ព័ត៌មានជាតិ

៨៥ភាគរយ នៃចំនួនកម្មករ នៅទូទាំងប្រទេស បានចាក់វ៉ាក់សាំង បង្ការកូវីដ រួចរាល់

បានផុស

៥ years មុន

នៅ

ថ្ងៃព្រហស្បតិ៍ ១២ សីហា ២០២១

ដោយ

មន្ត្រីជាន់ខ្ពស់ ក្រសួងការងារ និងបណ្ដុះបណ្ដាលវិជ្ជាជីវៈ បានឲ្យដឹងថា គិតមកដល់ជិតពាក់កណ្ដាល ខែសីហា ឆ្នាំ២០២១នេះ មានកម្មករ-និយោជិត ដែលបម្រើការងារនៅតាមរោចក្រ-សហគ្រាស នៅទូទាំងប្រទេស បានចាក់វ៉ាក់សាំងបង្ការជំងឺកូវីដ-១៩ ប្រមាណ៨៥ភាគរយហើយ។

ដោយអនុវត្តតាមអនុសាសន៍ របស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា គឺក្រសួងការងារ និងបណ្តុះបណ្តាលវិជ្ជាជីវៈ បានចាប់ផ្ដើមបើកយុទ្ធនាការ ចាក់វ៉ាក់សាំងជូនកម្មករ-និយោជិត នៅតាមរោងចក្រ-សហគ្រាស ក្នុងរាជធានីភ្នំពេញ ចាប់ពីថ្ងៃទី៧ ខែមេសា ឆ្នាំ២០២១ និងបានបន្តទៅតាមបណ្តាខេត្ត អាទិភាពផ្សេងៗទៀត ជាបន្តបន្ទាប់។

លោក ហេង សួរ រដ្ឋលេខាធិការក្រសួងការងារ និងបណ្ដុះបណ្ដាលវិជ្ជាជីវៈ និងជាប្រធានអនុគណៈកម្មការចាក់វ៉ាក់សាំងប្រចាំក្រសួង បានថ្លែងប្រាប់អ្នកសារព័ត៌មានកម្ពុជាថ្មី នៅព្រឹកថ្ងៃទី១២ ខែសីហា ឆ្នាំ២០២១ យ៉ាងខ្លីថា «ជារួមយើងអាចប៉ាន់ស្មានថា 85% នៃកម្មករបានចាក់វ៉ាក់សាំង»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចំណែកលោក ឡុង សុផាត ប្រធានសហភាពសហជីពយុវជន ការពារសិទ្ធិកម្មករកម្ពុជា (YPCWRC ) និងជាប្រធានសហពន្ធ័សហជីពសម្លេងយុវជនខ្មែរ បានថ្លែងឲ្យដឹងដែរថា បើតាមព័ត៌មាន ដែលសហជីពរបស់លោកទទួលបាន គឺបងប្អូនកម្មករ-និយោជិត ភាគច្រើនលើសលប់ បានចាក់វ៉ាក់សាំងការពារជំងឺកូវីដ-១៩ រួចរាល់ ហើយនៅសល់តែតិចតួចប៉ុណ្ណោះ ដែលមិនទាន់បានចាក់។

លោក ឡុង សុផាត បានលើកឡើងថា ដោយសារមានការខិតខំប្រឹងប្រែង របស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ក៏ដូចជាក្រសួងសុខាភិបាល និងក្រសួងការងារផង ដែលបានសម្រុកចាក់វ៉ាក់សាំង ជូនបងប្អូនកម្មករ-និយោជិតនោះ ធ្វើឲ្យកម្រិតនៃការឆ្លងរាលដាល នៃវីរុសកូវីដ-១៩ នៅក្នុងរោងចក្រ-សហគ្រាស នៅទូទាំងប្រទេស មានការធ្លាក់ចុះខ្លាំង គួរឲ្យកត់សម្គាល់។

ប្រធានសហជីពរូបនេះ បានថ្លែងនូវការកោតសរសើរ និងគោរពថ្លែងអំណរគុណ ចំពោះសម្ដេចតេជោនាយករដ្ឋមន្ត្រី យ៉ាងដូច្នេះថា «ខ្ញុំគិតថា ប្រសិនបើគ្មានគោលនយោបាយ ដឹកនាំដ៏ត្រឹមត្រូវរបស់សម្ដេចតេជោ ដែលដាក់ចេញនូវការគៀងគរ ខិតខំស្វែងរកវ៉ាក់សាំង មកពីក្រៅប្រទេស ដើម្បីយកមកចាក់ជូនកម្មករ-និយោជិត របស់យើង ក៏ដូចជាប្រជាពលរដ្ឋយើងទេ ស្ថានភាពនៅក្នុងវិស័យការងារ របស់យើង ក៏មានស្ថានភាពមិនល្អនោះដែរ ប៉ុន្តែដោយសារតែ យើងទទួលបានវ៉ាក់សាំងទាន់ពេលវេលា ទើបនាំឲ្យការឆ្លងរាលដាល នៅក្នុងចំណោមកម្មករ-និយោជិត មានការធ្លាក់ចុះជាខ្លាំង»។

គួរកត់សម្គាល់ថា ក្រោមការដាក់ចេញ នូវវិធានការដ៏ត្រឹមត្រូវ និងម៉ត់ចត់ របស់រាជរដ្ឋាភិបាល ក៏ដូចជាក្រសួងការងារ និងបណ្ដុះបណ្ដាលវិជ្ជាជីវៈ ជាពិសេសការបើកយុទ្ធនាការ ចាក់វ៉ាក់សាំងជូនបងប្អូនកម្មករ-និយោជិត បានធ្វើឲ្យស្ថានភាព នៃការឆ្លងរាលដាល នៃជំងឺកូវីដ-១៩ នៅក្នុងរោងចក្រ-សហគ្រាស មានការថមថយជាខ្លាំង៕ (ដោយ)៖ ឃួន សុភ័ក្រ