លោកស្នងការ ណែនាំកងកម្លាំង ត្រូវអនុវត្តបម្រាមគោចរ ឲ្យបានត្រឹមត្រូវ និងការពារកុំឲ្យឆ្លង កូវីដ

លោកឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញ នៅយប់ថ្ងៃទី១ ខែសីហា ឆ្នាំ២០២១ បានចុះត្រួតពិនិត្យដោយផ្ទាល់គ្រប់គោលដៅ ដែលកងកម្លាំងចម្រុះ នៃស្នងការដ្ឋាន នគរ​បាលរាជធានីភ្នំពេញ កំពុងតែអនុវត្តបម្រាមគោចរ ចាប់ពីម៉ោង​៩ និង០០នាទីយប់​ ដល់ម៉ោង​៣ និង០០​នាទី​ទៀបភ្លឺ​ ដើម្បីជាការលើកទឹកចិត្តដល់មន្ត្រីក្រោមឱវាទ ក៏ដូចជាការពិនិត្យមើលការងារជាក់ស្តែង នៅតាមគោលដៅនីមួយៗ។

លោកវរសេនីយ៍ឯក សាន សុខសីហា ជំនួយការស្នងការ និងជាអ្នកនាំពាក្យ នៃស្នងការដ្ឋាន នគរបាល​រាជ ធានី​ភ្នំ​ពេញ បានថ្លែងប្រាប់អ្នកសារព័ត៌មានកម្ពុជាថ្មី នៅព្រឹកថ្ងៃទី២ ខែសីហានេះថា ក្រៅពីចុះត្រួតពិនិត្យការ​អនុវត្ត​ប​ម្រាមគោចរ និងលើកទឹកចិត្តដល់កងកម្លាំង ដែលបានបំពេញការងារទាំងយប់ ទាំងថ្ងៃហើយនោះ។ លោកឧត្តមសេនីយ៍ឯក ស ថេត ក៏បានណែនាំដល់កងកម្លាំងសមត្ថកិច្ច ត្រូវការពារខ្លួនឲ្យបានខ្ជាប់ខ្ជួន ដើម្បី ទប់ស្កាត់ការឆ្លង​រាលដាលជំងឺកូវីដ-១៩ ហើយត្រូវអនុវត្តបម្រាមគោចរ ឲ្យបានត្រឹមត្រូវ ដូចអ្វីដែលជាសេចក្ដីសម្រេច របស់រដ្ឋ​បាល​រាជធានីភ្នំពេញ។

សូមជម្រាបថា រដ្ឋ​បា​ល​រាជធានី​ភ្នំពេ​ញ បានចេញសេចក្ដីសម្រេច ស្ដីពី ការដាក់ចេញនូវវិធានការរដ្ឋបាល រយៈពេល១៤ថ្ងៃ ចាប់ពីម៉ោង១១ និង៥៩​នាទីយប់ ថ្ងៃទី​២៩ ខែ​កក្កដា ឆ្នាំ២០២១ រហូតដល់ថ្ងៃទី១២ ខែសីហា ឆ្នាំ២០២១ ដើម្បីប្រយុទ្ធ និងទប់ស្កាត់ការឆ្លងរាលដាល នៃ​ជំងឺ​កូវីដ-១៩។ នៅក្នុងសេចក្ដីសម្រេចនេះ ក៏បានដាក់ចេញនូវបម្រា​មគោចរ ដោយផ្អាកជាបណ្តោះអាសន្ន នូវរាល់ការធ្វើចរាចរណ៍ និងរាល់សកម្មភាពការងារ មុខរបរ ឬអាជីវកម្ម នៅចន្លោះម៉ោង៩យប់ ដល់ម៉ោង៣ទៀបភ្លឺ លើកលែងតែក្នុងករ​ណី​​​ចាំបាច់មួយចំនួនប៉ុណ្ណោះ។

របាយការណ៍ពីសមត្ថកិច្ច បានឲ្យដឹងថា ចាប់ពីថ្ងៃទី៣០ ខែកក្កដា ដល់ថ្ងៃទី១ ខែសីហា ឆ្នាំ២០២១ មាន យាន​យន្ត​ល្មើសបម្រាមគោចរ ចំនួន៨៩២គ្រឿង ហើយបានផាកពិន័យ ចំនួន២៣៨គ្រឿង។ ក្នុងនោះ រថយន្តចំនួន​៥២​គ្រឿ​ង និងម៉ូតូ១៨៦គ្រឿង។ ចំណែកមនុស្សចំនួន១៣០១នាក់ ត្រូវបានសមត្ថកិច្ច អប់រំណែនាំ និងអនុញ្ញាតឲ្យ​ត្រឡប់​ទៅផ្ទះវិញ។ រីឯយានយន្ត ចំនួន២០៧គ្រឿង ត្រូវបានសមត្ថកិច្ច ឃាត់ទុកបណ្ដោះអាសន្ន ដើម្បីឲ្យម្ចាស់មក​ដោះ​ស្រា​យ នៅពេលក្រោយ៕ (ដោយ)៖ ឃួន សុភ័ក្រ