សម្ដេចតេជោ ហ៊ុន សែន ស្នើឲ្យគ្រប់ភាគីពាក់ព័ន្ធ នៅមីយ៉ាន់ម៉ា មានការអត់ធ្មត់ និងបញ្ឈប់អំពើហិង្សា

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានលើកឡើងថា សភាពការណ៍ នៅក្នុងប្រទេសមីយ៉ាន់ម៉ា គឺមិនសាមញ្ញនោះទេ។ ដូច្នេះក៏ត្រូវប្រើវិធានការ មិនសាមញ្ញដែរ ហើយសម្ដេចក៏បន្តស្នើឲ្យភាគីពាក់ព័ន្ធ នៅមីយ៉ាន់ម៉ាបន្តការអត់ធ្មត់ និងបញ្ឈប់អំពើហិង្សា ផងដែរ។

សម្ដេចតេជោនាយករដ្ឋមន្ត្រី នៅក្នុងពិធីប្រគល់ប្រាក់រង្វាន់ជូនកីឡាការិនី អ៊ុក ស្រីមុំ បន្ទាប់ពីដណ្តើមបានមេដាយមាសពិភពលោក ពីការប្រកួតប៉េតង់ នៅទីក្រុងសាន់តាស៊ូសាណា នាព្រឹកថ្ងៃទី ៥ ខែមករានេះ បានថ្លែងថា សម្រាប់ដំណើររបស់សម្ដេច ទៅកាន់ប្រទេសមីយ៉ាន់ម៉ា នាពេលឆាប់ៗខាងមុខនេះ គឺធ្វើទៅតាមអ្វីដែលជាកុងសង់ស៊ីស ៥ចំណុចរបស់អាស៊ាន កាលជួបប្រជុំគ្នា នៅទីក្រុងហ្សាកាតា ឥណ្ឌូនេស៊ី ឆ្នាំ២០២១ កន្លងទៅ។

សម្ដេចតេជោ ហ៊ុន សែន បានថ្លែងថា សម្ដេចចង់ឃើញភាគីពាក់ព័ន្ធនៅមីយ៉ាន់ម៉ា មានការអត់ធ្មត់ ដើម្បីកុំឲ្យអំពើហិង្សាកើតឡើង។ សម្ដេចតេជោនាយករដ្ឋមន្ត្រី បានលើកឡើងថា «ចឹងទេ វាគ្រប់ភាគីពាក់ព័ន្ធទាំងអស់ ត្រូវតែបញ្ឈប់អាហិង្សាហ្នឹងៗ សភាពការណ៍នៅមីយ៉ាន់ម៉ា មិនសាមញ្ញ ដូច្នេះយើងក៏ត្រូវប្រើវិធានការ មិនសាមញ្ញដែរ»៕