អាមេរិក ប្រកាសអាសន្ន និងព្រមានពីសន្តិសុខទូទាំងពិភពលោក ដោយបារម្ភថា អ៊ីរ៉ង់ នឹងសងសឹកវិញ​

ក្រសួងការបរទេសអាមេរិក បានប្រកាសអាសន្ន និងចេញការព្រមានអំពីសន្តិសុខនៅទូទាំងសកលលោក ដោយជំរុញឲ្យពលរដ្ឋអាមេរិកាំងទាំងអស់បង្កើនការប្រុងប្រយ័ត្ន​កម្រិត​​ខ្ពស់ ចំពេលមានការភ័យខ្លាចចំពោះការផ្ទុះឡើងនៃជម្លោះកាន់តែខ្លាំង នៅក្នុងសង្គ្រាមជាថ្មីរវាងទីក្រុងវ៉ាស៊ីនតោន និងប្រទេសអ៊ីរ៉ង់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងសេចក្តីថ្លែងការណ៍របស់ TravelGov កាលពីថ្ងៃទី១៨ ខែកក្កដា ក្រសួងការបរទេសអាមេរិកបានគូសបញ្ជាក់ថា «ដោយសារតែភាពតានតឹងកើនឡើងខ្លាំងនៅមជ្ឈិមបូព៌ា បរិយាកាសសន្តិសុខនៅតែមានភាពស្មុគស្មាញ និងមានលទ្ធភាពបង្កឲ្យមានការកើនឡើងនៃជម្លោះ ដោយមិនបានគ្រោងទុក»។ ស្ថាប័ននេះបានណែនាំពលរដ្ឋអាមេរិកនៅទូទាំងពិភពលោក ជាពិសេសអ្នកដែលកំពុងស្ថិតនៅក្នុងតំបន់មជ្ឈិមបូព៌ា ឲ្យតាមដានការវិវត្តនៃស្ថានការណ៍ឲ្យបានជាប់លាប់ និងអនុវត្តតាមការណែនាំរបស់ស្ថានទូត ឬស្ថានកុងស៊ុលអាមេរិកដែលនៅជិតបំផុត។

ការព្រមាននេះបានកត់សម្គាល់ថា ការលុបចោលជើងហោះហើរ និងការបិទដែនអាកាសជាបណ្តោះអាសន្ន អាចនឹងបង្កជាផលរំខានដល់ការធ្វើដំណើរ។ ជាពិសេស ទីតាំងការទូតរបស់អាមេរិក រួមទាំងទីតាំងមួយចំនួននៅក្រៅតំបន់មជ្ឈិមបូព៌ា ធ្លាប់បានក្លាយជាគោលដៅវាយប្រហាររួចមកហើយ ព្រមទាំងបានព្រមានទៀតថា ក្រុមគាំទ្រអ៊ីរ៉ង់អាចនឹងវាយប្រហារលើផលប្រយោជន៍ដទៃទៀតរបស់អាមេរិកនៅក្រៅប្រទេស ឬទីតាំងនានាដែលពាក់ព័ន្ធនឹងសហរដ្ឋអាមេរិក និង/ឬ ពលរដ្ឋអាមេរិកាំងនៅទូទាំងពិភពលោក។

ការប្រកាសអាសន្ននេះ បានធ្វើឡើងតែប៉ុន្មានម៉ោងប៉ុណ្ណោះ បន្ទាប់ពីបញ្ជាការដ្ឋានកណ្តាលរបស់សហរដ្ឋអាមេរិក (CENTCOM) បានបញ្ជាក់ថា ទាហានអាមេរិកពីររូបត្រូវបានសម្លាប់នៅក្នុងប្រទេសហ្សកដានី កាលពីថ្ងៃសុក្រ ខណៈពេលដែលកងកម្លាំងអាមេរិក និងសម្ព័ន្ធមិត្តកំពុងការពារព្រះរាជាណាចក្រមួយនេះ ពីការវាយប្រហារដោយមីស៊ីលបាលីស្ទីក និងដ្រូនរបស់អ៊ីរ៉ង់។

ការបាត់បង់ជីវិតនេះ បានធ្វើឲ្យចំនួនអ្នកស្លាប់ផ្លូវការរបស់ទាហានអាមេរិក កើនឡើងដល់ ១៦ នាក់ ចាប់តាំងពីសង្គ្រាមរវាងអាមេរិក-អ៊ីស្រាអែល ប្រឆាំងនឹងអ៊ីរ៉ង់ បានចាប់ផ្តើមកាលពីខែកុម្ភៈ។

បន្ទាប់ពីបទឈប់បាញ់បានដួលរលំ អាមេរិកបានបើកការទម្លាក់គ្រាប់បែកយ៉ាងខ្លាំងក្លា រយៈពេល ៧ យប់ជាប់ៗគ្នា លើហេដ្ឋារចនាសម្ព័ន្ធស៊ីវិល ស្ពាន និងទីតាំងយោធាអ៊ីរ៉ង់ (សម្លាប់មនុស្ស ៥០ នាក់ និងរបួសជាង ៥០០ នាក់)។ ចំណែកឯភាគីអ៊ីរ៉ង់និងក្រុមបណ្ដាញយោធា បានវាយបកស្ទើររាល់ថ្ងៃ ដោយប្រើមីស៊ីលនិងដ្រូនសំដៅលើមូលដ្ឋានទ័ពអាមេរិកនៅហ្សកដានី គុយវ៉ែត បារ៉ែន កាតា អូម៉ង់ អ៊ីរ៉ាក់ រួមទាំង ស៊ីរី ជាដើម។ ដោយហេតុនេះ ក្រសួងការបរទេសអាមេរិក ក៏បានសម្រេចចិត្តប្រកាសអាសន្នទូទាំងពិភពលោក ព្រោះបារម្ភថា ពលរដ្ឋ និងស្ថានទូតអាមេរិកនៅគ្រប់ទីកន្លែងអាចជួបគ្រោះថ្នាក់ពីក្រុមគាំទ្រអ៊ីរ៉ង់៕

អត្ថបទ ៖ សាង ស្រីល័ក្ខ

អភិបាលក្រុង​ញូយ៉ក ប្រកាសរកវិធីចាប់ខ្លួនលោក ណេតាន់យ៉ាហ៊ូ ទៅ​ប្រឈម ICC ដែល​ផ្ទុយពី​នយោបាយ​របស់ លោក ត្រាំ​