មេអាវុធហត្ថ សម្តែងការអរគុណចំពោះសប្បុរសជនដែលជួយផ្តល់ស្បៀងក្នុងយុទ្ធនាការប្រឆាំងកូវីដ

នៅបញ្ជាការដ្ឋានកងរាជអាវុធហត្ថរាជធានីភ្នំពេញ លោកឧត្តមសេនីយ៍ឯក រ័ត្ន ស្រ៊ាង មេបញ្ជាការរង កងរាជអាវុធហត្ថលើផ្ទៃប្រទេស មេបញ្ជាការ កងរាជអាវុធហត្ថរាជធានីភ្នំពេញ នាថ្ងៃទី០៣ ខែសីហា ឆ្នាំ២០២១បានសម្ដែងនូវអំណរអរគុណចំពោះ សប្បុរសជនដែលតែងតែផ្តល់អំណោយជាស្បៀងដល់កម្លាំងអសវុធហត្ថរាជធានីជាបន្តបន្ទាប់ក្នុងយុទ្ធនាការប្រឆាំងកូវីដ១៩ពិសេសមេរោគបំលែងថ្មីដ៍កាចសាហាវនេះតែម្ដង។

ជាក់ស្ដែងថ្ងៃនេះលោកឧត្តមសេនីយ៍ឯក រ័ត្ន ស្រ៊ាងបានចាត់តំណាងដើម្បីទទួលនូវអំណោយទឹកសុទ្ធម៉ាក អេដលែន (EDLEN) ចំនួន៥០០កេស ពី លោក នាង ហ៊ុង ប្រគល់ជូនអាវុធហត្ថរាជធានីភ្នំពេញ សម្រាប់ប្រើប្រាស់ជាប្រយោជន៍ ក្នុងយុទ្ធនាការ បង្ការ ទប់ស្កាត់ ការរីករាលដាលជំងឺកូវីដ-១៩។

ក្នុងឱកាសនោះ ក្រុមការងារ តំណាងឲ្យលោកឧត្តមសេនីយ៍ឯក រ័ត្ន ស្រ៊ាង បានសម្តែងនូវការថ្លែងអំណរគុណយ៉ាងជ្រាលជ្រៅ ចំពោះ លោក នាង ហ៊ុង ដែលមានចិត្តជ្រះថ្លាឧបត្ថម្ភ ទឹកសុទ្ធ ដល់អាវុធហត្ថរាជធានីភ្នំពេញនាពេលនេះ គឺពិតជាមានសារៈសំខាន់បំផុត សម្រាប់ប្រើប្រាស់ជាក់ស្តែងក្នុងអង្គភាពពិសេសប្រយុទ្ធប្រឆាំងនឹងមេរោគបំលែងថ្មីដ៍កាចសាហាវនេះដែលកំពុងរាត្បាតក្នុងប្រទេសកម្ពុជាតែម្ដង៕

អត្ថបទ ៖ វិមាន