នៅភ្នំពេញ រាល់ពេលចេញ-ចូល គ្រឹះស្ថានសិក្សា ផ្សារ និងទីតាំងអាជីវកម្ម ត្រូវបង្ហាញបណ្ណចាក់វ៉ាក់សាំងកូវីដ-១៩

រដ្ឋបាលរាជធានីភ្នំពេញ បានចេញសេចក្ដីណែនាំ ស្ដីពី ការបង្ហាញបណ្ណចាក់វ៉ាក់សាំងកូវីដ-១៩ ឬបណ្ណចាក់វ៉ាក់សាំ​ងបង្ការជំងឺកូវីដ-១៩ ឬលិខិតបញ្ជាក់ការចាក់វ៉ាក់សាំងបង្ការជំងឺកូវីដ-១៩ រាល់ពេលចេញ-ចូលគ្រឹះស្ថានសិក្សា ផ្សារ និង​ទីតាំងអាជីវកម្មដ្ឋាននានា ក្នុងរាជធានីភ្នំពេញ។

សេចក្ដីណែនាំចុះថ្ងៃទី៥ ខែតុលា បានលើកឡើងថា ក្រោមការដឹកនាំប្រកបដោយភាពឈ្លាសវៃ ប៉ិនប្រសប់ និងគតិ​បណ្ឌិត របស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ការអនុវត្តគោលនយោបាយជាតិ ចាក់វ៉ាក់សាំង​បង្ការ​​​ជំ​ងឺកូវីដ-១៩ ក្នុងក្របខណ្ឌទូទាំងប្រទេស សម្រេចបានលទ្ធផលល្អប្រសើរ។

ក្នុងនោះរាជធានីភ្នំពេញ ត្រូវបាន​គេទទួលស្គាល់ថា ជាទីក្រុងដែលបានចាក់វ៉ាក់ស្រោចវ៉ាក់សាំងបង្ការជំងឺកូវីដ-១៩ ជូន​ដល់ប្រជាពលរដ្ឋច្រើនជាងគេក្នុងពិភពលោក ដែលមានអត្រាគ្របដណ្ដប់ស្ទើរតែ ១០០ភាគរយ ទាំងការចាក់ជូ​នប្រជាពលរដ្ឋ ដែលមានអាយុពី ១៨ឆ្នាំឡើងទៅ និងកុមារ-យុវជន ដែលមានអាយុចាប់ពី ៦ឆ្នាំ ដល់ក្រោមអាយុ ១៨ឆ្នាំ គូបផ្សំជាមួយការដាក់ចេញនូវយុទ្ធសាស្ត្រគន្លឹះ និងវិធានការនានាដ៏មានប្រសិទ្ធភាព របស់រាជរដ្ឋាភិបាល ធ្វើឲ្យការគ្រប់គ្រងស្ថានភាពរីករាលដាល នៃជំងឺកូវីដ-១៩ នៅរាជធានីភ្នំពេញ កំពុងឈានទៅរកភាពល្អ ប្រសើរ​ឡើង។

ក្នុងន័យនេះ ដើម្បីបង្កើនប្រសិទ្ធភាពឲ្យកាន់តែប្រសើរឡើង នូវការគ្រប់គ្រងការរីករាលដាល នៃជំងឺកូវីដ-១៩ សំដៅ​បង្កើតឲ្យបាន “ភាពស៊ាំសហគមន៍រឹងមាំពិតប្រាកដមួយ ទប់ទល់នឹងជំងឺរាតត្បាតសកលកូវីដ-១៩” ជាពិសេសមេរោគបំប្លែងថ្មី ប្រភេទដែលតា ក៏ដូចជាដើម្បីត្រៀមលក្ខណៈសម្រាប់ការរស់នៅ ជាមួយជំងឺកូវីដ-១៩ តាមគន្លង​ប្រ​ក្រ​តីភាពថ្មី ឈានទៅរកការបើកដំណើរការឡើងវិញ លើគ្រប់វិស័យនាពេលឆាប់ៗខាងមុខនេះ រដ្ឋបាល​រាជធានី​ភ្នំពេ​ញ សូមធ្វើការណែនាំបន្ថែម ដល់ប្រជាពលរដ្ឋ គណៈគ្រប់គ្រងគ្រឹះស្ថានសិក្សា គណៈកម្មការផ្សារ ម្ចាស់អាជីវកម្ម​ដ្ឋាន ម្ចាស់ទីតាំង អាជីវករ វិស័យឯកជន និងសាធារណជនទាំងអស់ ត្រូវមានកាតព្វកិច្ច បង្ហាញបណ្ណចាក់​វ៉ាក់​សាំងកូវីដ-១៩ ឬបណ្ណចាក់វ៉ាក់សាំងបង្ការជំងឺកូវីដ-១៩ ឬលិខិតបញ្ជាក់ការចាក់វ៉ាក់សាំងបង្ការជំងឺកូវីដ-១៩ រាល់ពេលចេញ-ចូលគ្រឹះស្ថានសិក្សា ផ្សារ និងទីតាំងអាជីវកម្មដ្ឋាននានា ក្នុងរាជធានីភ្នំពេញ៕

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត