មន្ត្រីជាន់ខ្ពស់សុខាភិបាលជំរុញមន្ត្រីបង្កើនការយកចិត្តទុកដាក់ផ្តល់សេវាជូនពលរដ្ឋឱ្យបានគត់មត់ក្នុងអំឡុងបុណ្យចូលឆ្នាំថ្មី

មន្ត្រីជាន់ខ្ពស់ក្រសួងសុខាភិបាល បានជំរុញឱ្យមូលដ្ឋានសុខាភិបាលនៅទូទាំងប្រទេសបង្កើនការយកចិត្តទុកដាក់ផ្តល់សេវាជូនប្រជាពលរដ្ឋឱ្យបានកាន់តែល្អប្រសើរនិងគត់មត់ពិសេសក្នុងកំឡុងពេលចូលឆ្នាំប្រពៃណីជាតិខ្មែរដែលនឹងមកដល់ក្នុងពេលខាងមុខនេះ ក៏ដូចជាពេលបន្តបន្ទាប់ទៀតផងដែរ។

នៅក្នុងកិច្ចប្រជុំក្រុមការងារក្រសួងសុខាភិបាលថ្នាក់ជាតិ និងថ្នាក់រាជធានី ខេត្ត ដើម្បីលើកកម្ពស់ និងពង្រឹងការអនុវត្តការងារឱ្យបានកាន់តែប្រសើរ ដោយមានប្រសិទ្ធិភាពកាលពីរសៀលថ្ងៃទី១០ ខែ​មេសា លោក កុយ វ៉ាននី រដ្ឋលេខាធិការក្រសួងសុខាភិបាល និងជាប្រធានក្រុមការងារបច្ចេកទេសសេវាសុខភាពបឋមនៅមូលដ្ឋានកម្រិតមណ្ឌលសុខភាពបានលើកឡើងថាដើម្បីលើកកម្ពស់ និងពង្រឹងការអនុវត្តការងារឱ្យបានកាន់តែប្រសើរ ដោយមានប្រសិទ្ធិភាពព្រមជាមួយប្រសិទ្ធិផល ត្រូវបម្រើសេវាតាមរយៈការប្រើប្រាស់ប្រព័ន្ធគាំពារសង្គម ប.ស.ស និងមូលនិធិសមធម៌ បម្រើសេវាជូនដល់បងប្អូនប្រជាពលរដ្ឋទូទៅដែលមករកទទួលសេវានៅតាមមូលដ្ឋានសុខាភិបាល ជាពិសេសក្នុងកំឡុងពេលចូលឆ្នាំប្រពៃណីជាតិខ្មែរដែលនឹងមកដល់ក្នុងពេលខាងមុខនេះ ក៏ដូចជាពេលបន្តបន្ទាប់ទៀតផងដែរ។ ត្រូវចុះអភិបាលលើកកម្ពស់និងកែល្អគាំទ្រមូលដ្ឋានសុខាភិបាលពីថ្នាក់ជាតិ ដល់ថ្នាក់ខេត្ត ស្រុក និងមណ្ឌលសុខភាព ពីសំណាក់ថ្នាក់ដឹកនាំក្រុមការងារបច្ចេកទេសសេវាសុខភាពបឋមនៅមូលដ្ឋានកម្រិតមណ្ឌលសុខភាព។

គួរបញ្ជាក់ថាកិច្ចប្រជុំនេះមានការចូលរួមពីសំណាក់ លោក លោក លោកស្រី ក្រុមការងារបច្ចេកទេសសេវាសុខភាពបឋមនៅមូលដ្ឋានកម្រិតមណ្ឌលសុខភាព លោករដ្ឋលេខាធិការ អនុរដ្ឋលេខាធិការក្រសួងសុខាភិបាលទទួលបន្ទុក ប.ស.ស ទីប្រឹក្សា ប្រធាននាយកដ្ឋានសេវាសុខភាព ព្រមទាំងលោក លោកស្រី ប្រធានមន្ទីរសុខាភិបាល ប្រធានការិយាល័យស្រុកប្រតិបត្តិ ប្រធានមន្ទីរពេទ្យបង្អែកខេត្ត ស្រុកទូទាំង២៥ រាជធានី-ខេត្ត៕

អត្ថបទ៖សំអឿន