គិតត្រឹម​ថ្ងៃ​ម្សិលមិញ កម្ពុជា​ប្រកាស​មាន​អ្នកឆ្លង​កូវីដ​១៩ បំប្លែង​ថ្មី​​ឡើង​ដល់ ៧៥ នាក់

ភ្នំពេញ៖ គិតចាប់ពីថ្ងៃទី៣១ ខែមីនា ឆ្នាំ២០២១ រហូតមកដល់ថ្ងៃទី១៤ ខែកក្កដា ឆ្នាំ២០២១ កម្ពុជាបានរកឃើញអ្នកមាន​វិជ្ជមានវីរុសកូវីដ-១៩ ប្រភេទដែលតា (Delta) សរុបទាំងអស់ចំនួន ៧៥នាក់ស្រី៤០នាក់ជាករណីនាំចូល។

យោងតាមក្រសួងសុខាភិបាល ក្នុងចំណោមអ្នកឆ្លងវីរុសកូវីដ១៩ បំប្លែងថ្មី B.1.617.2 (Delta)ចំនួន ៧៥នាក់ ក្នុងនោះរកឃើញក្នុងកំឡុងខែមេសា១នាក់ ថ្ងៃ០៤មិថុនា ៤ នាក់ ថ្ងៃ១៨មិថុនា ៧នាក់ ថ្ងៃទី២៥មិថុនា ២៥នាក់ និងថ្ងៃទី១៦កក្កដា រកឃើញចំនួន ៣៧ នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមក្រសួងសុខាភិបាល ការរកឃើញវីរុសកូវីដ១៩ បំប្លែងថ្មី B.1.617.2 (Delta) ចំនួន ៣៧ករណីស្រី ២២ នាក់នេះ ជាអ្នកដំណើរចូលកម្ពុជា នៅថ្ងៃទី០៧ និងថ្ងៃទី១៤ ខែកក្កដា ឆ្នាំ២០២១ក្នុងនោះជាអ្នកដំណើរវិលត្រឡប់ពីប្រទេសថៃ តាមច្រកព្រំដែនកម្ពុជា ចំនួន៣៤នាក់ និងអ្នកដំណើរបរទេសតាមយន្តហោះចំនួន៣នាក់។

លោកសាស្រ្តាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល សូមក្រើនរំលឹក​ឲ្យ​ប្រជាពលរដ្ឋបន្តប្រុងប្រយ័ត្នខ្ពស់ ការពារខ្លួន កុំភ្លេចខ្លួនឲ្យសោះ និងត្រូវចេះរៀនរស់នៅធម្មតាជាមួយវីរុសកូវីដ-១៩ តាមបែបគន្លងថ្មី ក្នុងបរិបទប្រយុទ្ធនឹងជំងឺកូវីដ-១៩ សំដៅបង្ការ គ្រប់គ្រង និងកាត់ផ្តាច់នូវខ្សែចម្លងនៃវីរុសកូវីដ-១៩ ជាពិសេសពពួកប្រភេទបំប្លែងថ្មីនេះ ឬក៏ប្រភេទថ្មីផ្សេងទៀត ដែលអាចកើតមាននៅកម្ពុជាយើង ជាយថាហេតុណាមួយ៕

អត្ថបទ៖ សំអឿន