លោក កុយ គួង ទូតថ្មីកម្ពុជានៅអាមេរិក ក្នុងរដ្ឋបាលលោក ត្រាំ ជានរណា?

នៅខែមករា ឆ្នាំ២០២៥ខាងមុខ សហរដ្ឋអាមេរិកនឹងផ្លាស់ប្ដូរប្រធានាធិបតីថ្មីជាផ្លូវការ ពោល​គឺលោក ដូណាល់ ត្រាំ នឹងចូលកាន់តំណែងជាប្រធានាធិបតីទី៤៧ របស់សហរដ្ឋអាមេរិក ជំនួសប្រធានាធិបតី ចូ បៃដិន។ ស្របពេលអាមេរិក នឹងដឹកនាំដោយរដ្ឋបាលថ្មីរបស់លោក ត្រាំ កម្ពុជា ក៏បានត្រៀមផ្លាស់ប្ដូរតំណាងរបស់ខ្លួនប្រចាំនៅសហរដ្ឋអាមេរិកដែរ។

ស្ថិតក្នុងតួនាទីជាឯកអគ្គរាជទូតកម្ពុជាប្រចាំប្រទេសឥណ្ឌា លោក កុយ គួង ត្រូវបានប្រមុខរាជរដ្ឋាភិបាល សម្ដេចធិបតី ហ៊ុន ម៉ាណែត បានផ្តល់សេចក្តីទុកចិត្តតែងតាំងជាឯកអគ្គរាជថ្មីរបស់កម្ពុជាប្រចាំសហរដ្ឋអាមេរិក។ តើលោក កុយ គួង មានបទពិសោធយ៉ាងណាលើកិច្ចការទូត ទើបត្រូវបានប្រមុខដឹកនាំជ្រើសឱ្យធ្វើជាតំណាងកម្ពុជាប្រចាំនៅប្រទេសកំពូលមហាអំណាចមួយនេះ?

លោក កុយ គួង គឺជាមន្ត្រីការទូតជាន់ខ្ពស់របស់កម្ពុជា ដែលបាននិងកំពុងបំពេញកិច្ចការក្នុងវិស័យការទូត និងសហប្រតិបត្តិការអន្តរជាតិយ៉ាងសកម្មប្រកបដោយភាពប៉ិនប្រសប់ បទពិសោធ និងចំណេះដឹង ពិសេសលោក បានបំពេញតួនាទីជាឯកអគ្គរាជទូតតំណាងឱ្យកម្ពុជានៅប្រទេសជាមិត្តជាច្រើន ទាំងប្រទេសតូចប្រទេសធំ ព្រមទាំងប្រទេសមហាអំណាច។

មុនទទួលបានការចាត់តាំងឱ្យទៅបំពេញបេសកកម្មនៅមហាអំណាចសហរដ្ឋអាមេរិក លោក កុយ គួង ជាឯកអគ្គរាជទូតកម្ពុជាប្រចាំប្រទេសឥណ្ឌា បង់ក្លាដេស ស្រីលង្កា អ៊ីរ៉ង់ នេប៉ាល់ និងម៉ាលឌីវ ដែលមាននិវេសដ្ឋាននៅទីក្រុងញូដេលី។ បំពេញការងារការទូតរយៈពេលជាង១ឆ្នាំកន្លះ នៅឥណ្ឌា លោក កុយ គួង សម្រេចបានលទ្ធផលការងារក្នុងអំឡុងពេលបេសកកម្មការទូតជាច្រើន ជាអាទិ៍ រួមចំណែកឱ្យមានព្រះរាជទស្សនកិច្ចផ្លូវរដ្ឋរបស់ព្រះករុណាព្រះមហាក្សត្រកម្ពុជា នៅប្រទេសឥណ្ឌា ជំរុញឱ្យមានជើងហោះហើរត្រង់រវាងកម្ពុជា និងឥណ្ឌា រៀបចំឆ្នាំទេសចរណ៍កម្ពុជា-ឥណ្ឌា លើកទី១ ឆ្នាំ២០២៤ និងបានផ្តល់ដំណោះស្រាយជូនពលរដ្ឋខ្មែរ ដែលមកទទួលសេវាសុខាភិបាល ហើយរងគ្រោះពីភាពមិនប្រក្រតីនៅប្រទេសឥណ្ឌា បានវិលត្រឡប់មកកម្ពុជាវិញ ដោយសុវត្ថិភាព។

ឯកអគ្គរាជទូត កុយ គួង ក៏បានបង្កើតស្ថានកុងស៊ុលកិត្តិយសកម្ពុជាប្រចាំប្រទេសស្រីលង្កា ដើម្បីលើកកម្ពស់កិច្ចសហប្រតិបត្តិការកម្ពុជា និងស្រីលង្កា និងផ្តល់សេវាកុងស៊ុលចាំបាច់ដល់ពលរដ្ឋខ្នែរ ដែលមានវត្តមានក្នុងប្រទេសនេះ ហើយលោក ក៏ជាឯកអគ្គរាជទូតកម្ពុជាទីមួយ ប្រចាំប្រទេសម៉ាល់ឌីវ។

មិនត្រឹមជាឯកអគ្គរាជទូតឥណ្ឌា លោក កុយ គួង ក៏ធ្លាប់ទៅបំពេញបេសកកម្មជាឯកអគ្គរាជទូតនៅប្រទេសអូស្ត្រាលី និងតំណែងជាអនុរដ្ឋលេខាធិការ រដ្ឋលេខាធិការ និងជាអ្នកនាំពាក្យក្រសួងការបរទេស តាំងពីអាណត្តិអតីតប្រមុខការបរទេស លោក ហោ ណាំហុង និងលោក ប្រាក់ សុខុន។

មែនទែនទៅ មុនឈានជើងចូលវិស័យការបរទេស លោក កុយ គួង បានផ្ដើមបម្រើការដំបូងជាមន្ត្រីរាជការនៅក្រសួងកសិកម្ម រុក្ខាប្រមាញ់ និងនេសាទ ប៉ុន្តែបានប្រមាណជិត១ឆ្នាំប៉ុណ្ណោះ លោកបានផ្លាស់ទៅបម្រើការងារនៅអគ្គលេខាធិការដ្ឋានព្រឹទ្ធសភាវិញ ដែលក្នុងនោះ លោកត្រូវបានតែងតាំងជាប្រធានការិយាល័យច្បាប់ព្រហ្មទណ្ឌ និងរដ្ឋប្បវេណីនៃអគ្គលេខាធិការដ្ឋានព្រឹទ្ធសភា។

ចំពោះកម្រិតវប្បធម៌ លោក កុយ គួង បានបញ្ចប់ការសិក្សាថ្នាក់បរិញ្ញាបត្រជាន់ខ្ពស់ នៃសាកលវិទ្យាល័យជាតិអូស្រ្តាលី ផ្នែករដ្ឋបាលអភិវឌ្ឍន៍ និងជាអតីតនិស្សិតថ្នាក់បរិញ្ញាបត្រច្បាប់ នៃសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច។ ក្រៅពីភាសាខ្មែរ ដែលជាភាសាកំណើត​ លោក កុយ គួង​ ចេះភាសាអង់គ្លេស និងបារាំង​៕

អត្ថបទ៖ ធឿន​ វ៉ាន់សុង