ពលរដ្ឋពីរឃុំ ក្នុងស្រុកម៉ាឡៃដែលបានជម្លៀសទៅទួលសុវត្ថិភាព វិលមកទីលំនៅវិញហើយ

យ៉ាងហោចណាស់ក៏មានពលរដ្ឋជាង ២០០ គ្រួសារ នៅ២ឃុំ ក្នុងស្រុកម៉ាឡៃ ខេត្តបន្ទាយមានជ័យ ត្រូវបានអាជ្ញាធរសម្រេចធ្វើការជម្លៀសចេញទៅកាន់ទីទួលសុវត្ថិភាពទាន់ពេលវេលា ដោយសារតែសន្ទុះជំនន់ទឹកភ្លៀងបុកខ្លាំងចូលដល់លំនៅដ្ឋានរបស់ពួកគាត់ ធ្វើឱ្យមានការលិចលង់ដល់ទ្រព្យសម្បត្តិមួយចំនួន។ ក្រោយពេលទឹកស្រក ពួកគាត់បានវិលមកលំនៅវិញហើយ។

លោក ស្វាយ ជា អភិបាលនៃគណៈអភិបាលស្រុកម៉ាឡៃ បានប្រាប់ឱ្យដឹងថានៅព្រឹកនេះថា ទាក់ទិននឹងការជួយសង្រ្គោះប្រជាពលរដ្ឋចំនួនពីរឃុំនោះ គឺពុំមានពលរដ្ឋណាម្នាក់បានបាត់បង់ជីវិតដោយសារតែជំនន់ទឹកភ្លៀងបុកចូលលំនៅដ្ឋានពួកគាត់នៅឡើយ។ លោកបានឱ្យដឹងទៀតថា ពលរដ្ឋរងគ្រោះភាគច្រើនគឺនៅតាមមាត់អូរព្រំដែនកម្ពុជាថៃ។

លោកអភិបាលស្រុកម៉ាឡៃ មានប្រសាសន៍ថា ពលរដ្ឋពីរឃុំនោះ រួមមានឃុំបឹងបេង និងឃុំម៉ាឡៃ។ លោកបានបន្តទៀតថា ឥឡូវនេះជំនន់ទឹកភ្លៀងដែលបុកមកខ្លាំងកាលពីល្ងាចថ្ងៃទី១នោះ បានស្រកទៅវិញហើយ ហើយពលរដ្ឋយើងក៏បានវិលចូលទៅកាន់លំនៅឋានរបស់ពួកគាត់វិញផងដែរ។

សូមបញ្ជាក់ដែរថា កាលពីល្ងាចថ្ងៃទី១ ខែកញ្ញា ឆ្នាំ២០២១ ត្រូវបានគេសង្កេតឃើញអាជ្ញាធរស្រុក ដឹកនាំដោយគណៈបញ្ជាការស្រុកម៉ាឡៃ ក្នុងខេត្តបន្ទាយមានជ័យ បានប្រមូលកម្លាំងទៅជួយសង្គ្រោះប្រជាពលរដ្ឋដែលរងនូវការលិចលង់ដោយសារជំនន់ទឹកភ្លៀងបុកខ្លាំង ហើយការជួយសង្គ្រោះពលរដ្ឋខាងលើត្រូវបានគេរាយការណ៍មកថា ពុំមានពលរដ្ឋណាម្នាក់បាត់បង់ជីវិតដោយសារជំនន់ទឹកភ្លៀងនោះទេ៕

អត្ថបទ៖ ពៅ រិ