ព័ត៌មានជាតិ

អភិបាលខណ្ឌច្បារអំពៅចុះពិនិត្យការស្ដារប្រឡាយបង្ហូរទឹកបញ្ចៀសការជន់លិច

បានផុស

៧ ខែ មុន

នៅ

ថ្ងៃពុធ ៨ ធ្នូ ២០២១

ដោយ

លោក ចេង មុនីរ៉ា អភិបាលខណ្ឌច្បារអំពៅបានដឹកនាំក្រុមការងារចុះពិនិត្យការជីកស្ដារប្រឡាយបង្ហូរទឹកចេញពីទីតាំងដែលលិចលង់ទាំងកណ្តាលយប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមប្រភពពីលោក គុយ គឹមហ៊ាង ប្រធានសាធារណៈការសាលាខណ្ឌច្បារអំពៅ បានប្រាប់កម្ពុជាថ្មីថា កាលពីយប់ថ្ងៃទី៧ ខែធ្នូនេះ លោក ចេង មុនីរ៉ា អភិបាលខណ្ឌច្បារអំពៅបានដឹកនាំក្រុមការងារចុះពិនិត្យទីតាំងកាយប្រឡាយបង្ហូរទឹកចេញពីទីតាំងដែលរងការលិចលង់ចេញពីអតីតផ្សារបឹងព្រលឹត ក្នុងភូមិអូរអណ្តូង១ សង្កាត់ព្រែកប្រា ខណ្ឌច្បារអំពៅ រាជធានីភ្នំពេញ ខណៈដែលទីតាំងមួយចំនួននៅតែបន្តលិចលង់ដោយជំនន់ទឹកភ្លៀងកន្លងមក។

លោកប្រធានការិយាល័យសាធារណៈការបានបន្តថា បើទោះបីជាតំបន់មួយចំនួនបានរីងស្ងួតក៏ដោយប៉ុន្តែនៅតំបន់ទំនាបខ្លះៗក៏មិនទាន់ស្រកទើបលោក ចេង មុនីរ៉ា អភិបាលខណ្ឌច្បារអំពៅដាក់កម្លាំងនិងគ្រឿងចក្រចុះកាយប្រឡាយបង្ហូរទឹកហើយទីតាំងចំនួន២បន្ថែមទៀតតម្រូវឲ្យដាក់ម៉ាស៊ីនបូមទឹកខ្នាតធំដាក់បូមទាំងយប់ទាំងថ្ងៃ។

ទាក់ទិនទៅនិងការចុះពិនិត្យទីតាំងកាយប្រឡាយបង្ហូរទឹកនិងទីតាំងដាក់ម៉ាស៊ីនបូមទឹកទាំងកណ្តាលយប់នេះលោកអភិបាលខណ្ឌច្បារអំពៅចង់ឲ្យពន្លឿនក្នុងការរំដោះទឹកចេញពីតំបន់ដែលរងការលិចលង់ធ្វើយ៉ាងណាមិនឲ្យបងប្អូនប្រជាពលរដ្ឋលោកមានការលំបាកក្នុងការរស់នៅលើទឹក។ក្នុងនោះលោកអភិបាលខណ្ឌប្តេជ្ញាចិត្តមិនឲ្យមានទឹកលិចលង់លំនៅដ្ឋានរបស់ប្រជាពលរដ្ឋតទៅទៀតបើសិនជាមេឃមិនធ្លាក់ភ្លៀងខ្លាំងដូចពេលកន្លងមក។ហើយតំបន់ដែលរងការលិចលង់ភាគច្រើនមិនទាន់មានប្រពន្ធ័លូបង្ងូទឹក៕

អត្ថបទ៖ នរា