ផ្លូវ​ថ្មើរជើង​ក្រោម​ដី​​មុន​គេ​នៅស្រុក​ខ្មែរ​ សង់រួចហើយ តែ​មិនទាន់ដាក់ឱ្យប្រើប្រាស់នៅឡើយទេ

ភ្នំពេញ៖ ផ្លូវក្រោមដីសម្រាប់អ្នកដំណើរថ្មើរជើងចំនួន ២កន្លែង នៅតាមបណ្តោយផ្លូវជាតិលេខ៤ នៅខេត្តព្រះសីហនុដែលបានសាងសង់រួចរាល់ហើយ នៅមិនទាន់ដាក់ឱ្យដំណើរប្រើប្រាស់ជាផ្លូវការនៅឡើយទេ។

លោក ឃាង ភារម្យ អ្នកនាំពាក្យសាលាខេត្តព្រះសីហនុបានមានប្រសាសន៍នៅព្រឹកថ្ងៃទី១៣កក្កដាថា ដំណើរការ​សាងសង់​ផ្លូវក្រោមដីបានរួចរាល់ តែនៅមិនទាន់អាចដាក់ឱ្យប្រើប្រាស់នៅឡើយទេ។

« យើងមើលការដ្ឋានរបស់គាត់វារួចរាល់ហើយ វានៅតែការបើកសម្ពោធជាផ្លូវការទេហើយ នៅតែមិនទាន់អាចបាននៅឡើយទេ ដោយសារផ្លូវក្រោមដីទី១ ឆ្លងកាត់ផ្លូវជាតិលេខ៤នៅចំណុចសាលាវិទ្យាល័យាឃ្លាំងលើ ស្ថិតក្នុងសង្កាត់​លេខ​១ហើយ សាលាបានបិទអីចឹងអត់មានសិស្សទៅរៀន អត់មានការប្រើប្រាស់ជាបណ្តោះអាសន្នដែរ»។

លោក ឃាង ភារម្យ បាន បន្តទៀតថា ចំណែកផ្លូវក្រោមដីទី២ស្ថិតនៅមុខរោងចក្រមួយកន្លែង ហើយរោងចក្រនោះក៏បាន​ផ្អាក​ដំណើរការអាជីវកម្ម ដោយសារបញ្ហាជំងឺកូវីដ១៩។ ដូចនេះមិនមានការប្រើប្រាស់ជាបណ្តោះអាសន្នដូចគ្នា។

គួរបញ្ជាក់ថា ផ្លូវក្រោមដីសម្រាប់អ្នកដំណើរថ្មើរជើងចំនួន ២កន្លែង នៅតាមបណ្តោយផ្លូវជាតិលេខ៤ នៅខេត្តព្រះសីហនុ​​ត្រូវបានបើកការដ្ឋានជាផ្លូវការកាលពីថ្ងៃទី១៤ ខែកុម្ភៈ ឆ្នាំ២០២០ ដោយផ្លូវក្រោមដីនីមួយៗ មានប្រវែង ៥៣ម៉ែត្រ ទទឹង៧ម៉ែត្រ និងកម្ពស់ ៣,២ម៉េត្រ ដោយមួយកន្លែងស្ថិតនៅចំពីមុខវិទ្យាល័យ ហ៊ុនសែន ឃ្លាំងលើ និងមួយកន្លែង​ទៀតស្ថិតនៅទីប្រជុំជនរោងចក្រ។

ផ្លូវនេះធ្វើឡើងសម្រាប់សិស្សានុសិស្ស និងកម្មករ កម្មការិនីឆ្លងកាត់ ក្នុងគោលបំណងដើម្បីកាត់បន្ថយការកកស្ទះ និងគ្រោះថ្នាក់ចរាចរណ៍ ដែលអាចកើតឡើងជាយថាហេតុណាមួយ៕

អត្ថបទ៖ សំអឿន