ព័ត៌មានជាតិ
ផ្លូវជាតិលេខ៥ ដែលជាសរសៃឈាមសេដ្ឋកិច្ចជាតិដ៏ធំ នឹងសម្ពោធជាផ្លូវការនៅថ្ងៃទី១០ មករា
នៅថ្ងៃទី១០ ខែមករា ឆ្នាំ២០២២ខាងមុខនេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នឹងអញ្ជើញសម្ពោធដាក់ឲ្យប្រើប្រាស់ជាផ្លូវការកំណាត់ផ្លូវជាតិលេខ៥ ពីខេត្តបាត់ដំបងទៅខេត្តបន្ទាយមានជ័យ។ ផ្លូវនេះ មានប្រវែងជាង៨៤ គីឡូម៉ែត្រ ដែលបានចំណាយថវិកាអស់ជាង ១៦០ លានដុល្លារ។ ផ្លូវជាតិលេខ៥នេះ គឺជាផ្លូវអាស៊ានហាយវេទី១របស់កម្ពុជា។
ជាប្រវត្ថិសាស្ត្រមួយសម្រាប់ប្រជាពលរដ្ឋរស់នៅក្នុងខេត្តបាត់ដំបង និងខេត្តបន្ទាយមានជ័យដែលទទួលបាននូវសមិទ្ធផលពីរាជរដ្ឋាភិបាលកម្ពុជា គឺផ្លូវអាស៊ានហាយវេទី១ កំណាត់ផ្លូវជាតិលេខ៥ បាត់ដំបង-បន្ទាយមានជ័យ។ ផ្លូវនេះ បានបើកឱ្យធ្វើចរាចរណ៍ជាផ្លូវការចាប់ពីថ្ងៃទី២៣ ខែកញ្ញា ឆ្នាំ២០២១មកម៉្លេះ បន្ទាប់ពីបានស្ថាបនារួចរាល់។
ផ្លូវអាស៊ានហាយវេទី១នេះ គឺជាផ្លូវសេដ្ឋកិច្ចដ៏សំខាន់របស់ប្រទេសកម្ពុជាដែលតភ្ជាប់ពីតំបន់សេដ្ឋកិច្ចនៃច្រកទ្វារព្រំដែនប៉ោយប៉ែត ខេត្តបន្ទាយមានជ័យ មកកាន់ខេត្ត បាត់ដំបង ភ្ជាប់មករាជធានីភ្នំពេញ ។ ផ្លូវនេះ ជាប្រភេទផ្លូវ៤គន្លងដែលមានទទឹង ២៣ ម៉ែត្រសម្រាប់តំបន់ជនបទ និង ២៨ ម៉ែត្រសម្រាប់តំបន់ទីប្រជុំជនដោយចំណាយថវិកាក្នុងការសាងសង់សរុប ១៦០,៦លានដុល្លាសហរដ្ឋអាមេរិក ។ ចំពោះ ខេត្តបាត់ដំបង មានផ្លូវវាងក្រុងបាត់ដំបងមួយខ្សែដែលមានប្រវែងសរុប ២៣.៩២គីឡូ ម៉ែត្រ និងផ្លូវតាមបណ្ដោយផ្លូវជាតិលេខ៥ប្រវែង ២២.៣៥គីឡូម៉ែត្រដែលមានសួនច្បារនៅកណ្ដាលដោយមានដាំដើមត្របែកព្រៃ និងផ្លូវវាងក្រុងមានដាំដើមក្ងោកនៅត្រឹមព្រំដី ។
លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនធ្លាប់ បានបញ្ជាក់ថា៖«ផ្លូវជាតិលេខ៥នេះ គឺសំខាន់ណាស់ វាជាចំណែកផ្លូវរបស់អាស៊ានហាយវេលេខ១ ដែលបានតភ្ជាប់តាំងពីមីយ៉ាន់ម៉ា មកថៃ កម្ពុជា និងវៀតណាមសម្រាប់ដឹកទំនិញ។ យើង មានកសិផលក៏ច្រើននៅប៉ៃលិន បាត់ដំបង រួមនឹងខេត្តផ្សេង ទៀតអាចដឹកមកតាមផ្លូវនេះចុះទៅកំពង់ផែ ហើយបន្តិចទៀត អាចតភ្ជាប់ផ្លូវល្បឿនលឿនភ្នំពេញ-ក្រុងព្រះសីហនុ ។ ផ្លូវជាតិលេខ៥ ជាផ្លូវសំខាន់ និងជាសរសៃឈាមដ៏ធំមួយ ដើម្បីធ្វើឱ្យសេដ្ឋកិច្ចជាតិយើងរីកចម្រើនថែមទៀត»។
សូមបញ្ជាក់ថា គម្រោងធ្វើឱ្យប្រសើរឡើងវិញកំណាត់ផ្លូវជាតិលេខ៥ គឺជាគម្រោងក្រោមកម្ចីឥណទានសម្បទានពីរដ្ឋាភិបាលជប៉ុនតាមរយៈទីភ្នាក់ងារសហប្រតិបត្តិការ អន្តរជាតិជប៉ុនប្រចាំកម្ពុជាដែលផ្តើមសាងសង់ចេញពីព្រែកក្តាមរហូតដល់ក្រុងប៉ោយប៉ែតឆ្លងកាត់ខេត្តកណ្តាល កំពង់ឆ្នាំង ពោធិ៍សាត់ បាត់ដំបង និង ខេត្តបន្ទាយ មានជ័យមានប្រវែងសរុប ៣៦៦ គីឡូម៉ែត្រ គ្រោងចំណាយថវិកាប្រមាណ ៥០០ លានដុល្លារអាមេរិកហើយការស្ថាបនាត្រូវបានបែងចែកជាបីផ្នែកធំៗគឺភាគខាងជើង ភាគខាងត្បូង និង ភាគកណ្តាល ។
ផ្លូវជាតិលេខ៥ គឺជាផ្លូវយុទ្ធសាស្ត្រយ៉ាងសំខាន់ ជាផ្លូវអាស៊ានហាយវេលេខ១ ហើយក៏ជាផ្លូវរបៀងសេដ្ឋកិច្ចកើត-លិច ទី២ដ៏មានសក្ដានុពលសម្រាប់ប្រកួតប្រជែងពាណិជ្ជកម្ម ទេសចរណ៍ ភស្តុភារកម្ម វិនិយោគ និងសេដ្ឋកិច្ចនៃមហាតំបន់មេគង្គ GMS ដែលតភ្ជាប់រវាងបាងកក-ភ្នំពេញ-ហូជីមិញ។ ក្រសួងសាធារណការ និងដឹកជញ្ជូនបានឱ្យដឹងថាគម្រោងធ្វើឱ្យប្រសើរឡើងវិញនូវកំណាត់ផ្លូវជាតិលេខ ៥ គឺជាគម្រោងក្រោមឥណ ទានសម្បទានពីរដ្ឋាភិបាលជប៉ុនតាមរយៈទីភ្នាក់ងារសហប្រតិបត្តិការអន្តរជាតិជប៉ុនប្រចាំកម្ពុជា (JICA)។ គម្រោងនេះ គឺផ្តើមសាងសង់ចេញពីព្រែកក្តាមរហូតដល់ក្រុងប៉ោយប៉ែតមានប្រវែងសរុប៣៦៦គីឡូម៉ែត្រ ដែលគ្រោងចំណាយថវិកាប្រមាណ៥០០លានដុល្លារ ។
កំណាត់ផ្លូវជាតិនេះ ត្រូវបានសាងសង់ពង្រីកពី២គន្លងដែលមានស្រាប់ទៅ៤គន្លង ដោយមានទទឹងសរុប២៣ម៉ែត្រ មានប្រវែងសរុប៣០៤គីឡូម៉ែត្រ ដោយក្រាលជំនួសកៅស៊ូ AC (Asphalt Concrete) និងមានសួនច្បារកណ្តាល។ ការអនុវត្តនីតិវិធីក្នុងការសាងសង់ ត្រូវបានបែងចែកជា៣គម្រោងធំៗរួមមាន ៖
១-ផ្នែកខាងជើង ៖ មានឈ្មោះជាផ្លូវការថា គម្រោងធ្វើឱ្យប្រសើរឡើងវិញកំណាត់ផ្លូវជាតិលេខ៥ ភាគខាងជើង (បាត់ដំបង-សិរីសោភ័ណ) ប្រវែង៨៤,៧៤គីឡូម៉ែត្រ និងចំណាយទឹកប្រាក់សាងសង់ប្រមាណ១៤៣,០៤លានដុល្លារ ដោយប្រើរយៈពេលសាងសង់៣ឆ្នាំ ។
២-ផ្នែកខាងត្បូង ៖ មានឈ្មោះជាផ្លូវការថា គម្រោងធ្វើឱ្យប្រសើរឡើងវិញកំណាត់ផ្លូវជាតិលេខ៥ ភាគខាងត្បូង (ព្រែកក្តាម-ធ្លាម្អម) ប្រវែង១៣៥,២៥គីឡូម៉ែត្រ និងចំណាយទឹកប្រាក់សាងសង់ប្រមាណ២៤៦,៣៥លានដុល្លារ និងត្រូវការរយៈពេល៤ឆ្នាំសម្រាប់ដំណើរការសាងសង់ ហើយក្នុងនោះចែកចេញជា៣គឺ ៖ កញ្ចប់ការងារទី១ មានប្រវែង៤១,៥៤គីឡូម៉ែត្រ (ផ្លូវវាងឧដុង្គ ប្រវែង៥,២គីឡូម៉ែត្រ)។ កញ្ចប់ការងារទី២ មានប្រវែង៤២,៥០គីឡូម៉ែត្រ (ផ្លូវវាងកំពង់ឆ្នាំង ប្រវែង១២,០៧គីឡូ ម៉ែត្រ) និងកញ្ចប់ការងារទី៣ មានប្រវែង៥១,២០គីឡូម៉ែត្រ ។
៣-ផ្នែកកណ្តាល ៖ មានឈ្មោះជាផ្លូវការថា គម្រោងធ្វើឱ្យប្រសើរឡើងវិញកំណាត់ផ្លូវជាតិលេខ៥ ភាគកណ្តាល (ធ្លាម្អម-បាត់ដំបង និងសិរីសោភ័ណ-ប៉ោយប៉ែត) ប្រវែង១៤៦,០៤គីឡូម៉ែត្រ ចែកចេញជា៥កញ្ចប់ការងារ ។កញ្ចប់ការងារទី១ មានប្រវែង១៩,៨គីឡូម៉ែត្រ (ផ្លូវវាងក្រុងពោធិ៍សាត់ ប្រវែង១១,៦៩គីឡូម៉ែត្រ)។ កញ្ចប់ការងារទី២ មានប្រវែង៤៧គីឡូ ម៉ែត្រ។ កញ្ចប់ការងារទី៣ មានប្រវែង៤៤,១គីឡូម៉ែត្រ ។ កញ្ចប់ការងារទី៤ មានប្រវែង៣៥,៤គីឡូម៉ែត្រ និងកញ្ចប់ការងារទី៥ ការស្ថាបនាស្ថានីយជញ្ជីងថ្លឹងទម្ងន់ចំនួន៦ទីតាំង ក្នុងនោះមានការស្ថាបនាថ្មី៣ស្ថានីយនិងនៅលើទីតាំងចាស់៣ស្ថានីយ ៕
អត្ថបទ ៖ ណារី
-
កីឡា៧ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៥ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
ព័ត៌មានអន្ដរជាតិ១ ថ្ងៃ ago
Breaking News! បណ្ដាញសង្គម Facebook មានបញ្ហានៅទូទាំងពិភពលោកជាថ្មី
-
សន្តិសុខសង្គម១ សប្តាហ៍ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ព័ត៌មានជាតិ៦ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ព័ត៌មានអន្ដរជាតិ៥ ថ្ងៃ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
ជីវិតកម្សាន្ដ៦ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ
-
ព័ត៌មានអន្ដរជាតិ១ សប្តាហ៍ ago
នាវាចម្បាំងថៃ ច្រឡំដៃបាញ់កាំភ្លើងធំ ចំនាវាគ្នាឯង