបានខ្ជាប់ខ្ជួនបំផុត៕

អត្តបទ៖ សិរីវឌ្ឍនៈ