ភ្ញៀវទេសចរជាង ១១ម៉ឺននាក់ បានទៅដើរលេងកម្សាន្ដនៅខេត្ដសៀមរាប រយៈពេល ៣ថ្ងៃ នៃព្រះរាជពិធីបុណ្យអុំទូក

ភ្ញៀវទេសចរជាតិ និងអន្ដរជាតិប្រមាណជាង ១១ម៉ឺននាក់ បានទៅដើរលេងកម្សាន្ត នៅតាមរមណីយដ្ឋាននានា ក្នុងខេត្តសៀមរាប ក្នុងឱកាសនៃព្រះរាជពិធីបុណ្យអុំទូក អកអំបុក សំពះព្រះខែ និងបណ្ដែតប្រទីប រយៈពេល ៣ថ្ងៃ ចាប់ពីថ្ងៃទី ១៨ដល់ថ្ងៃទី ២០ ខែវិច្ឆិកា ឆ្នាំ ២០២១។

លោក ង៉ូវ សេងកាក់ ប្រធានមន្ទីរទេសចរណ៍ខេត្ដសៀមរាប បានឲ្យដឹងតាមប្រព័ន្ធតេឡេក្រាម នៅយប់ថ្ងៃទី ២០ ខែវិច្ឆិកា ឆ្នាំ ២០២១ថា ក្នុងរយៈពេល ៣ថ្ងៃមកនេះ អ្នកទេសចរទៅកម្សាន្ដនៅខេត្ដសៀមរាបជាង ១១ម៉ឺននាក់។ ក្នុងនោះ ភ្ញៀវជាតិមានចំនួនប្រមាណ ១១៧.០០០នាក់ ដែលភ្ញៀវទេសចរមកពីតាមបណ្តាខេត្ត មានចំនួនប្រមាណ ៧០-៨០%  ហើយមានប្រមាណជា ៨០,០០០ ទៅ៩០,០០០នាក់ ដែលធ្វើដំណើរកម្សាន្តជាលក្ខណៈគ្រួសារ។ រីឯភ្ញៀវទេសចរបរទេសដែលបានដើរកម្សាន្ដ នៅខេត្ដសៀមរាបមានចំនួន ១,១៤៦នាក់ផងដែរ។

តំបន់ទេសចរណ៍ ដែលទទួលបានទេសចរច្រើន រួមមាន៖ រមណីយដ្ឋានអង្គរ មានចំនួនប្រមាណ ៧៩,០០០នាក់ រមណីយដ្ឋានឧទ្យានជាតិភ្នំគូលែន មានចំនួប្រមាណ ១២,៧០០នាក់ សហគមន៍ទេសចរណ៍-អេកូទេសចរណ៍ និងតំបន់ផ្សេងៗ មានចំនួនប្រមាណ ២៥,៣០០នាក់៕

អត្ថបទ៖ គឿន វេត