សន្តិសុខសង្គម

មន្ត្រីជំនាញ រកឃើញឈាមជ្រូកធ្វើពីឈាមគោ និងសណ្ដែកបណ្ដុះដាក់គីមី សរុប ៧៣ គីឡូក្រាម

បានផុស

៣ ខែ មុន

នៅ

ថ្ងៃពុធ ២៧ មីនា ២០២៤

ដោយ

មន្ត្រីជំនាញ ចុះត្រួតពិនិត្យ ណែនាំ និងអប់រំ ទីតាំង ២ កន្លែង ក្នុងសង្កាត់បឹងសាឡាង រកឃើញឈាមជ្រូកធ្វើពីឈាមគោ និងសណ្ដែកបណ្ដុះដាក់គីមី សរុបចំនួន ៧៣ គីឡូក្រាម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្មីៗ នេះ ដោយអនុវត្តតាមអនុសាសន៍ណែនាំដ៏ខ្ពង់ខ្ពស់ពី លោកស្រីរដ្ឋមន្ត្រីក្រសួងពាណិជ្ជកម្ម និងក្រោមការចង្អុលបង្ហាញពីថ្នាក់ដឹកនាំ នៃអគ្គនាយកដ្ឋាន ក.ប.ប ក្នុងការការពារសុខុមាលភាពប្រជាពលរដ្ឋ សាខា ក.ប.ប រាជធានីភ្នំពេញ សហការជាមួយអាជ្ញាធរមូលដ្ឋាន និងប៉ុស្តិ៍នគរបាលរដ្ឋបាលសង្កាត់បឹងសាឡាង ខណ្ឌទួលគោក បានចុះត្រួតពិនិត្យ ណែនាំ និងអប់រំ នៅទីតាំងផលិតឈាមជ្រូក និងសណ្ដែកបណ្ដុះ ចំនួន ២ ទីតាំង ស្ថិតនៅភូមិ ១៧ សង្កាត់បឹងសាឡាង ខណ្ឌទួលគោក រាជធានីភ្នំពេញ។

ការចុះត្រួតពិនិត្យ ណែនាំ និងអប់រំ នៅទីតាំងខាងលើនេះដែរ បានរកឃើញ ៖ ១.ផលិតផលឈាមជ្រូកធ្វើអំពីឈាមគោ ដែលជាកម្មវត្ថុ នៃការក្លែងបន្លំវត្ថុធាតុដើម បន្លំថា ប្រភេទ នៃផលិតផលឈាម។ ២.សណ្ដែកបណ្ដុះមានដាក់បន្ថែមសារធាតុគីមី។ ៣.មិនស្របតាមបទប្បញ្ញត្តិបច្ចេកទេសតាមលក្ខខណ្ឌតម្រូវផ្នែកអនាម័យម្ហូបអាហារ គុណភាព សុវត្ថិភាពផ្នែកអតិសុខុមប្រាណជីវសាស្ត្រ ស្របតាមបទប្បញ្ញត្តិ នៃច្បាប់។ ដូច្នេះ មន្ត្រីជំនាញ បានដកហូតផលិតផលឈាម ៥១ គីឡូក្រាម និងសណ្ដែកបណ្ដុះដែលបន្ថែមសារធាតុគីមី ២២ គីឡូក្រាម សរុបចំនួន ៧៣ គីឡូក្រាម។

ក្រោយការត្រួតពិនិត្យ និងការពន្យល់ណែនាំអំពីច្បាប់ដល់ម្ចាស់ទីតាំងទាំង ២ ខាងលើ ម្ចាស់ទីតាំងបានយល់ព្រមសហការទទួលការណែនាំ អប់រំ ពីមន្ត្រីជំនាញ ដែលបានចុះមកត្រួតពិនិត្យ ដោយធ្វើកិច្ចសន្យាកែតម្រូវដូចតទៅ ៖

១.បញ្ឈប់ការដាក់លាយសារធាតុបន្ថែម(សារធាតុគីមី) លើការផលិតសណ្ដែកបណ្ដុះ ឬ មិនបន្តការផលិតសណ្ដែកបណ្ដុះទៀត។ ២.បញ្ឈប់ការផលិតឈាមជ្រូកធ្វើពីឈាមគោ ដែលជាកម្មវត្ថុ នៃការក្លែងបន្លំវត្ថុធាតុដើម បន្លំផលិតផលឈាម និងមិនដាក់លាយសារធាតុបន្ថែមណា ដែលច្បាប់មិនអនុញ្ញាត។ ៣.រៀបចំអនាម័យ ទុកដាក់សម្ភារៈ វត្ថុធាតុដើម ឲ្យបានល្អ។ ៤.ម្ចាស់ទីតាំង បានស្នើសុំការរៀបចំរយៈពេល ៣ ខែ ដើម្បីកែតម្រូវអនាម័យទីតាំងឲ្យបានល្អ និងសហការជាមួយសមត្ថកិច្ចជំនាញ ដើម្បីចុះផ្ទៀងផ្ទាត់ពីភាពត្រឹមត្រូវក្នុងការធ្វើអាជីវកម្មនេះ៕