អង្គការសហប្រជាជាតិសន្យាជួយជ្រោមជ្រែងឱ្យកម្ពុជាក្លាយជាប្រទេសមានចំណូលមធ្យមកម្រិតខ្ពស់ នៅឆ្នាំ២០៣០

អង្គការសហប្រជាជាតិបានសន្យាថា នឹងជួយជ្រោមជ្រែងដល់កម្ពុជា ដើម្បីសម្រេចបាននូវគោលដៅក្លាយជាប្រទេសមានចំណូលមធ្យមកម្រិតខ្ពស់ នៅឆ្នាំ២០៣០ ដែលការសន្យានេះ គឺបានធ្វើឡើងដោយអ្នកសម្របសម្រួលអង្គការសហប្រជាជាតិ ទើបតែងតាំងថ្មីប្រចាំនៅកម្ពុជា លោក​ស្រី វ្លាដាំងកា អាន់ឌ្រេវ៉ា (Vladanka Andreeva)។

ក្នុងជំនួបជាមួយសម្តេចតេជោ ហ៊ុន សែន ប្រមុខរដ្ឋស្តីទីកម្ពុជា នាព្រឹកថ្ងៃទី៣០ មេសា ឆ្នាំ២០២៦ លោកស្រី វ្លាដាំងកា អាន់ឌ្រេវ៉ា បានគូសបញ្ជាក់ពីទំនាក់ទំនងដ៏យូរអង្វែង និងរឹងមាំជាមួយគ្នារវាងកម្ពុជា និងអង្គការសហប្រជាជាតិ នាពេលកន្លងមក ហើយលោកស្រីបានអះអាងពីការរង់ចាំជួយជ្រោមជ្រែងឱ្យកម្ពុជាក្លាយជាប្រទេសមានចំណូលមធ្យមកម្រិតខ្ពស់ នៅឆ្នាំ២០៣០។

កម្ពុជាមានចក្ខុវិស័យយុទ្ធសាស្ត្រប្រែក្លាយខ្លួនជាប្រទេសមានចំណូលមធ្យមកម្រិតខ្ពស់ នៅឆ្នាំ២០៣០ តាមរយៈការជំរុញកំណើនសេដ្ឋកិច្ច ការអភិវឌ្ឍមូលធនមនុស្ស និងការធ្វើពិពិធកម្មសេដ្ឋកិច្ច។ គោលដៅនេះ រួមបញ្ចូលទាំងការចាកចេញពីឋានៈប្រទេសអភិវឌ្ឍន៍តិចតួច នៅឆ្នាំ២០២៧ និងពង្រឹងផលិតភាពសេដ្ឋកិច្ចដើម្បីឈានទៅជាប្រទេសចំណូលខ្ពស់ នៅឆ្នាំ២០៥០។

សម្ដេចតេជោ បានបង្ហាញក្ដីសង្ឃឹមថា វត្តមានរបស់លោកស្រីអ្នកសម្របសម្រួលអង្គការសហប្រជាជាតិប្រចាំនៅកម្ពុជា នឹងញ៉ាំងនូវកិច្ចសហប្រតិបត្តិការ និងទំនាក់ទំនងរវាងកម្ពុជា និងអង្គការសហប្រជាជាតិឱ្យកាន់តែរីកចម្រើនរឹងមាំបន្ថែមទៀត។ សម្ដេចតេជោ ក៏អរគុណចំពោះអង្គការសហប្រជាជាតិដែលបានចូលរួមចំណែកជួយដល់ប្រទេសកម្ពុជានាពេលកន្លងមក។

ក្នុងជំនួបនោះ សម្ដេចតេជោ និងលោកស្រី វ្លាដាំងកា អាន់ឌ្រេវ៉ា ក៏បានពិភាក្សាទៅលើបញ្ហាប្រឈមជាសកល​នាពេលបច្ចុប្បន្ននេះ រួមមានបញ្ហាសន្តិសុខថាមពល តាមរយៈការហក់ឡើងនៃតម្លៃប្រេង និងការបម្រែបម្រួលអាកាសធាតុ៕