អ្នកចាក់វ៉ាក់សាំង ទី៨លាន ទទួលបានថវិកា ១០លានរៀល និងគ្រឿងឧបភោគ បរិភោគ ដែលជាអំណោយ របស់សម្តេចតេជោ ហ៊ុន សែន

លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការ ក្រសួងសុខាភិបាល និងជាប្រធានគណកម្មការចំពោះកិច្ចចាក់វ៉ាក់សាំងកូវីដ-១៩ ក្នុងក្របខណ្ឌទូទាំងប្រទេស (គ.វ.ក-១៩) នៅព្រឹកថ្ងៃទី១២ ខែសីហា ឆ្នាំ២០២១នេះ បាននាំយកជំនួយឧបត្ថម្ភថវិកា ចំនួន១០លានរៀល និងគ្រឿងឧបភោគបរិភោគ ដែលជាអំណោយដ៏ថ្លៃថ្លារបស់ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ទៅប្រគល់ជូនដល់ជ័យលាភី ចាក់វ៉ាក់សាំង កូវីដ-១៩ លេខរៀងទី៨លាន តាមការណែនាំដ៏ខ្ពង់ខ្ពស់របស់ សម្តេចតេជោ នាយករដ្ឋមន្ត្រី។

នៅថ្ងៃទី១០ ខែសីហា ឆ្នាំ២០២១ គណកម្មការចំពោះកិច្ចចាក់វ៉ាក់សាំងកូវីដ-១៩ ក្នុងក្របខណ្ឌទូទាំងប្រទេស បានរកឃើញ អ្នកដែលស្ម័គ្រចិត្តចាក់វ៉ាក់សាំងកូវីដ-១៩ ទី៨លាន គឺស្រ្ដីឈ្មោះ ថឹង ថា អាយុ ៥៦ ឆ្នាំ ដែលសព្វថ្ងៃរស់នៅភូមិដនឡូង ឃុំសេកុង ស្រុកសៀមប៉ាង ខេត្តស្ទឹងត្រែង។

គួររំលឹកថា សម្ដេចតេជោ ហ៊ុន សែន នាយករដ្ឋមន្ត្រី នៃកម្ពុជា បានសរសេរនៅលើទំព័រហ្វេសប៊ុក នៅថ្ងៃទី ១០ ខែសីហាដែរថា ប្រទេសកម្ពុជា បានចាក់វ៉ាក់សាំងការពារកូវីដ-១៩ ដូសទី១ បាន៨លាននាក់រួចហើយ គឺស្មើនឹង៨០ភាគរយ នៃប្រជាពលរដ្ឋ១០លាននាក់ ដែលត្រូវចាក់វ៉ាក់សាំង ដោយមិនទាន់គិតពីកុមារ និងយុវ​វ័យ ដែលបាននឹងកំពុងចាក់ ព្រមទាំងអ្នក ដែលបាននឹងកំពុងចាក់ ដូសទី៣ផងដែរ។

សម្ដេចតេជោ ហ៊ុន សែន បានលើកឡើងថា ដំណើរឆ្ពោះទៅរក ការចាក់វ៉ាក់សាំងចំនួន ១០លាននាក់ នៅមិនឆ្ងាយពីយើងនោះទេ ដែលធ្វើឲ្យយើងសម្រេចការងារ មុនការកំណត់ពី៧ ទៅ៨ខែ ប្រៀបធៀបជាមួយផែន ការដើម របស់យើង៕ (ដោយ)៖ ឃួន សុភ័ក្រ