នគរបាល បង្កឲ្យមានអំពើហិង្សាលើយុវតីម្នាក់ ត្រូវបានបញ្ជូនទៅតុលាការហើយ

នគរបាលម្នាក់ ដែលអនុវត្តច្បាប់ចរាចរណ៍ផ្លូវគោក សង្ស័យបង្កឲ្យមានអំពើហិង្សា នៅលើនារីម្នាក់ កាល​ពី​យប់ថ្ងៃ​ទី៨ ខែកញ្ញា ឆ្នាំ២០២១ ត្រូវមានសមត្ថកិច្ចជំនាញ បញ្ជូនខ្លួនទៅតុលាការហើយ នៅព្រឹកថ្ងៃសុក្រនេះ។

លោកវរសេនីយ៍ឯក សាន សុខសីហា ជំនួយការស្នងការ អ្នកនាំពាក្យ នៃស្នងការដ្ឋាននគរបាល រាជធានីភ្នំពេញ បានមានប្រសាសន៍​ប្រាប់​អ្នកសារ​ព័ត៌មានកម្ពុជាថ្មី នៅព្រឹកថ្ងៃទី១០ ខែកញ្ញានេះថា មន្ត្រីនគរបាល ដែលសង្ស័យ​អនុវត្ត​ច្បាប់ចរាចរណ៍ បង្កឲ្យមានអំពើហិង្សានោះ នៅតែអះអាងថា រូបខ្លួនគ្រាន់តែចេញលើកដៃ ដើម្បីរារាំងអ្នកមិន​អនុវត្ត​ច្បាប់​ចរាចរណ៍​ប៉ុណ្ណោះ ហើយនារីដែលរងគ្រោះ គឺរងរបួសដោយសារដួលប៉ុណ្ណោះ។ ចំណែកឯ ខាងនារីដែ​លរងរបួស នៅតែអះ​អាងថា សមត្ថកិច្ចរូបនោះ បានប្រើហិង្សាលើខ្លួន។ ដូច្នេះមិនមានការ សម្របសម្រួលត្រូវរ៉ូវគ្នា​នោះទេ។

លោកវរសេនីយ៍ឯក សាន សុខសីហា បានបញ្ជាក់បន្ថែមថា នៅព្រឹកនេះ សមត្ថកិច្ចជំនាញ បានបញ្ជូនមន្ត្រីន​គរ​បា​ល ដែលសង្ស័យបង្កឲ្យមានអំពើហិង្សានោះ ទៅតុលាការហើយ។ រីឯបុរសម្នាក់ និងនារីម្នាក់ ដែលបើក​បរល្មើស​ច្បាប់​ច​រាចរណ៍ មិនពាក់មួកសុវត្ថិភាព ហើយបើកគេចពីសមត្ថកិច្ចនោះ ក៏ត្រូវរងការពិន័យ ឬក៏អាច​​ត្រូវ​តុលាការ​ចោទ​ប្រកាន់​បានដែរ។

យ៉ាងណាក៏ដោយ អ្នកនាំពាក្យ នៃស្នងការដ្ឋាន នគរបាលរាជធានីភ្នំពេញ មិនអាចបញ្ជាក់អំពីចំណាត់កា​របែប​​ណានៅឡើយទេ​ ចំពោះមន្ត្រីនគរបាល ដែលសង្ស័យអនុវត្តច្បាប់ចរាចរណ៍ បង្កឲ្យមានអំពើហិង្សានោះ ព្រោះជា​សិទ្ធិ​​សម្រេច របស់តុលាការ។

សូមជម្រាបថា នៅយប់ថ្ងៃទី៨ ខែកញ្ញា ឆ្នាំ២០២១ មានហេតុការណ៍ ប៉ះទង្គិចរវាងនគរបាលម្នាក់ និងប្រជាពលរដ្ឋ មិនគោរពច្បាប់ចរាចរណ៍២នាក់​ ដោយក្នុងហេតុការណ៍នេះ បណ្តាលឲ្យនារីម្នាក់ រងរបួសបែកក្បាល​។ នារីរងគ្រោះ ដែលរងរបួស បែកក្បាលនោះ មានឈ្មោះ ងន ស្រីនិច អាយុ២២ឆ្នាំ ស្នាក់នៅបុរីលឹម ឈាង ហោចំការដូង។ ចំណែកឯសមត្ថកិច្ច ដែលសង្ស័យយកអាយកូម វាយចំក្បាលនារីរូបនោះ មានឈ្មោះ ម៉ាត់ ពិសី។

បើ​តាមសេច​ក្ដីរាយការណ៍ ពីកន្លែងកើតហេតុ បានឲ្យដឹងថា គេឃើញប្រុសស្រីមួយគូជិះម៉ូតូឌុបគ្នា​ ដោយមិនមានមួកសុវត្ថិភាព​ ហើយពេលជួបនគរបាល ដែលកំពុងត្រួតពិនិត្យអនុវត្តច្បាប់​ ក៏ព្យាយាមជិះគេច។ តែត្រូវបានគេអះ​អាង​ថា មន្ត្រីនគរបាល បានប្រើអាយកូម វាយសម្តៅបុរសជាអ្នកឌុប​ តែមិនត្រូវអ្នកឌុបទេ​ បែរជាត្រូវនារីខាងក្រោយទៅវិញ ដែលបង្កឲ្យ​មាន​ការភ្ញាក់ផ្អើលជាខ្លាំង។ តែទោះជាបែបនេះក្ដី មន្ត្រីនគរបាលរូបនេះ បានអះអាងថា រូបខ្លួនគ្រាន់តែចេញលើកដៃ ដើម្បីរារាំងអ្នក មិនអនុវត្តច្បាប់ចរាចរណ៍ប៉ុណ្ណោះ។ រីឯស្ត្រីដែលរងរបួស នៅតែអះអាងថា សមត្ថកិច្ចរូបនោះ បានប្រើហិង្សាលើខ្លួន៕

អត្ថបទ៖ ឃួន សុភ័ក្រ