ផ្លូវ ១៥១ ក្នុងខណ្ឌព្រែកព្នៅកំ​ពុង​ជួសជុលស្ថាបនាពង្រីកជាផ្លូវបេតុងកម្រាស់ ២ តឹក

ផ្លូវ ១៥១ កំពុងស្ថាបនា ជាផ្លូវបេតុងកម្រាស ២ តឹក ពង្រីកទទឹង ១២ ម៉ែត្រ និងបណ្ដោយ ប្រវែង ១២ គីឡូម៉ែត្រ ចាប់ពីចំណុចផ្លូវបំបែកគល់ស្ពានឡុងឈិន រហូតដល់ភ្នំប្រសិទ្ធី ជាប់ព្រំប្រទល់ខេត្តកណ្ដាល។

ផ្លូវ១ខ្សែនេះ ត្រូវបានស្ថាបនាជាដំណាក់កាលៗ ចាប់ផ្ដើមពីខែកក្កដា ដែលសម្ដេចតេជោ ហ៊ុន សែន បានផ្ដល់ថវិកាសម្រាប់ជួសជុល តាមរយៈលោក ឃួង ស្រេង អភិបាលនៃគណៈអភិបាលរាជធានីភ្នំពេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ផ្លូវនេះពីដើមឡើយគហៅថាផ្លូវភ្នំប្រសិទ្ធី តែក្រោយមកត្រូវបានគេប្តូរឈ្មោះមកជាផ្លូវ១៥១វិញ។

ផ្លូវ១៥១ជាផ្លូវមានតាំងពីសង្គមចាស់ ហើយនៅក្នុងទស្សវត្ស៍ឆ្នាំ៩០-២០០០ផ្លូវនេះមានការលំបាកជាខ្លាំងដែល​មានត្រឹមក្រាលគ្រួសក្រហមប៉ុណ្ណោះ ដោយខូចជាអន្លើរៗ។

ជាបន្តបន្ទាប់ក្រោយៗមកទៀតផ្លូវ១៥១នេះត្រូវបានចាក់កៅស៊ូ តែផ្លូវនៅតូចចង្អៀត ហើយរងការខូចខាតស្ទើទាំងស្រុង ដោយសារជំនន់ទឹកភ្លៀង និងបណ្តាលមកពីទឹកបឹងតាមោគធ្វើឱ្យជ្រាយជើងក្រោមជាដើម។

ក្នុងឆ្នាំ២០១៤ បន្ទាប់ពីខណ្ឌព្រែកព្នៅកាត់ចូលរាជធានីភ្នំពេញ ផ្លូវ១៥១ត្រូវបានធ្វើការជួសជុលជាបន្តបន្ទាប់ដែលជាថវិការរបស់សម្តេចតេជោ ហ៊ុន សែន នាយករដ្ឋមន្ត្រីផង ថវិការរបស់សម្តេចសាយ ឈុំ ប្រធានក្រុមការងារចុះជួយរាជធានីភ្នំពេញផង និងថវិការរបស់សប្បុរសជននានាច្រើនទៀតផងដែរ តាមរយៈឯកឧត្តម​ឃួង ស្រេង ប្រធានក្រុមចុះជួយខណ្ឌព្រែកព្នៅ តែផ្លូវនៅមានទទឹងត្រឹម៨ម៉ែត្រប៉ុណ្ណោះ។

នៅក្នុងឆ្នាំ២០១៩ដោយសារមានទឹកជំនន់ទឹកភ្លៀង បានហូច្រោះកាត់ផ្លូវខូចជាអណ្លើរៗមក លោកសុខ សម្បត្តិ បានគៀងគររកសប្បុរសជនជួសជុលជាហូហែរហូតមកដល់ពាក់កណ្តាលឆ្នាំ២០២០នេះ សំណើររបស់សាលាខណ្ឌព្រែកព្នៅ បានដាក់ទៅសាលាក្រុងភ្នំពេញ ដើម្បីធ្វើការជួសជុល និងពង្រីកផ្លូវ១៥១នេះឲ្យធំជាងមុន។

មកដល់ពាក់កណ្តាលឆ្នាំ២០២១ទើមមានការអនុញ្ញាតឱ្យពង្រីកដោយចាក់បេតុង ដែលមានកម្រាស២តឹក ទទឹង១២ម៉ែត្រ បណ្តោយប្រមាណ១២គីឡូម៉ែត្រគឺចាប់ពីចំណុចផ្លូវបំបែកគល់ស្ពានឡុងឈិន រហូតទៅដល់ភ្នំប្រសិទ្ធីជាប់ព្រុំប្រទ​ល់​ខេត្តកណ្តាលតែម្តង៕ ដោយ៖ ឧត្តរ៉ា