ព័ត៌មានជាតិ

មន្ដ្រីនគរបាលទាំងអស់ ត្រូវបម្រើពលរដ្ឋ ដោយវិជ្ជាជីវៈនិងសុជីវធម៌

បានផុស

៥ years មុន

នៅ

ថ្ងៃសុក្រ ២២ មករា ២០២១

ដោយ

លោក ស សុខា រដ្ឋលេខាធិការក្រសួងអប់រំយុវជននិងកីឡា បានផ្តាំផ្ញើដល់សិស្សនគរបាលជយលាភីក្នុងវគ្គទាំងអស់ ត្រូវយកចំណេះដឹងជំនាញ ដែលបានពីការហ្វឹកហាត់សិក្សារៀនសូត្រកន្លងមកដោយវិជ្ជាជីវៈសមជាមន្ត្រីនគរបាល។

ការថ្លែងបែបនេះ នៅខណៈដែលលោកបានចូលរួមជាគណៈអធិបតីក្នុងពិធីបិទវគ្គបណ្តុះបណ្តាលកម្រិតបឋមវិជ្ជាជីវៈនគរបាលជំនាន់ទី១៤ ចំនួន២៣៨នាក់ នៅឯសាលានគរបាលភូមិភាគ៥ ខេត្តបាត់ដំបង កាលពីថ្ងៃទី២០ ខែមករា ឆ្នាំ២០២១។

លោក ស សុខា បន្តការលើកឡើងថា ក្រោយបញ្ចប់កម្មសិក្សាហើយត្រូវបានចូលបំពេញការងារនៅតាមអង្គភាពឬមូលដ្ឋានកម្លាំងនគរបាលក្នុងក្របខ័ណ្ឌថ្មីទាំងអស់ ត្រូវប្រតិបត្តិតាមតួនាទីភារកិច្ចឲ្យបានម៉ឺងម៉ាត់ ដែលរដ្ឋាភិបាលប្រគល់ជូនជៀសវាងប្រព្រឹត្តអំពើខុសឆ្គងអាងបក្សពួកខុសពីតួនាទីស្នូលជាមន្ត្រីបម្រើប្រជាពលរដ្ឋបម្រើសង្គមជាតិ។ លោកបន្តថា សិស្សនគរបាលជំនាន់ថ្មីទាំងអស់ ត្រូវអនុវត្តការងារដោយផ្អែកលើផែនការយុទ្ធសាស្ត្រតាមបទបញ្ញត្តិកម្មវិធីកំណែទម្រង់ប្រកាន់ខ្ជាប់នូវគុណតម្លៃទាំង៦ចំណុចរបស់ខ្លួន គឺវិន័យគុណភាពក្រមសីលធម៌វិជ្ជាជីវៈការទទួលខុសត្រូវការប្តេជ្ញាចិត្តនិងនវានុវត្តន៍។

លោកបន្តថា តាមរយៈការបណ្តុះធនធានមនុស្សនាពេលនេះ នឹងទាំងពេលកន្លងទៅបានប្រែក្លាយសង្គមជាតិយើងពីបាតដៃទទេមកមានអ្វីៗគ្រប់យ៉ាង ហើយក៏ជាឆ្អឹងខ្នងដ៏សំខាន់របស់ប្រទេសចូលរួមជាមួយរាជរដ្ឋាភិបាល ក្នុងការអភិវឌ្ឍន៍លើគ្រប់វិស័យ ផងដែរ ខណៈបច្ចុប្បន្នរាជរដ្ឋាភិបាលខិតខំបង្កើតឲ្យមានអគារសាកលវិទ្យាល័យជាច្រើនជាថ្នាលបណ្តុះធនធានមនុស្ស ប្រកបដោយគុណភាពក្រោមការដឹកនាំដ៏ឈ្លាសវៃបំផុតរបស់សម្តេចអគ្គមហាសេនាបតីតេជោហ៊ុន សែន៕

អត្ថបទ៖ សៅ សារិទ្ធ