ព័ត៌មានជាតិ

ចាប់រំលោភក្មេងស្រីដែលជាអនីតិជនបាន៣ថ្ងៃ បែកការណ៍ត្រូវប៉ូលិសចាប់ខ្លួន

បានផុស

៥ years មុន

នៅ

ថ្ងៃពុធ ៧ កក្កដា ២០២១

ដោយ

បាត់ដំបង ៖ បុរសវ័យចំណាស់ម្នាក់ ត្រូវបានសមត្ថកិច្ចស្រុកមោងឫស្សីចាប់ខ្លួន បន្ទាប់ពីបានទទួលពាក្យបណ្តឹងពីស្ត្រីជាម្តាយដែលបានប្តឹងចោទប្រកាន់ពីបទចាប់រំលោភក្មេងស្រីអាយុក្រោម១៥ឆ្នាំ។

នៅថ្ងៃទី៧ ខែ កក្កដា ឆ្នាំ ២០២១ អនុវត្តតាមយោបល់របស់លោកឧត្តមសេនីយ៍ទោ សាត គឹមសាន ស្នងការនៃស្នងការដ្ឋាននគរបាលខេត្តបាត់ដំបងលោកវរសេនីយ៍ឯក ស គឹមឡុង អធិការនគរបាលស្រុកមោងឫស្សី បានដឹកនាំកម្លាំងធ្វើការ នាំខ្លួនបុរសវ័យចំណាស់ម្នាក់ឈ្មោះ បូង ញឹម ភេទប្រុស អាយុ៦៦ឆ្នាំរស់នៅឃុំកកោះ ស្រុកមោងឫស្សី ខេត្តបាត់ដំបង មកកាន់អធិការដ្ឋាននគរបាលស្រុកធ្វើការសាកសួរ ទាក់ទងនឹងករណីរំលោភសេពសន្ថវៈទៅលើកុមារីជាអនីតិជន។

យោងតាមពាក្យបណ្តឹងបានបញ្ជាក់ថា នៅថ្ងៃទី ៧ខែកក្កដាឆ្នាំ២០២១នេះសមត្ថកិច្ចនគរបាលបានទទួលពាក្យបណ្តឹងពីស្ត្រីជាម្តាយរបស់កុមារីរងគ្រោះ ដែលក្នុងពាក្យបណ្តឹងបានរៀបរាប់ពីសកម្មភាពរបស់ជនសង្ស័យខាងលើថា បានចាប់រំលោភកូនស្រីរបស់ខ្លួនដែលជាអនីតិជន ទើបមានអាយុត្រឹមតែ១៥ឆ្នាំប៉ុណ្ណោះកាលពីថ្ងៃទី៤ខែកក្កដាឆ្នាំ២០២១ ក្នុងខណៈដែលកូនស្រីរបស់គាត់ទៅឃ្វាលគោនៅ ចំណុចវាលស្រែក្នុងឃុំកកោះ ស្រុកមោងឫស្សី ហើយសកម្មភាពនេះមិនត្រូវបាន ដឹងភ្លាមៗទេ ដោយសារជនសង្ស័យគំរាមកំហែង មិនឲ្យកូនស្រីគាត់និយាយរហូតដល់ថ្ងៃទី៧ ខែកក្កដា ឆ្នាំ២០២១ ទើបដឹង។

លោកវរសេនីយ៍ឯក ស គឹមឡុង អធិការនគរបាលស្រុកមោងឫស្សី បានបញ្ជាក់ថា នៅចំពោះមុខការសាកសួររបស់សមត្ថកិច្ចនគរបាល បុរសជាជនសង្ស័យខាងលើ បានទទួលស្គាល់កំហុសត្រឹមតែបន្តិចបន្តួចប៉ុណ្ណោះ ពោលគឺបានទទួលស្គាល់ថារូបគាត់បានធ្វើសកម្មភាពទៅលើកុមារីនោះមែន តែមិនបានសម្រេចដល់ទីជម្រៅនោះទេ ដោយសារមានក្មេងៗឃ្វាលគោឃើញ ឆោឡោឡើង សកម្មភាពរបស់គាត់ត្រូវអាក់ខានទៅវិញ។

តែទោះជាយ៉ាងនេះក្តីពេលនេះជនសង្ស័យខាងលើត្រូវបាន នគរបាលស្រុកមោងឫស្សីកសាងសំណុំរឿងបញ្ជូនមកផែនជំនាញអនុវត្តតាមនីតិវិធី៕

ដោយ ៖ សោ និយមរ័ត្ន

Related Topics:រំលោភសេពសន្ថវៈ