ព័ត៌មានជាតិ

ឯកអគ្គរាជទូតថាការបន្លំយកជនជាតិម៉ុងតាញ៉ាមកបាតុកម្មមុខទូតខ្មែរជាសកម្មភាពមិនថ្លៃថ្នូរ

បានផុស

១ year មុន

នៅ

ថ្ងៃអង្គារ ១៣ ឧសភា ២០២៥

ដោយ

ឯកអគ្គរាជទូតកម្ពុជាប្រចាំសហរដ្ឋអាមេរិកលោក កុយ គួង ថាមានមនុស្សប្រមាណ៨០នាក់បានធ្វើបាតុកម្មមុខទូតកម្ពុជាប្រចាំសហរដ្ឋអាមេរិកកាលពីថ្ងៃទី១០ ខែឧសភា តែក្នុងនោះមានប្រមាណ៨០ភាគរយគឺជាជនជាតិម៉ុងតាញ៉ាមិនមែនជនជាតិខ្មែរទេ។ លោកយល់ថាការយកជនជាតិផ្សេងមកតវ៉ាមុខស្ថានទូតរបស់ខ្លួនគឺជាបាតុកម្មមិនថ្លៃថ្នូរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក កុយ គួង បានឱ្យកម្ពុជាថ្មីដឹងនៅថ្ងៃទី១៣ ខែឧសភា ឆ្នាំ២០២៥នេះថា ក្រុមបាតុករបានធ្វើបាតុកម្មនៅរសៀលថ្ងៃទី១០ ខែឧសភា ដោយមានតែខ្មែរពិតប្រាកដប្រមាណតែ២០នាក់ប៉ុណ្ណោះ ក្រៅពីនោះ៦០នាក់ផ្សេងទៀតគឺជាជនជាតិម៉ុងតាញ៉ាព្រមទាំងកាន់ទង់ជាតិម៉ុងតាញ៉ាថែមទៀតផង។

លោកថា៖ «បាតុកម្មនេះ មិនមានលក្ខណៈថ្លៃថ្នូទាល់សោះ ព្រោះយកជនជាតិម៉ុងតាញ៉ាចំនួន៨០% មកបន្លំធ្វើជាខ្មែរ ដើម្បីអោយឃើញខ្មែរចូលរួមច្រើន»។

ក្នុងរូបភាពដែលបង្ហោះលើបណ្ដាញសង្គមពីបាតុកម្មកាលពីថ្ងៃទី១០ ខែឧសភានោះឱ្យឃើញពីការលើកបដានិងទង់ជាតិដោយក្នុងនោះមានទង់ជាតិអាមេរិក កម្ពុជា ហើយទង់ជាតិម៉ុងតាញ៉ាគេឃើញមានច្រើនជាងគេក្នុងពេលបាតុកម្មនោះ។

លោកបានឱ្យដឹងបន្ថែមថា បាតុករមិនបានដាក់ញត្តិជាផ្លូវការទាមទារអ្វីនោះទេ ក្រៅពីស្រែកនៅក្រៅស្ថានទូតឱ្យរដ្ឋាភិបាលកម្ពុជាដោះលែងអ្នកជាប់ទោសមួយចំនួន ស្ដារប្រជាធិបតេយ្យ យកករណីកោះគុតទៅតុលាការអន្តរជាតិ ព្រមជេរប្រមាទថ្នាក់ដឹកនាំជាដើម។ លោកយល់ថា ការធ្វើបាតុកម្មដដែលៗនេះគឺគ្រាន់តែដើម្បី ចិញ្ចឹមចលនាប្រឆាំងរបស់ពួកគេប៉ុណ្ណោះ៕