ពលរដ្ឋខ្មែរ២០ គ្រួសារ នៅ​វៀតណាម​ ទទួល​បាន​ជំនួយ​គ្រឿងឧបភោគបរិភោគ​​​សង្រ្គោះ​បន្ទាន់

ស្ថានអគ្គកុងស៊ុលកម្ពុជា ប្រចាំនៅទីក្រុងហូជីមិញ ប្រទេសវៀតណាម កាលពីល្ងាចថ្ងៃទី១៣ ខែកញ្ញា ឆ្នាំ​២០២១ បានរៀបចំជំនួយជាគ្រឿងឧបភោគបរិភោគ ទៅចែកជូនពលរដ្ឋកម្ពុជា ចំនួន២០​គ្រួសារ ប្រមាណ៤៥ នាក់ នៅខណ្ឌចំនួន២ នៅក្រុងហូជីមិញ ដែលប្រកបរបរជាកម្មករសំណង់ និងខ្លះបាត់បង់​​ការងារ ដោយសារវិបត្តិកូវីដ-១៩ និងវិធានការបិទខ្ទប់របស់ក្រុង របស់អាជ្ញាធរវៀតណាម។ នេះបើតាមអ្នកនាំពាក្យ។

លោក កុយ គួង អ្នកនាំពាក្យក្រសួងការបរទេស និងសហប្រតិបត្តិការអន្តរជាតិកម្ពុជាបានឲ្យដឹងថា ជំនួយរបស់ស្ថានអគ្គកុងស៊ុលកម្ពុជានោះ ក្នុងមួយគ្រួសារទទួលបានអង្ករ១0 kg, មីមួយកេស, ទឹកត្រី១ ដប ទឹកស៊ីអ៊ីវ១ ដប, ស្ករស១ kg, ប្រេងឆា ១ដប, ត្រីខ ៥កំប៉ុង, ទឹកដោះគោ ១0កញ្ចប់, សាប៊ូកក់សក់ ១២កញ្ចប់, និងបន្លែត្រកួន៣ kg៕

អត្ថបទ៖ កោះកែវ