ពលរដ្ឋក្រីក្រស្រុកស្វាយអន្ទរ ៣៨គ្រួសារ ទទួលបានអំណោយទ្រទ្រង់ជីវភាព

ព្រៃវែង៖ នៅថ្ងៃទី ១១ ខែធ្នូ ឆ្នាំ២០២១ លោក ជាវ ផល្លី ប្រធានក្រុមការងារចុះជួយឃុំពពឹស បានដឹកនាំក្រុមការងារ ចុះសួរសុខទុក្ខ និងនាំយកអំណោយ មានដូចជា អង្ករ, ទឹកត្រី, ទឹកស៊ីអ៊ីវ, ភួយ ,ម៉ាស និងថវិកាមួយចំនួន ផ្តល់ជូនលោកយាយលោកតា ចាស់ជរា មានជីវភាពខ្វះខាតចំនួន ៣៨ គ្រួសារ មកពីភូមិចំនួន ៤ នៅក្នុងឃុំពពឹស ស្រុកស្វាយអន្ទរ ខេត្តព្រៃវែង។

លោក ជាវ ផល្លី បានថ្លែងថា រាជរដ្ឋាភិបាលដែលមានសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ជានិច្ចជាកាល សម្ដេចតែងតែគិតគូរអំពីសុខទុក្ខរបស់ប្រជាពលរដ្ឋគ្រប់ស្រទាប់វណ្ណៈ គ្រប់កាលៈទេសៈ គ្រប់ពេលវេលា ដោយមិនប្រកាន់ពណ៌សម្បុរ ឬនិន្នាការនយោបាយឡើយ។ លើសពីនេះទៀត លោកថ្លែងថា សម្ដេចមិនដែលទុកបងប្អូនប្រជាពលរដ្ឋណាម្នាក់ស្លាប់ដោយអត់បាយ ឬក៏ទុកចោលនោះទេ។

ជាមួយគ្នានេះ លោកបានផ្ដាំផ្ញើដល់លោកយាយ លោកតាទាំងអស់ ត្រូវចេះថែទាំសុខភាពដោយខ្លួនឯង ដោយត្រូវ រស់នៅស្អាត ហូបស្អាត ជាប្រចាំ នឹងត្រូវទទួលទានបន្លែដែលគ្មានសារធាតុជាតិគីមី បន្លែបៃតងដែលជួយពង្រឹងសុខភាព ដល់លោកយាយ លោកតា ឱ្យមានសុខភាពល្អរឹងមាំ។

លោកថា«លោកយាយ លោកតា ទាំងអស់ត្រូវយកចិត្តទុកដាក់ចំពោះជំងឺរាតត្បាតសកលកូវីដ-១៩ ហើយត្រូវការពារឱ្យបានខ្ជាប់ខ្ជួន ដោយរស់នៅតាមកន្លងប្រក្រតីភាពថ្មី ប្រកាន់ខ្ជាប់នូវវិធានការសុខាភិបាល ៣ ការពារ ៣កុំ ដើម្បីធានាសុខមាលភាពគ្រួសារ សហគមន៍ និងសង្គមជាតិ»៕ សៅគ្រី