លោក ឌុច សុន៖ រយៈពេល២៤ថ្ងៃ មានប្រជាពលរដ្ឋជាង២៦ម៉ឺននាក់ បានទៅចុះឈ្មោះថ្មី

​លោក ឌុ​ច សុន សមាជិក គ​.​ជ​.​ប បាន​ឲ្យ​ដឹងថា ការពិនិត្យបញ្ជីឈ្មោះ និងការចុះឈ្មោះ បោះឆ្នោត ចាប់ផ្តើមពីថ្ងៃទី១២ ខែតុលា ឆ្នាំ២០២១ ហើយរហូតមកដល់ពេលនេះ មានប្រជាពលរដ្ឋ​បានមក​ចុះឈ្មោះ​បោះឆ្នោត​ថ្មី​សរុប​ចំនួន២៦២,៥៨៥ នាក់ ហើយ​អ្នក​ដែល​នឹងត្រូវ​លុបឈ្មោះ​ចេញពី​បញ្ជី​បោះឆ្នោត​មាន​ចំនួន​១២៩,១៩៨ នាក់​។ ចំណែក​អ្នក​ដែល​បានកែតម្រូវ​ទិន្នន័យ​មាន​ចំនួន​៩១,៨៩៣ នាក់ ហើយ​អ្នក​ដែល​បាន​ផ្ទេរ​ទីលំនៅ​ចូលក្នុង​ឃុំ សង្កាត់​ថ្មី​មាន​ចំនួន​៧៨,១៥៩ នាក់​។​

​ការបញ្ជាក់​របស់លោក ឌុ​ច សុន បាន​ធ្វើឡើង​នៅក្នុង​កិច្ចប្រជុំ​ផ្សព្វផ្សាយ​ជាមួយ​ភាគី​ពាក់ព័ន្ធ​តាម​ប្រព័ន្ធ​វីដេអូ​អន​ឡាញ កាលពី​ថ្ងៃ​សុក្រ ទី​០៥ ខែវិច្ឆិកា ឆ្នាំ​២០២១​ម្សិលមិញ​។ លោក​ថា ដំណើរការ​ទូទៅ​នៃ​ការពិនិត្យ​បញ្ជី​ឈ្មោះ និង​ការចុះឈ្មោះ បោះឆ្នោត​បាន​ប្រព្រឹត្ត​ទៅក្នុង​បរិយាកាស​មាន​សន្តិសុខ សុវត្ថិភាព សណ្តាប់ធ្នាប់​សាធារណៈ​ល្អ​។​

​ទោះជា​យ៉ាងណា​ដំណើការ​នេះ បាន​ជួប​បញ្ហា​ប្រឈម​មួយចំនួន​ដូចជា​៖ សាលាឃុំ សង្កាត់​ខ្លះ​ទទួលរង​គ្រោះ ដោយសារ​ទឹកជំនន់ ដែល​ត្រូវ​ប្តូរ​ការិយាល័យ​ទៅ​ទីតាំង​មាន​សុវត្ថិភាព​, ក្រុម​ចុះឈ្មោះ​មួយចំនួន​ពិបាក​ក្នុងការ​ចល័ត​ការិយាល័យ​ទៅតាម​ភូមិ ដោយសារ​ភ្លៀង​ធ្លាក់​ច្រើន​,​សម្ភារ បរិក្ខារ មួយចំនួន ខូច គាំង ឬ​ដំណើរការ​រអាក់រអួល​, តំបន់​ខ្លះ​មាន​បញ្ហា​រអាក់រអួល​ផ្នែក​ប្រព័ន្ធ​អ៊ី​ន​ធើ​ណេត និង​ប្រជាពលរដ្ឋ​មួយចំនួន​ត្រូវ​ជាប់​ច​ត្តា​ឡី​ស័ក និង​ត្រូវ​សម្រាក​ព្យាបាល​ជំងឺ​កូ​វីដ​-១៩​។​

​បើតាម​លោក ឌុ​ច សុន ការពិនិត្យ​បញ្ជី​ឈ្មោះ និង​ការចុះឈ្មោះ​បោះឆ្នោត គឺ​ដើម្បី​ធ្វើ​បច្ចុប្បន្នភាព​បញ្ជី​បោះឆ្នោត ដោយ​ធ្វើការ​ចុះឈ្មោះ​បោះឆ្នោត ចំពោះ​អ្នក​ដែល​គ្រប់​អាយុ អ្នក​ដែល​មិនទាន់​ចុះឈ្មោះ​បោះឆ្នោត​ពីមុន និង​អ្នក​ដែល​បាន​ផ្លាស់​លំនៅឋាន ឬ​ទី​សំណាក់​ចូលក្នុង​ឃុំ សង្កាត់​ថ្មី ការកែតម្រូវ​ឈ្មោះ និង​ទិន្នន័យ​ក្នុង​បញ្ជី​បោះឆ្នោត និង​ការ​លុបឈ្មោះ​អ្នកបោះឆ្នោត​ចេញពី​បញ្ជី​បោះឆ្នោត​៕

អត្ថបទ៖ កោះ​កែវ​