ទូតវៀតណាមប្រចាំកម្ពុជា អរគុណកាកបាទក្រហមកម្ពុជា ដែលបានឧបត្ថម្ភថវិកា ជូនកាកបាទក្រហមវៀតណាម

ឯកអគ្គរដ្ឋទូតវៀតណាម ប្រចាំនៅកម្ពុជា បានថ្លែងអំណរគុណ ចំពោះកាកបាទក្រហមកម្ពុជា ដែលបានជួយឧ​បត្ថម្ភថវិកាសប្បុរសធម៌ ជូនកាកបាទក្រហមវៀតណាម ដើម្បីចូលរួមក្នុងយុទ្ធនាការ ប្រយុទ្ធប្រឆាំងជំងឺកូវីដ-១៩ ក្នុង​ប្រទេសវៀតណាម ដែលកំពុងមានការរាតត្បាតខ្លាំង។

ការថ្លែងអំណរគុណនេះ គ្រាដែលគណៈប្រតិភូកាកបាទក្រហមកម្ពុជា ដឹកនាំដោយលោកស្រី ពុំ ចន្ទីនី អគ្គលេខា​ធិការកាកបាទក្រហមកម្ពុជា នៅព្រឹកថ្ងៃទី១៩ ខែកក្កដា ឆ្នាំ២០២១នេះ បាននាំយកថវិកាចំនួន១០ម៉ឺនដុល្លារអាមេរិក ប្រគល់​ជូនកាកបាទក្រហមវៀតណាម តាមរយៈស្ថានឯកអគ្គរដ្ឋទូតវៀតណាម ប្រចាំនៅកម្ពុជា។

លោកស្រី ពុំ ចន្ទីនី អគ្គលេខាធិការ កាកបាទក្រហមកម្ពុជា បានមានប្រសាសន៍នាឱកាសនោះ ដោយបានពាំនាំប្រសាសន៍របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលសូមចូលរួមសម្តែងនូវក្តីព្រួយបារម្ភជាមួយនឹង ប្រជាជនកាកបាទក្រហម ក៏ដូចជារដ្ឋាភិបាលនៃប្រទេសវៀតណាម ដែលកំពុងជួបប្រ​ទះ​​នឹងការឆ្លងរីករាលដាលធ្ងន់ធ្ងរនៃជំងឺកូវីដ-១៩ ក្នុងប្រទេសវៀតណាម ជាពិសេសនៅក្នុងទីក្រុងហូជីមិញតែម្ដង។

ក្នុងឱកាសនោះដែរ កាកបាទក្រហមកម្ពុជា បានសម្តែងនូវការកោតសរសើរចំពោះបុគ្គលិក អ្នកស្ម័គ្រចិត្តនៃកាក​បាទក្រហមវៀតណាម និងក្រុមគ្រូពេទ្យវៀតណាម ដែលបានយកចិត្តទុកដាក់ខ្ពស់ ក្នុងការឆ្លើយតប ជួយសង្គ្រោះអាយុជីវិតរបស់អ្នកជំងឺកូវីដ-១៩ នៅប្រទេសវៀតណាម និងសូមចូលរួមប្រយុទ្ធប្រឆាំងនឹងជំងឺកូវីដ-១៩ ឲ្ឆាប់បានរលាយសាបសូន្យពីភពផែនដីយើងនេះ។

ជាការឆ្លើយតបឯកអគ្គរដ្ឋទូតវៀតណាម ប្រចាំនៅកម្ពុជាលោក VU QUANG MINH ជំនួសមុខឲ្យកាកបាទក្រហម​វៀតណាម រដ្ឋាភិបាល និងប្រជាជនវៀតណាម បានថ្លែងអំណរគុណយ៉ាងជ្រាលជ្រៅ ចំពោះកាកបាទក្រហមកម្ពុជា ដែលបានជួយឧបត្ថម្ភថវិកាសប្បុរសធម៌ ដែលនេះបានបង្ហាញពីចំណងមិត្តភាព សាមគ្គីភាព ក្តីស្រឡា​ញ់ និងជួយគ្នាទៅវិញទៅមកក្នុងគ្រប់កាលៈទេសៈ។

បន្ថែមពីលើនេះ លោកក៏បានថ្លែងអំណរគុណ និងកោតសរសើរដោយស្មោះ ចំពោះរាជរដ្ឋាភិបាលកម្ពុជា ដែលតែង​តែជួយចែករំលែក ចំពោះប្រទេសដែលជួបការលំបាក ដូចជា៖ ប្រទេសឡាវ នេប៉ាល់ មីយ៉ានម៉ា និងប្រទេស​វៀតណាមជាដើម ហើយស្ថិតក្នុងស្ថានភាពដែលទីក្រុងហូជីមិញ កំពុងឆ្លងរីករាលដាលនេះដែរ ប្រទស វៀតណាម សូមរៀនសូត្រពីកម្ពុជាអំពីយុទ្ធសាស្ត្រ និងវិធានការនានា ក្នុងការទប់ស្កាត់ជំងឺកូវីដ-១៩នេះផងដែរ៕