ព័ត៌មានជាតិ

ស្ថានអគ្គកុងស៊ុលកម្ពុជា ប្រចាំទីក្រុងណាននីង ជួយសង្គ្រោះស្ត្រីខ្មែរ៤នាក់

បានផុស

៤ years មុន

នៅ

ថ្ងៃចន្ទ ១៨ តុលា ២០២១

ដោយ

លោក កុយ គួង អ្នកនាំពាក្យក្រសួងការបរទេស និងសហប្រតិបត្តិការអន្តរជាតិកម្ពុជាបានឲ្យដឹងថា ស្ត្រីខ្មែរចំនួន៤នាក់ ដែលទៅរស់នៅក្នុងប្រទេសចិន ដោយខុសច្បាប់ ត្រូវបានស្ថានអគ្គកុងស៊ុលកម្ពុជាប្រចាំទីក្រុងណាននីង សហការអន្តរាគមន៍ជាមួយអាជ្ញាធរចិន ឲ្យត្រឡប់មាតុប្រទេសវិញនៅពេលឆាប់ៗខាងមុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក កុយ គួង បញ្ជាក់យ៉ាងដូច្នេះថា “ស្ថានអគ្គកុងស៊លកម្ពុជាប្រចាំទីក្រុងណាននីង ប្រទេសចិន បានសហការអន្តរាគមន៍ជាមួយអាជ្ញាធរចិន ជួយសង្គ្រោះស្ត្រីខ្មែរចំនួន៤នាក់ និងទារកម្នាក់ ដែលមករស់នៅក្នុងប្រទេសចិនដោយខុសច្បាប់ ឲ្យវិលត្រឡប់មាតុប្រទេសវិញ តាមជើងយន្តហោះ CZ8313 ថ្ងៃទី២៥ ខែតុលា ឆ្នាំ២០២១ វេលាម៉ោង១០និង២៥ នាទីព្រឹក នៅព្រលានយន្តហោះភ្នំពេញ”។

គួររំលឹកថា ថ្មីៗនេះស្ថានអគ្គកុងស៊ុលកម្ពុជានៅទីក្រុងក្វាងចូវ ប្រទេសចិន បានជួយដំណោះស្រាយស្ត្រី២នាក់ ដែលមានបញ្ហាជាមួយគ្រួសារ ហើយមិនចង់បន្តរស់នៅជាមួយប្តីជនជាតិចិន ដើម្បីបានត្រឡប់មកប្រទេសកម្ពុជាវិញផងដែរ ប៉ុន្តែករណីនេះ ត្រូវការពេលវេលា ដើម្បីរៀបចំតាមនីតិវិធីច្បាប់របស់ប្រទេសចិន។ ពីព្រោះតាមច្បាប់ប្រទេសចិន ត្រូវធ្វើការលែងលះ លុបសៀវភៅអាពាហ៍ពិពាហ៍ហើយសិន ទើបអាចត្រឡប់មកស្រុកវិញបាន។

ស្ត្រីខ្មែរ២នាក់នោះ រួមមានទី១, មានឈ្មោះថា ឈឺន សុផៃ ទីកន្លែងកំណើតនៅភូមិកសិកម្ម ឃុំបុសខ្នុរ ស្រុកចំការលើ ខេត្តកំពង់ចាម ចំណែកស្ត្រីទី២, មានឈ្មោះថា លីន សាវ៉ន ទីកន្លែងកំណើតភូមិម៉ាសែន ឃុំប៉ាហាល ស្រុកត្បែង ខេត្តព្រះវិហារ ពួកគេបានសុំអន្តរាគមន៍ឲ្យជួយពួកគេត្រឡប់មកស្រុកកំណើតវិញ ដោយសារការធ្វើបាបពីសំណាក់ប្តីជនជាតិចិន៕

អត្ថបទ៖ កោះកែវ