ជប៉ុន​ផ្ដល់ជំនួយឥតសំណង ១៣,៩ លាន​ដុល្លារ​​ បំពាក់​គ្រឿង​ចក្រ​លើកដាក់គែមផែចល័ត​​

រដ្ឋាភិបាលជប៉ុន បានសម្រេច​ផ្ដល់ហិរញ្ញប្បទានឥតសំណងនូវទឹកប្រាក់​ប្រមាណ ១៣,៩ លាន​ដុល្លារអាមេរិក​ ដើម្បី​បំពាក់​គ្រឿង​ចក្រ​លើកដាក់គែមផែចល័ត​​ នៅ កំពង់ផែស្វ័យ័ត ក្រុងព្រះសីហនុ ហើយពិធីចុះហត្ថលេខាប្រគល់ និងទទួល នឹងធ្វើឡើងថ្ងៃទី១៦ ខែធ្នូ ឆ្នាំ២០២១ នៅ ទីស្ដីការក្រសួង​ការបរទេស។​

ក្រសួង​ការបរទេស​បានឱ្យដឹងនៅ ព្រឹក​​ថ្ងៃទី ​១៥ ខែធ្នូ ឆ្នាំ ២០២១ ​នេះថា លោកឧបនាយករដ្ឋមន្ត្រី​ ប្រាក់ សុខុន ​រដ្ឋមន្ត្រីការបរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជា និងលោក មិកាមិ ម៉ាសាហ៊ីរ៉ូ  (MIKAMI Masahiro) ឯកអគ្គរាជទូតជប៉ុនប្រចាំព្រះរាជាណាចក្រកម្ពុជា នឹងចុះហត្ថលេខាលើលិខិតប្ដូរសារ និងឯកសារពាក់ព័ន្ធ ស្ដីពី ការផ្ដល់ហិរញ្ញប្បទានឥតសំណងរបស់ជប៉ុន ដែលមានទឹកប្រាក់សរុបចំនួន ១ ៥០០ លានយ៉េន (ប្រមាណ ១៣,៩ លានដុល្លារអាមេរិក) ក្រោមកម្មវិធីអភិវឌ្ឍន៍សេដ្ឋកិច្ច និងសង្គម សម្រាប់អនុវត្តគម្រោងបំពាក់គ្រឿងចក្រលើកដាក់គែមផែចល័ត (Mobile Harbor Crane) នៅ កំពង់ផែស្វយ័តក្រុងព្រះសីហនុ។

បើតាមក្រសួង​ការបរទេស ​ហិរញ្ញប្បទានឥតសំណងដែលផ្ដល់ដោយរដ្ឋាភិបាលជប៉ុននេះ នឹងចូលរួមចំណែកយ៉ាងសំខាន់ដល់កិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងការពន្លឿនការអភិវឌ្ឍសេដ្ឋកិច្ច និងសង្គមកម្ពុជា ព្រមទាំងពង្រឹងបន្ថែមទៀតនូវកិច្ចសហប្រតិបត្តិការល្អដែលមានស្រាប់ និងចំណងមិត្តភាពជាប្រពៃណីរវាងប្រទេសទាំងពីរ៕​

អត្ថបទ៖ កោះកែវ