រថយន្ត Ford Ranger បុកម៉ូតូមួយគ្រឿងអូសជាច្រើនម៉ែត្រ បណ្ដាលឱ្យស្ត្រីម្នាក់រងរបួសធ្ងន់

រាជធានីភ្នំពេញ ៖ ស្ត្រីម្នាក់បានរងរបួសធ្ងន់ត្រូវបានរថយន្តសង្គ្រោះដឹកទៅមន្ទីរពេទ្យភ្លាមៗខណះកំពុងជិះម៉ូតូត្រូវបានបុរសម្នាក់សង្ស័យស្រវឹងបើករថយន្តស៊េរីទំនើបម៉ាក Ford Ranger បុកអូសម៉ូតូក្រោមរថយន្តជាច្រើនម៉ែត្រ បង្កការភ្ញាក់ផ្អើលដល់ប្រជាពលរដ្ឋដេញតាមចាប់បានថែមទាំងវាយតៃកុងរថយន្តបង្កឡើងទ្រោមខ្លួនទើបប្រគល់ឱ្យសមត្ថកិច្ច  កាលពីវេលាម៉ោង៩  និង០៥នាទីយប់ថ្ងៃទី២៣  ខែមិថុនា  ឆ្នាំ ២០២១  នៅតាមបណ្ដោយផ្លូវ២១៧ ខាងជើងសាលាខណ្ឌដង្កោ ស្ថិតក្នុងសង្កាត់ដង្កោ ខណ្ឌដង្កោ  ។

តាមប្រភពព័ត៌មានពីកន្លែងកើតហេតុបានឱ្យដឹងថា មុនពេលកើតហេតុគេសង្គេតឃើញ រថយន្តម៉ាក  Ford Ranger ពណ៌ស ពាក់ស្លាកលេខភ្នំពេញ 2BA-7399 បើកបរដោយបុរសម្នាក់ធ្វើដំណើរតាមបណ្ដោយផ្លូវបេតុងព្រៃសរ ក្នុងទិសដៅពីលិចទៅកើតក្នុងល្បឿនលឿន រួចក៏បុកម៉ូតូមួយគ្រឿងម៉ាក ហុងដាឌ្រីម ស៊េរីឆ្នាំ២០១៦ ពណ៌ខ្មៅ ពាក់ស្លាកលេខភ្នំពេញ 1FR-9200 ជិះដោយស្ត្រីម្នាក់ ចំពីចហៀងពេញទំហឹង បណ្ដាលឱ្យស្ត្រីជាម្ចាស់ម៉ូតូរងរបួសធ្ងន់ ។  ភ្លាមនោះរថយន្តបង្កមិនបានឈប់ទទួលខុសត្រូវនោះទេដោយបើកបន្តទៅមុខទៀតទាំងម៉ូតូគៀបជាប់ខាងក្រោមរថយន្ត ឃើញដូចនោះប្រជាពលរដ្ឋដែលនៅក្បែរក៏ដេញតាមរហូតមកដល់ខាងជើងសាលាខណ្ឌដង្កោទើបឃាត់បាន ដោយមានការខឹងសម្បារប្រជាពលរដ្ឋនាំគ្នាព្រួតវាយម្នាក់មួយដៃមួយជើងបណ្តាលឱ្យរងរបួសផងដែរ។

ក្រោយកើតហេតុជនរងគ្រោះត្រូវបានរថយន្តសង្គ្រោះដឹកទៅមន្ទីរពេទ្យភ្លាមៗ ចំណែកម្ចាស់រថយន្តរួមទាំងម៉ូតូត្រូវបានសមត្ថកិច្ចនាំយកទៅអធិការនគរបាលខណ្ឌដង្កោដើម្បី រងចាំដោះស្រាយពេលក្រោយ ៕

អត្ថបទ ៖ សុខា