ព័ត៌មានជាតិ

រដ្ឋាភិបាលស្នើឱ្យរាជធានីខេត្ត រៀបចំកន្លែងចាក់វ៉ាក់សាំងដល់ពលរដ្ឋដែលនៅសេសសល់

បានផុស

៥ years មុន

នៅ

ថ្ងៃចន្ទ ២៣ សីហា ២០២១

ដោយ

រដ្ឋាភិបាលបានស្នើឱ្យរាជធានីខេត្តរៀបចំទីកន្លែងចាក់វ៉ាក់សាំងដល់ប្រជាពលរដ្ឋដែលនៅសេសសល់បន្ថែមទៀត ខណៈបច្ចុប្បន្ននេះ ចំនួនប្រជាពលរដ្ឋដែលមានអាយុចាប់ពី១៨ឆ្នាំឡើង ហើយបានទទួលការចាក់វ៉ាក់សាំងកូវីដ១៩ មិនទាន់បានគ្រប់តាមផែនការដែលបានគ្រោងទុកចំនួន១០លាននាក់នៅឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ១៩ ក្នុងក្របខណ្ឌទូទាំងប្រទេស.គ.វ.ក-១៩ បានមានប្រសាសន៍ថា រហូតមកដល់ពេលបច្ចុប្បន្ននេះ ចំនួនប្រជាពលរដ្ឋដែលមានអាយុចាប់ពី១៨ឆ្នាំឡើង ហើយបានទទួលការចាក់វ៉ាក់សាំងកូវីដ-១៩ មិនទាន់បានគ្រប់តាមផែនការដែលបានគ្រោងទុកចំនួន១០លាននាក់នៅឡើយទេ ដែលតម្រូវអាជ្ញាធរគ្រប់ថ្នាក់ អំពាវនាវ និងកៀងគរប្រជាពលរដ្ឋដែលមិនទាន់បានចាក់វ៉ាក់សាំងជំងឺកូវីដ-១៩ ដូសទី១ នៅតាមមូលដ្ឋានភូមិ ឃុំ-សង្កាត់ របស់ខ្លួន។

ជាមួយគ្នានេះដែរ លោកស្រីបានបន្តថា ត្រូវរៀបចំផែនការនិងចលនាលើកទឹកចិត្តពួកគាត់ឲ្យមកទទួលការចាក់វ៉ាក់សាំងកូដ-១៩ដោយស្ម័គ្រចិត្តឲ្យបានទាន់ពេលវេលានៅតាមទីតាំងដែលកំពុងដំណើរការចាក់វ៉ាក់សាំងកូវីដ-១៩ ក្នុងពេលបច្ចុប្បន្ននេះឱ្យបានគ្រប់ៗគ្នា។

តាមរយៈសេចក្តីជូនដំណឹងចុះថ្ងៃទី២៣ ខែសីហានេះ លោកស្រីបានបន្តទៀតថា.គ.វ.ក-១៩ ពិនិត្យឃើញថា នៅមានប្រជាពលរដ្ឋមានអាយុចាប់ពី១៨ឆ្នាំឡើងមួយចំនួនមិនទាន់បានមកចាក់វ៉ាក់សាំងកូវីដ-១៩ ដោយសារមូលហេតុផ្សេងៗដូចជា ពលករ ឬប្រជាពលរដ្ឋ ឬនិស្សិតដែលបានវិលត្រឡប់មកពីបរទេស ហើយទើបបានបញ្ចប់ការធ្វើចត្តាឡីស័ក ស្ត្រីទើបសម្រាលកូនរួច និងមូលហេតុផ្សេងៗទៀត។

លោកស្រីបានណែនាំដល់លោក លោកស្រីដែលជាអភិបាល នៃគណៈអភិបាលរាជធានី ខេត្តនិងជាប្រធានអនុគណៈកម្មការចំពោះកិច្ចពាក់វ៉ាក់សាំងកូវីដ-១៩ ក្នុងក្របខណ្ឌរាជធានី-ខេត្តចាត់ចែងរៀបចំទីតាំងចាក់វ៉ាក់សាំងកូវីដ-១៩ នៅតាមមូលដ្ឋានសុខាភិបាលសាធារណៈ ដែលប្រជាពលរដ្ឋងាយស្រួលទៅទទួលយកសេវាចាក់វ៉ាក់សាំងកូវីដ ១៩ ដូចជាមណ្ឌលសុខភាព មន្ទីរពេទ្យបង្អែកស្រុក មន្ទីរពេទ្យបង្អែករាជធានី-ខេត្ត ឬទីតាំងមួយចំនួនទៀតដែលអាចផ្ដល់លទ្ធភាពឱ្យប្រជាពលរដ្ឋដែលនៅសេសសល់អាចមកទទួលការចាក់វ៉ាក់សាំងកូដ-១៩ ឱ្យបានគ្រប់ៗគ្នា។

ទន្ទឹមនឹងនេះ គ.វ.ក. ១៩ សូមស្នើឱ្យចេញសេចក្តីជូនព័ត៌មានឱ្យបានទូលំទូលាយ និងញឹកញាប់ អំពីទីតាំងនិងកាលបរិច្ឆេទនៃការចាក់វ៉ាក់សាំងកូដ-១៩ នៅតាមបណ្តារាជធានី-ខេត្តក្រោមដែនសមត្ថកិច្ចរបស់ខ្លួន ដើម្បីជូនសាធារណជនឱ្យបានជ្រាប និងទៅចាក់វ៉ាក់សាំងកូរី-១៩ដោយស្ម័គ្រចិត្តឱ្យបានគ្រប់ៗគ្នា។ លើសពីនេះសូមផ្សាយជូនសាធារណជននូវលេខទូរសព្ទទំនាក់ទំនងតាមទីតាំងនីមួយៗដែលនៅក្រោមដែនសមត្ថកិច្ចរបស់ខ្លួន ដើម្បីឲ្យប្រជាពលរដ្ឋ ងាយស្រួលធ្វើការទំនាក់ទំនងបាន។

គួរបញ្ជាក់ថា ចាប់ពីថ្ងៃទី២០ ខែកុម្ភៈ ឆ្នាំ២០២១រហូតមកដល់ថ្ងៃទី២២ ខែសីហា ឆ្នាំ២០២១នេះមានពលរដ្ឋកម្ពុជាអាយុចាប់ពី១៨ឆ្នាំឡើងទៅទទួលបានការចាក់វ៉ាក់សាំងចំនួន៨៧២៦០៤៣នាក់ស្មើនឹង៨៧.២៦ភាគរយធៀបនឹងគោលដៅ១០លាននាក់៕

អត្ថបទ ៖ សំអឿន

Related Topics: