ភរិយាលោក អួន សារ៉ាត់ ប្រកាសលក់ផ្ទះបន្ទាន់​ក្រោយស្ថានភាពជំងឺស្វាមី​កាន់តែធ្ងន់ធ្ងរ

គ្រូពេទ្យបានបញ្ជាក់ថា លោក អួន សារ៉ាត់ នៅមានសង្ឃឹមរស់ត្រឹមតែ ១០-២០ភាគរយប៉ុណ្ណោះ គិតត្រឹមថ្ងៃទី ០២ ខែ មករា។ នេះបើតាមភរិយារបស់លោក អួន សារ៉ាត់ បានធ្វើវីដេអូឡាយផ្ទាល់ នៅលើផេក uorn sarath page កាលពីយប់រំលងអធ្រាត្រឈានចូលថ្ងៃទី ០៣ ខែមករា ឆ្នាំ ២០២២ អំពីស្ថានភាពជំងឺរបស់ស្វាមី។

ក្រោយមើលឃើញស្ថានភាពជំងឺស្វាមីកាន់តែធ្ងន់ធ្ងរពីមួយថ្ងៃទៅមួយថ្ងៃ ភរិយាលោក អួន សារ៉ាត់ បានប្រកាសលក់ផ្ទះបន្ទាន់ ដើម្បីយកលុយបន្តព្យាបាលស្វាមីនៅក្រៅប្រទេស។

តាមរយៈហ្វេសប៊ុក uorn sarath page ភរិយាលោក អួន សារ៉ាត់ បានប្រកាសដូច្នេះថា«លក់ផ្ទះឡាយឡុងបន្ទាន់​ ព្យាបាលលោកគ្រូអួន​ សារ៉ាត់​ ពេលនេះ លោកគ្រូ អួន​ សារ៉ាត់ ​មានបញ្ហាសុខភាពធ្ងន់ធ្ងរ នៅមានឱកាសព្យាបាលគាត់តែ៥ថ្ងៃទៀតទេ។ ឥឡូវនេះ នាងខ្ញុំខ្វះខាតលុយយកគាត់ទៅព្យាបាលនៅក្រៅប្រទេស​។ បងប្អូនជួយទិញផ្ទះនាងខ្ញុំ​ផង​ នាងខ្ញុំលក់ឡាយឡុង​ ដើម្បីយកប្រាក់មកព្យាបាលគាត់​ឲ្យទាន់ពេល។ យើងមិនអាចបាត់បង់គាត់បានទេ​ ព្រោះគាត់ជាធនធានដ៏កម្រ​ ជាធនធានដ៏សំខាន់សម្រាប់សង្គមជាតិ។ គាត់បានផ្តល់ចំណេះដឹងល្អៗ​ ផ្នត់គំនិតល្អៗ​ជាច្រើនដល់សង្គម»។

ពេលនេះ លោក អួន សារ៉ាត់ នៅតែមិនអាចដកដង្ហើមបានដោយខ្លួនឯងឡើយ គឺត្រូវប្រើម៉ាស៊ីនអុកស៊ីសែនជំនួយដកតាមបំពង់កប៉ុណ្ណោះ។ ភរិយាលោក អួន សារ៉ាត់ បានឲ្យដឹងថា គ្រូពេទ្យបានព្យាយាមធ្វើយ៉ាងណា ដកម៉ាស៊ីនជំនួយ និងកាត់បន្ថយប្រើថ្នាំសណ្ដំ ប៉ុន្តែមិនអាចធ្វើទៅបានទេ ដោយសារស្ថានភាពលោក នៅតែធ្ងន់ធ្ងរ។

អ្នកស្រីបានបញ្ជាក់ថា « អុកស៊ីសែនជំនួយដង្ហើមនេះ ដាក់ចូលក្នុងបំពង់ក អាចដាក់បានត្រឹមចន្លោះពីរអាទិត្យទេ បើផុតពីពីរអាទិត្យនេះ នៅតែដកចេញអត់បានទៀត គឺគ្រូពេទ្យត្រូវចោះកគាត់(អួន សារ៉ាត់) ដើម្បីដាក់បន្ត»។

អ្នកស្រីបន្តទៀតថា« កាលពីម្សិលមិញ ខ្ញុំបានជួបជាមួយគ្រូពេទ្យ ហើយក្រុមគ្រូពេទ្យបានប្រាប់ត្រង់ថា ឥឡូវនេះក្តីសង្ឃឹមដែលយើងអាចដកបំពង់ខ្យល់ចេញពីបំពង់កបាន គឺសង្ឃឹមតិចបំផុតត្រឹមតែ ១០-២០ភាគរយប៉ុណ្ណោះ»។

គ្រូពេទ្យបានប្រាប់ឲ្យដឹងទៀតថា ជម្រើសចុងក្រោយ គឺត្រូវវះកាត់ប្តូរសួត ពីព្រោះសួតរបស់លោក អួន សារ៉ាត់ ខូចខាតធ្ងន់ធ្ងរ។ ប៉ុន្តែការប្តូរសួតនេះ ត្រូវទៅប្តូរនៅក្រៅប្រទេស។

គិតត្រឹមថ្ងៃនេះ មានរយៈពេល ១០ថ្ងៃហើយ ដែលលោក អួន សារ៉ាត់ ត្រូវបានក្រុមគ្រួសារបញ្ជូនទៅសង្គ្រោះបន្ទាន់នៅមន្ទីរពេទ្យ ក្រោយជំងឺធ្វើទុក្ខខ្លាំង កាលពីថ្ងៃទី ២៥ ខែធ្នូ ឆ្នាំ ២០២១។ សល់តែ ៤ថ្ងៃទៀតប៉ុណ្ណោះ គ្រប់រយៈពេលកំណត់ ២សប្តាហ៍ ដែលគ្រូពេទ្យត្រូវដកបំពង់ខ្យល់អុកស៊ីសែនចេញវិញ។

លោក អួន សារ៉ាត់ គឺជាស្ថាបនិកយូខេនវីនគ្រុប ត្រូវបានសាធារណជន ស្គាល់ថា ជាអ្នកនិពន្ធសៀវភៅ អំពីការលើកទឹកចិត្ត បង្កើតអាជីវកម្ម បណ្តុះគំនិតវិជ្ជមានដល់យុវជនជំនាន់ក្រោយ។ លោកបាននិពន្ធសៀវភៅជាច្រើនចំណងជើង លក់នៅលើទីផ្សារ ពិសេសនៅតាមបណ្ណាគារនានា នៅទូទាំងប្រទេស។ លើសពីនេះទៀត លោក អួន សារ៉ាត់ តែងតែបើកវគ្គបណ្តុះបណ្តាលចែករំលែកបទពិសោធន៍នៅលើអនឡាញ ឬបណ្តាញសង្គម ដោយសេរី(Free) ដើម្បីចែកជូនដល់សាធារណជន យកទៅពិចារណា អំពីគំនិតអាជីវកម្ម និងបទពិសោធន៍ដែលលោកមានកន្លងមក។

លោក អួន សារ៉ាត់ កើតនៅឆ្នាំ ១៩៨៣ នៅភូមិរាំងក្រោល ឃុំរាំងកេសី ស្រុកសង្កែ ខេត្តបាត់ដំបង។ លោកជាកូនទី៥ ក្នុងចំណោមបងប្អូនបង្កើត ៧នាក់៕ ទួន សុផល