ព័ត៌មានជាតិ

ពលរដ្ឋនៅខេត្តសៀមរាប ជាច្រើនគ្រួសារដែលចិញ្ចឹមសត្វក្រពើត្អូញត្អែរ ពីទីផ្សារលក់ចេញធ្លាក់ចុះខ្លាំង

បានផុស

៥ years មុន

នៅ

ថ្ងៃចន្ទ ៥ កក្កដា ២០២១

ដោយ

សៀមរាប ៖ ពលរដ្ឋនៅខេត្តសៀមរាប ជាច្រើនគ្រួសារដែលកំពុងប្រកបរបរចិញ្ចឹមសត្វក្រពើ ដើម្បីលក់ពង លក់កូន និងលក់ក្រពើធំ បានត្អូញត្អែរ ពីទីផ្សារបានជាប់គាំង មិនអាចលក់ចេញបាន ហើយក្រុមឈ្មួញហ៊ានទិញក្នុងតម្លៃថោកជាងមុនឆ្ងាយតែម្តង។

លោក សុខ វិជ័យ អ្នកចិញ្ចឹមនិងទទួលទិញក្រពើនៅខេត្តសៀមរាប បានឲ្យដឹងនៅថ្ងៃទី៣០ខែមិថុនាឆ្នាំ២០២១នេះថា ពេលនេះលោកមានបញ្ហាប្រឈមយ៉ាងខ្លាំង ដោយសារតែពីមុនលក់កូនក្រពើមួយបានតម្លៃជាង១០ដុល្លារ ប៉ុន្តែពេលនេះ កូនក្រពើមួយលក់បានតម្លៃតែ១ ឬ ២ដុល្លារទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបញ្ជាក់ថា ប្រសិនបើតម្លៃក្រពើនៅបន្តចុះថោកជាងនេះ គឺរូបលោកនឹងអ្នកចិញ្ចឹមក្រពើជាច្រើននាក់ទៀត អាចប្រឈមមុខទៅនឹងការខាតបង់ដើមទុនយ៉ាងខ្លាំង។ លោកបន្ថែមថា ក្នុងមួយខែ ត្រូវចំណាយលុយទិញចំណីឲ្យសត្វក្រពើស៊ីចំនួន៣ដង ដោយក្នុងម្ដងៗចំណាយលុយចំនួន២០០ដុល្លារដែរ។

លោកបន្តថា បច្ចុប្បន្នគ្មានឈ្មួញណាមកទិញកូនក្រពើរបស់ពួកគាត់ទេដោយសារតែទីផ្សារលក់សត្វក្រពើនៅតែធ្លាក់ថ្លៃ ព្រមទាំងមិនដំណើរការល្អនោះ គឺអ្នកចិញ្ចឹមក្រពើមិនមានសង្ឃឹមថាមានជីវភាពល្អប្រសើរឡើយ។ ក្នុងនោះដែរលោកបានសំណូមពរឲ្យក្រសួងពាក់ព័ន្ធមេត្តាជួយសម្រួលពីច្បាប់នៃការនាំចេញទៅក្រៅប្រទេសថា តើត្រូវចំណាយប៉ុន្មានឲ្យពិតប្រាកដ ដើម្បីពួកគាត់អាចសុំច្បាប់នាំចេញបាន ព្រោះសព្វថ្ងៃទីផ្សារក្រពើ របស់យើងគឺពឹងផ្អែកលើបរទេសទាំងស្រុង។

ប្រធានមន្ទីរកសិកម្ម រុក្ខាប្រមាញ់ និងនេសាទខេត្តសៀមរាប លោក ទា គឹមសុទ្ធ បានមានប្រសាសន៍ឲ្យដឹងនៅថ្ងៃទី៣០ខែមិថុនាឆ្នាំ២០២១នេះថា បច្ចុប្បន្ននេះ ការលក់សត្វក្រពើឲ្យបានថ្លៃនោះ គឺជាការពិបាក ពីព្រោះតែទីផ្សារទិញក្រពើមិនមែននៅក្នុងស្រុកឡើយ គឺទីពឹងទៅលើទីផ្សាររបស់គេ(ប្រទេសចិន)។

លោកបន្តថា សព្វថ្ងៃនេះទីផ្សារលក់សត្វក្រពើ គឺទីពឹងទៅលើឈ្មួញកណ្ដាលមកពីប្រទេសវៀតណាម និងថៃ ដែលគេត្រូវការទិញយកទៅលក់បន្តដែរ។ ដូច្នេះ វាអាចលក់បានថ្លៃ គឺទាល់តែនៅក្នុងប្រទេសទាំងពីរនោះខ្វះក្រពើសម្រាប់ផ្គត់ផ្គង់ឲ្យទីផ្សារ ទើបគេមកទិញពីខ្មែរយកទៅ។ ក្រពើយើង គឺជាចំណែកមួយជាមួយគេ ដើម្បីបង្គ្រប់ចំនួននាំចេញ។

លោកបន្តថា អាជ្ញាធរខេត្តនិងក្រសួងកសិកម្ម រុក្ខាប្រម៉ាញ់និងនេសាទ តែងតែជួយដោះស្រាយទៅលើបញ្ហារកទីផ្សារលក់សត្វក្រពើនេះដែរ។

បច្ចុប្បន្ននេះ មានសត្វក្រពើនៅក្នុងខេត្តសៀមរាប មានប្រមាណជាងជិត៩០ម៉ឺនក្បាលដែលពលរដ្ឋកំពុងចិញ្ចឹម ហើយខ្វះទីផ្សារគួរឲ្យព្រួយបារម្ម ខណៈពលរដ្ឋខ្លះគ្មានលទ្ធភាពចិញ្ចឹម ហើយអាចប្រឈមនឹងយកទៅប្រលែងចោលផងដែរ៕

ដោយ ៖ កុសល