ព័ត៌មានជាតិ

ទាល់តែយកសំណាកអាជីវករលើកទី២ និង សំអាតរួចរាល់ ទើបផ្សារសិរីសោភ័ណអាចបើកលក់ឡើងវិញបាន

បានផុស

៣ years មុន

នៅ

ថ្ងៃសុក្រ ២៧ សីហា ២០២១

ដោយ

លោក អ៊ុំ រាត្រី អភិបាលខេត្តបន្ទាយមានជ័យ បានឲ្យដឹងថា ផ្សារសិរីសោភ័ណដែលបានបិទកន្លងមក គឺត្រូវតែរៀបចំសណ្ដាប់ធ្នាប់ អនាម័យឲ្យបានស្អាតត្រឹមត្រូវ ហើយចំពោះបងប្អូនអាជីវករត្រូវមកយកសំណាកលើកទី២ឲ្យបានរួចរាល់និងគ្រប់គ្នា អនុវត្តតាមលក្ខខណ្ឌដែលរដ្ឋបាលខេត្តបានចេញ ទើបអនុញ្ញាតឲ្យបើកដំណើរការលក់ដូរ ឡើងវិញបាន លោក អ៊ុំ រាត្រី បានមានប្រសាសន៍នៅព្រឹកថ្ងៃទី២៧ ខែសីហា ឆ្នាំ២០២១នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក អ៊ុំ រាត្រី បានលើកឡើងថា បងប្អូនអាជីវករទាំងអស់ ត្រូវរួមសហការជាមួយអាជ្ញាធរមានសមត្ថកិច្ច ឲ្យបានល្អប្រសើរដោយអនុវត្តឲ្យបានខ្ជាប់ខ្ជួនតាមវិធានការណែនាំ ដើម្បីទប់ស្កាត់ការឆ្លងរាលដាលជំងឺកូវីដ-១៩ និងធានាបាននូវសុវត្ថិភាពទាំងអស់គ្នាផងដែរ។ លោកបានបញ្ជាក់ឲ្យដឹងបន្តទៀតថា ដើម្បីបើកឲ្យផ្សារសិរីសោភ័ណលក់វិញបាន ត្រូវឆ្លងកាត់ការត្រួតពិនិត្យនិងវាយតម្លៃរបស់គណៈកម្មការរៀបចំគ្រប់គ្រងផ្សារ។

អភិបាលខេត្តបន្ទាយមានជ័យ បានបញ្ជាក់ទៀតថា លក្ខខណ្ឌមួយចំនួនចំពោះបងប្អូនអាជីវករ ដើម្បីអាចចូលទៅបើកលក់ដូរវិញបាន មានដូចជាអាជីវករដែលអនុញ្ញាតឲ្យចូលលក់ដូរបាន លុះណាតែមានប័ណ្ណចាក់វ៉ាក់សាំងរួចពីរដង។ អាជីវករទាំងអស់ ត្រូវយកសំណាករកមេរោគកូវីដ-១៩ តាមការចាំបាច់ស្របតាមការជូនដំណឹងរបស់អ្នកគ្រប់គ្រង ផ្សារឬអាជ្ញាធរមូលដ្ឋាន។ ក្នុងផ្សារត្រូវបាញ់ថ្នាំ អាល់កុលសម្លាប់មេរោគរាល់សប្តាហ៍ ករណីមានបុគ្គលណាមានអាការៈសង្ស័យ ត្រូវសហការជាមួយក្រុមគ្រូពេទ្យដើម្បីយកសំណាកភ្លាម អាជីវករទាំងអស់ត្រូវរៀបចំតូបរបស់ខ្លួនឲ្យមានលក្ខណៈស្រឡះទូលាយមានខ្យល់ចេញចូលគ្រប់គ្រាន់ និងរៀបចំដាក់ឲ្យមានរបៀបរៀបរយ មានអាល់កុល ពាក់ម៉ាស់និងមិនអនុញ្ញាតឲ្យប្រមូលផ្ដុំគ្នាឡើយ។

ចំណែកអ្នកមកទិញឥវ៉ាន់ឬអតិថិជន ត្រូវតែតម្រង់ជួរដោយរក្សាគម្លាតឲ្យបាន១,៥ ម៉ែត្រពីគ្នាប្រសិនបើម្ចាស់តូបមិនអនុវត្តតាមការណែនាំនេះ ឬមិនធ្វើតាមការណែនាំរបស់គណៈគ្រប់គ្រងផ្សារម្ចាស់ផ្សារ ឬមន្ត្រីមានសមសមត្ថកិច្ចរកឃើញថា អាជីវករណាមិនធ្វើតាម មានហានិភ័យខ្ពស់ក្នុងការចម្លងមេរោគកូវីដ-១៩ នឹងត្រូវផ្អាកមិនឲ្យប្រកបអាជីវកម្មនៅក្នុងផ្សារនេះបន្តទៀតឡើយ ចំពោះអ្នកគ្រប់គ្រងផ្សារត្រូវទទួលខុសត្រូវនិងធានាបាននូវការអនុវត្តការណែនាំនេះឲ្យមានប្រសិទ្ធភាព៕

អត្ថបទ៖ វ៉ាន់ ណាង

Related Topics:កូវីដ-១៩