ដីព្រៃលិចទឹកតំបន់៣ ជាច្រើន ហិកតា ត្រូវកាប់ទន្ទ្រាន ខណៈ​អាជ្ញាធរកំពុងចុះត្រួតពិនិត្យ

នៅរសៀលថ្ងៃទី ៥ ខែកក្កដា ប្រជាពលរដ្ឋបានរាយការណ៍ឱ្យដឹងថា ដីព្រៃលិច ទឹកតំបន់ ៣ ស្ថិតនៅចំណុចព្រែកថ្លាន់ក្នុងឃុំកំពង់ព្រះគគីរស្រុកបរិបូណ៌ប្រមាណជាង១០ ហិកតា ត្រូវបានគេកាប់ទន្ទ្រានយកជាកម្មសិទ្ធិ។

ករណីនេះ មន្ត្រីជំនាញបានចុះទៅត្រួតពិនិត្យជាក់ស្ដែងនៅល្ងាចថ្ងៃទិ ០៥ ខែកក្កដា បានឱ្យដឹងថាពិនិត្យឃើញតែជាង ៨ហិកតាប៉ុណ្ណោះនិងកំពុងស្រាវជ្រាវរកមុខសញ្ញាកសាងសំណុំរឿងចាត់ការតាមផ្លូវច្បាប់។

លោក តាត សីហាក់ នាយផ្នែករដ្ឋបាលជលផល ផ្សារឆ្នាំងនៅព្រឹកថ្ងៃទី ៦ ខែកក្កដា នេះបានបញ្ជាក់តាមទូរស័ព្ទឱ្យដឹង​ថា ក្រោយពីទទួលបានការរាយការណ៍ពីប្រជាពលរដ្ឋឃុំកំពង់ព្រះគគីរ ពាក់ព័ន្ធនឹងបទល្មើសខាងលើនេះ មន្ត្រីជំនា​ញ​បានសហការជាមួយ ក្រុមចម្រុះ មានលោកមេឃុំ សហគមន៍ និងមន្ត្រីនគរបាលមូលដ្ឋាន ចុះទៅពិនិត្យជាក់ស្ដែង។

ក្រោយពីបានចុចនិយាមការពិនិត្យឃើញថា ព្រៃលិចទឹកបានរងការខូចខាតនៅចំណុចនរះសរុបចំនួន ៨ ហិកតាកន្លះ ក្នុង​នោះបានកាប់ថ្មី អស់១ហិចតា និងជាង ៧ ហិកតាទៀតបានកាប់កាលពីឆ្នាំកន្លងទៅ។

ករណីនេះ សមត្ថកិច្ចជំនាញនិងបន្តស្រាវជ្រាវរកមុខសញ្ញាពាក់ព័ន្ធដើម្បីកសាងសំណុំរឿងតាមនីតិវិធីបញ្ជូនទៅតុលា​ការ។

មន្ត្រីជំនាញក៏សូម អំពាវនាវផងដែរដល់ប្រជា ពលរដ្ឋនិងសហគមន៍ សូមសហការគ្នារាយ ការណ៍ឲ្យបានទាន់ពេលវេលា ករណីពិនិត្យឃើញមានបទល្មើស កើតឡើងដូចខាងលើនេះ ដោយសូមរាយការណ៍មកជំនាញជាបន្ទាន់ ដើម្បីរួមគ្នាការពារព្រៃលិចទឹកដែលជាជម្រកមច្ឆាជាតិឲ្យបានគង់វង្សសម្រាប់កូនចៅយើងតទៅអនាគត៕ អត្ថបទ៖ ឈៀង ថារិទ្ធ