ប្រមុខរាជរដ្ឋាភិបាល អនុញ្ញាតឲ្យពលរដ្ឋធ្វើដំណើរកម្សាន្ដ តាម រម្មណីដ្ឋាននានា ឱកាសឈប់ សម្រាក​ថ្ងៃបុណ្យភ្ជុំបិណ្ឌ

សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បាន​ប្រ​កាស​អនុញ្ញាតឲ្យប្រជាពលរដ្ឋអាចដើរកម្សាន្ដនៅតាមរម្មណីយដ្ឋាន តាមបណ្ដាខេត្តនានា​ក្នុង​ឱកាស​ថ្ងៃ​ឈប់​សម្រាក​បុណ្យភ្ជុំបិណ្ឌខាងមុចនេះ តែត្រូវអនុវត្តវិធានការណ៍របស់ក្រសួងសុខាភិបាល។

ថ្លែងក្នុងសារពិសេសជូនជនរួមជាតិពាក់ព័ន្ធស្ថានភាពជំងឺកូវីដ-១៩ នៅព្រឹកថ្ងៃ​ទី ២៥ ខែកញ្ញានេះ សម្ដេចតេជោ ក៏បានបញ្ជាក់ពីការឈប់សម្រាកចំនួន ៣ ថ្ងៃរបស់មន្ត្រីរាជការ បុគ្គលិក​ក្រុម​ហ៊ុន និង​កម្មករកម្មការិនីរោងចក្រ ដែលត្រូវបានការ​អនុញ្ញាត​ឲ្យឈប់សម្រាក​ដោយមិន​មានការហាមឃាត់​និងកាត់​ប្រាក់បៀវត្សរ៍​នោះទេ។

សម្ដេចតេជោ បានបញ្ជាក់ថា “បងប្អូនអាចធ្វើដំណើរដើរលេងទៅតាមទីកន្លែងនានា ដោយមានវិធាន​ការណ៍សុខាភិបាលទៅជាមួយ នោះក៏ជាវីធីមួយដើម្បីបើក​ឱកាស​ឲ្យបងប្អូន​បានសម្រាកក្នុងរយៈ​កាល​នៃការភ្ជុំបិណ្ឌនេះ”។

ជាមួយគ្នានេះ សម្ដេចតេជោក៏បានលើកទឹកចិត្តបងប្អូនប្រជាពលរដ្ឋ ឲ្យទៅកម្សាន្ដនៅតាមតំបន់​ទេសចរណ៍ធម្មជាតិ​ តំបន់ទេសចរណ៍តាមសហគមន៍ ដែលមានការរៀបចំបានល្អដើម្បីឲ្យ​ប្រជា​ពល​រដ្ឋបាន​ស្គាល់​ប្រទេសខ្លួនឯង បានស្គាល់នូវរម្មណីយដ្ឋានទេសចរណ៍ធម្មជាតិរបស់យើង៕

អត្ថបទ៖ សុខុម