អ្នកនាំពាក្យ ៖ ឆ្នាំនេះ មានបេក្ខជនពិការភ្នែក និងគថ្លង់ចូលរួមប្រឡងបាក់ឌុបចំនួន ៣០នាក់

អ្នកនាំពាក្យក្រសួង អប់រំ យុវជន និងកីឡា លោករស់ សុវាចា បានមានប្រសាសន៍ថា ក្នុងចំណោមបេក្ខជនជាង១១ម៉ឺននាក់ចូលរួមប្រឡងសញ្ញាបត្រមធ្យមសិក្សាទុតិយភូមិនៅថ្ងៃទី ២៧ ខែធ្នូ ឆ្នាំ២០២១នេះ គឺមានបេក្ខជនពិការភ្នែក និងគថ្លង់ចូលរួមប្រឡងចំនួន៣០នាក់ មានស្រី១៤នាក់។ ក្នុងនោះ មានបេក្ខជនពិការភ្នែកចំនួន១៨នាក់ ស្រី៧នាក់ និងគថ្លង់ ចំនួន១២នាក់ ស្រី៧នាក់។

លោកបានបន្តថា នៅក្នុងចំណោមបេក្ខជនពិការភ្នែក និងគថ្លង់ទាំង៣០នាក់នេះ គឺប្រឡងនៅមណ្ឌលរាជធានីភ្នំពេញចំនួន១០នាក់ ស្រី៣នាក់ ក្នុងនោះ មានបេក្ខជនគថ្លង់ចំនួន៣នាក់ ស្រី១នាក់ ប្រឡងថ្នាក់វិទ្យាសាស្ត្រនៅមណ្ឌលវិទ្យាល័យហ៊ុន សែន ប៊ុន រ៉ានី ផ្សារដើមថ្កូវ និងបេក្ខជនពិការភ្នែក៧នាក់ ស្រី២នាក់ប្រឡងថ្នាក់វិទ្យាសាស្ត្រសង្គមនៅវិទ្យាល័យសម្តេចហ៊ុន សែន ភ្នំពេញថ្មី។

លោករស់ សុវាចា បានបន្តទៀតថា នៅខេត្តកំពង់ចាម មានចំនួន១២នាក់ ស្រី៧នាក់ ក្នុងនោះ មានពិការភ្នែកចំនួន៩នាក់ ស្រី៤នាក់ និងគថ្លង់ចំនួន៣នាក់ ស្រីទាំង៣នាក់ ប្រឡងថ្នាក់វិទ្យាសាស្ត្រនៅមណ្ឌលគរុកោសល្យខេត្តកំពង់ចាម។ ខេត្តបាត់ដំបងមាន ៤នាក់ ស្រី២នាក់ ក្នុងនោះ មានបេក្ខជនគថ្លង់២នាក់ស្រី១នាក់ ប្រឡងថ្នាក់វិទ្យាសាស្ត្រនៅមណ្ឌលវិទ្យាល័យអន្លង់វិល និងបេក្ខជនពិការភ្នែក២នាក់ ស្រី១នាក់ ប្រឡងថ្នាក់វិទ្សាសាស្ត្រសង្គមនៅមណ្ឌលវិទ្យាល័យក្តុលដូនទាវ និងខេត្តសៀមរាប មាន៤នាក់ស្រី២នាក់ ជាបេក្ខជនគថ្លង់ប្រឡងថ្នាក់វិទ្យាសាស្ត្រនៅមណ្ឌលវិទ្យាល័យសម្តេចឪខេត្តសៀមរាប៕

អត្ថបទ ៖ សំអឿន