អ្នកជំងឺកូវីដ២នាក់​នៅខេត្តតាកែវ បានស្លាប់នៅព្រឹកថ្ងៃទី១៧មិថុនា នេះ

រដ្ឋបាលខេត្តតាកែវនៅថ្ងៃទី១៧ ខែមិថុនា ឆ្នាំ២០២១ នេះ បានប្រកាសមានករណីស្លាប់លើបុរស់-ស្ត្រី ជនជាតិខ្មែរពីរនាក់ដោយជំងឺកូវីដ-១៩ ជាពលរដ្ឋរស់ស្រុកសំរោង។

រដ្ឋបាលខេត្តបានបញ្ជាក់ថា អ្នកជំងឺទី១ មានឈ្មោះ សែម ពៅ ភេទប្រុស អាយុ៤០ឆ្នាំ មុខរបរ​អ្នក​លក់ដូរ រស់នៅភូមិដើមធ្លក ឃុំរវៀង ស្រុកសំរោង ខេត្តតាកែវ។ ជនរងគ្រោះបានចូលមក​សម្រាក​ព្យាបាល​នៅមន្ទីរពេទ្យបង្អែកស្រុកបាទី នៅថ្ងៃទី១២ ខែមិថុនា វេលា​ម៉ោង​១៧និង០០នាទី ក្នុង​ស្ថានភាព​ក្អក ហត់ ឈឺក្បាល ។ ដោយស្ថានភាពអ្នជំងឺមានការវិវត្តន៍​កាន់​តែ​ធ្ងន់ធ្ងរ អ្នកជំងឺបាន​ស្លាប់​បាត់​បង់​ជីវិតនៅថ្ងៃទី១៧ ខែមិថុនា វេលាម៉ោង៥និង០០នាទីព្រឹក។

អ្នកជំងឺទី២ មានឈ្មោះ ប្រាក់ សារី ភេទស្រី អាយុ៣០ឆ្នាំ មុខរបរមេផ្ទះ រស់នៅភូមិត្រពាំងចំបក់ ឃុំជំរះពេន ស្រុកសំរោង ខេត្តតាកែវ​ បានចូលមកសម្រាកព្យាបាលនៅមន្ទីរពេទ្យបង្អែកស្រុកបាទី កាលពីថ្ងៃទី១៤ ខែមិថុនា វេលាម៉ោង១១និង០០នាទី ក្នុងស្ថានភាពស្លេកស្លាំង ហត់ខ្លាំង ថប់ទ្រូង ស្វាយបបូរមាត់ និងក្ដោខ្លួន។ ដោយស្ថានភាពអ្នកជំងឺមានការវិវត្តន៍កាន់តែធ្ងន់ធ្ងរឡើង អ្នកជំងឺបាន​ស្លាប់​នៅវេលាម៉ោង២និង០០នាទី ទាបភ្លឺ ថ្ងៃទី១៧ ខែមិថុនា នេះ ទោះបីមានការជួយសង្គ្រោះយ៉ាង​យក​ចិត្ត​ទុក​ដាក់ពីក្រុមគ្រូពេទ្យយ៉ាងណាក៏ដោយ។

ក្រុមគ្រូពេទ្យបានសន្និដ្ឋានថា អ្នកជំងឺទាំងពីរនាក់ បានស្លាប់បាត់បង់ជីវិតដោយសារវិបត្តិផ្លូវដង្ហើម​ធ្ងន់ធ្ងរ និងរលាកសួតទាំងសងខាង ដោយសារវីរុសកូវីដ-១៩៕

អត្ថបទ ៖ សុខុម