កីឡា

២០ឆ្នាំចុងក្រោយ វៀតណាមមិនធ្លាប់ចាញ់ឥណ្ឌូណេស៊ីក្នុងផ្ទះខ្លួនឯង

បានផុស

២ years មុន

នៅ

ថ្ងៃអង្គារ ២៦ មីនា ២០២៤

ដោយ

ក្រុមជម្រើសជាតិវៀតណាម ត្រូវជួបជាមួយក្រុមជម្រើសជាតិឥណ្ឌូណេស៊ី ក្នុងការប្រកួតជើងទី២ ជម្រុះ World Cup នៅថ្ងៃអង្គារ៍ ទី២៦ ខែមីនា ក្នុងកីឡដ្ឋាន My Dinh ក្នុងទីក្រុងហាណូយ ជាកន្លែងដែលម្ចាស់ផ្ទះមិនមានកំណត់ត្រាចាញ់ឥណ្ឌូណេស៊ី ឡើយគិតចាប់តាំងពីឆ្នាំ២០០៤។

លើកចុងក្រោយដែលឥណ្ឌូណេស៊ីបានឈ្នះវៀតណាមនៅកីឡដ្ឋាន My Dinh គឺឆ្នាំ២០០៤ ក្នុងវគ្គចែកពូលជើងឯកអាស៊ាន AFF Cup ដោយលទ្ធផល ៣-០។ ចាប់តាំងពីពេលនោះមក ការប្រកួតរ៦លើក របស់ក្រុមឥណ្ឌូណេស៊ីនៅកីឡដ្ឋាន My Dinh មិនអាចយកឈ្នះម្ចាស់ផ្ទះ វៀតណាម បានទេ ដោយបានត្រឹមស្មើគ្នា៤លើក និងចាញ់២លើក។

ជួបគ្នា២លើកចុងក្រោយ ក្រុមឥណ្ឌូណេស៊ីបានយកឈ្នះវៀតណាម ទាំង២លើក ជម្រុះ World Cup ជើងទី១ នៅកីឡដ្ឋាន Bung Karno កាលពីថ្ងៃព្រហស្បតិ៍ ទី២១ ខែមីនា ឆ្នាំ២០២៤ និងវគ្គចែកពូល Asian Cup កាលពីខែមករា ឆ្នាំ២០២៣។ ប្រសិនបើឥណ្ឌូណេស៊ីទទួលបានជ័យជម្នះក្នុងការប្រកួតថ្ងៃអង្គារ៍នេះ ពួកគេនឹងកាន់មានក្ដីសង្ឃឹមដើម្បីឈានដល់វគ្គជម្រុះទី៣ ពានរង្វាន់ World Cup ជាលើកដំបូង។

លោក Shin Tae-yong គ្រូបង្វឹកឥណ្ឌូណេស៊ី បានលើកឡើងថា ៖«ពិតណាស់ វាមានរយៈពេលយូរណាស់មកហើយចាប់តាំងពីឥណ្ឌូណេស៊ីឈ្នះនៅកីឡដ្ឋាន My Dinh។ ខ្ញុំនឹងព្យាយាមបញ្ជាក់ថា យើងអាចបន្ដឈ្នះនៅទីនេះបាន»។

ប្រធានសមាគមកីឡាបាល់ទាត់ឥណ្ឌូណេស៊ី (PSSI) លោក Erick Thohir បាននិយាយថា ៖«ខ្ញុំកោតសរសើរយ៉ាងខ្លាំងចំពោះទម្រង់លេងប្រកបដោយវិន័យ ដែលបានធ្វើឱ្យយើងទទួលបានជ័យជម្នះក្នុងវគ្គជម្រុះជុំទី២ World Cup។ ខ្ញុំសង្ឃឹមថា កីឡាកររក្សាទម្រង់លេង និងផ្តោតអារម្មណ៍បានល្អប៉ះវៀតណាមជើងទី២នេះ។ ជាពិសេសរក្សាខ្លួនឲ្យទាប និងផ្ចង់អារម្មណ៍ឲ្យខ្ពស់ ពីព្រោះដំណើរនៅវែងឆ្ងាយ»។

យ៉ាងណាកំណត់ត្រាល្អក្នុងផ្ទះរបស់ខ្លួនអាចធ្លុះធ្លាយ ស្របពេលគ្រូបង្វឹកបច្ចុប្បន្នកំពុងធ្លាក់ចុះ។ លោក Philippe Troussier គ្រូបង្វឹកវៀតណាមកំពុងរង់សម្ពាធយ៉ាងខ្លាំង បន្តាប់ពីចាញ់ឥណ្ឌូណេស៊ី កាលពីថ្ងៃទី២១ ខែមីនា។ រយៈពេលមួយឆ្នាំក្រោមការដឹកនាំរបស់លោក វៀតណាមមិនទទួលបានលទ្ធផលល្អទេ។ វៀតណាមបានធ្លាក់ពីលេខពីលេខ៩៣មកដល់១១២ក្នុងតារាងចំណាត់ថ្នាក់ FIFA គិតត្រឹមខែមីនា។ នៅតំបន់អាស៊ាន ពួកគេធ្លាក់មកលេខ២។

ក្រុមជម្រើសជាតិវៀតណាមបានធ្លាក់ត្រឹមវគ្គសន្សំពិន្ទុក្នុងពូល AFC Asian Cup កាលពីឆ្នាំ២០២៣ បន្ទាប់ពីចាញ់៣ប្រកួត។ អត្រាចាញ់កើនដល់៦៩.២%គឺជាអត្រាអាក្រក់បំផុតក្នុងប្រវត្តិសាស្ត្របាល់ទាត់វៀតណាម។ អត្រារកបានគ្រាប់បាល់គឺថយមកត្រឹម ០.៨៥%ប៉ុណ្ណោះ ប្រៀបធៀបនឹង ១.៦៤% របស់អតីតគ្រូបង្វឹក Park Hang Seo។ អត្រាត្រូវគេស៊ុតចូលកើនដល់១.៦៩% ប្រៀបធៀបនឹង ០.៩២% របស់គ្រូបង្វឹកមុន។ លទ្ធផលដ៏អាក្រក់នេះ លោក Philippe Troussier ប្រឈមនឹងការបណ្តេញចេញ ប្រសិនបើលទ្ធផលនៅតែមិនល្អ។