គ.ជ.ប បើកវគ្គបណ្ដុះបណ្ដាល ស្ដីពី «ការពិនិត្យបញ្ជីឈ្មោះ និងការចុះឈ្មោះបោះ ឆ្នោត ឆ្នាំ២០២១»

គណៈកម្មាធិការជាតិ រៀបចំការបោះឆ្នោត (គ.ជ.ប) នៅព្រឹកថ្ងៃទី១៦ ខែសីហា ឆ្នាំ២០២១ បានរៀបចំបើកវគ្គបណ្ដុះបណ្ដាល ជូនដល់ប្រធាន អនុប្រធាន មន្ត្រី លធ.ខប តំណាងគណបក្សនយោបាយ និងតំណាងអង្គការមិនមែនរដ្ឋាភិបាល ស្ដីពី «ការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០២១» ដែលពិធីនេះរៀបចំ តាមប្រព័ន្ធអនឡាញ ដោយមានការចូលរួមបើកដោយលោក ម៉ុក ដារ៉ា អគ្គលេខាធិការរង គ.ជ.ប។

លោក សោម សូរីដា អគ្គលេខាធិការរង គណៈកម្មាធិការជាតិរៀ បចំការបោះឆ្នោត បានថ្លែងប្រាប់កម្ពុជាថ្មី នៅរសៀលថ្ងៃទី១៦ ខែសីហា ឆ្នាំ២០២១ មុននេះបន្តិចថា កាលពីព្រឹកមិញនេះ គណៈកម្មាធិការជាតិរៀបចំការបោះឆ្នោត បានបើកវគ្គបណ្ដុះបណ្ដាល ស្ដីពី ការពិនិត្យបញ្ជីឈ្មោះ និងចុះឈ្មោះបោះឆ្នោតឆ្នាំ២០២១ ដែលវគ្គបណ្ដុះបណ្ដាលនេះ មានរយៈពេល៣ថ្ងៃ គឺចាប់ពីថ្ងៃទី១៦ ដល់ថ្ងៃទី១៨ ខែសីហា ឆ្នាំ២០២១ ដែលវគ្គបណ្ដុះបណ្ដាលនេះ ធ្វើឡើងតាមរយៈប្រព័ន្ធ online។

បើលោកបើតាមលោក សោម សូរីដា វគ្គបណ្ដុះបណ្ដាលនេះ មានការចូលរួមពី ប្រធាន អនុប្រធាន មន្ត្រី នៃលេខាធិការដ្ឋានរាជធានី ខេត្ត រៀបចំការបោះឆ្នោតទូទាំង២៥ រាជធានី ខេត្ត ហើយក៏មានការចូលរួមពីតំណាងគណបក្សនយោបាយ និងតំណាងអង្គការសង្គមស៊ីវិលផងដែរ៕ (ដោយ)៖ កោះកែវ