ព័ត៌មានជាតិ

ខេត្តស្ទឹងត្រែងជាប់ដងទន្លេចំនួន ៤ មានសត្វផ្សោតកម្របំផុតលើពិភពលោក

បានផុស

៥ years មុន

នៅ

ថ្ងៃអង្គារ ១១ មករា ២០២២

ដោយ

ស្ថិតនៅភូមិភាគឦសាន ខេត្តស្ទឹងត្រែងមានលក្ខណៈភូមិសាស្ត្រជាប់ជាមួយប្រទេសឡាវ មានដងទន្លេចំនួន ៤ ហូរកាត់។ ខេត្តស្ទឹងត្រែងមានសក្ដានុពលខ្ពស់ចំពោះវិស័យទេសចរណ៍ ពិសេសសត្វផ្សោតមេគង្គដែលជាប្រភេទថនិកសត្វដ៏កម្រនៅក្នុងពិភពលោកដែលបានទាក់ទាញការចាប់អារម្មណ៍ពីសំណាក់ភ្ញៀវជាតិ និងអន្តរជាតិ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រធានមន្ទីរទេសចរណ៍ខេត្តស្ទឹងត្រែង លោក អ៊ន់ ប៉ោសឿន បានឲ្យកម្ពុជាថ្មីដឹងថា ផលិតផលទេសចរណ៍ខេត្តស្ទឹងត្រែង ភាគច្រើនពឹងផ្អែកលើវប្បធម៌-ធម្មជាតិ និងកសិទេសចរណ៍។ ចំពោះតំបន់ទាក់ទាញទេសចរណ៍ខេត្តស្ទឹងត្រែងនៅមានតិច និងស្ថិតនៅឆ្ងាយៗពីគ្នា។ យ៉ាងណាភាពស្រស់ត្រកាល និងភាពសំបូរបែបនៃធនធានធម្មជាតិបានទាក់ទាញភ្ញៀវទេសចរមកកម្សាន្ត សម្រាកលំហែកាយនិងចង់ដឹងចង់ស្គាល់តំបន់ដែលមានទេសភាពល្អស្អាតនៅក្នុងខេត្តនេះ។

លោកប្រធានមន្ទីរបានបន្តថា ខេត្តស្ទឹងត្រែងមានលក្ខណៈភូមិសាស្ត្រអំណោយផលល្អ ដោយសារមានភូមិសាស្ត្រជាប់ដងទន្លេចំនួន ៤ គឺទន្លេមេគង្គ ទន្លេសាន ទន្លេស្រែពក និងទន្លេកុង។

បើតាមលោកប្រធានមន្ទីរ ខេត្តស្ទឹងត្រែងមានសហគមន៍អេកូទេសចរណ៍ចំនួន ០៦ កន្លែងមាន សហគមន៍អេកូទេសចរណ៍បូរីអូរស្វាយ សហគមន៍អេកូទេសចរណ៍ព្រះរំកិល សហគមន៍អេកូទេសចរណ៍សម្រស់កោះហាន សហគមន៍អេកូទេសចរណ៍អូរឫស្សីកណ្តាល សហគមន៍អេកូទេសចរណ៍កោះព្រះ និងសហគមន៍អេកូទេសចរណ៍ភ្នំជម្រកសត្វ។

ដោយឡែករមណីយដ្ឋានទេសចរណ៍ធម្មជាតិ និងកែច្នៃមាន ០៧ កន្លែង មានរមណីយដ្ឋានទេសចរណ៍ជំនោរកោះខ្សាច់សេកុង (ទេសចរណ៍តាមរដូចកាល) រមណីយដ្ឋានទេសចរណ៍ឆ្នេរខ្សាច់សេកុង (ទេសចរណ៍តាមរដូវកាល) រមណីយដ្ឋានទេសចរណ៍សម្រស់សេសាន (ទេសចរណ៍តាមរដូវកាល) រមណីយដ្ឋានទេសចរណ៍ចម្ការក្រូច រមណីយដ្ឋានទេសចរណ៍ជួរចាប រមណីយដ្ឋានទេសចរណ៍អន្លង់ផ្សោតឈើទាល និងរមណីយដ្ឋានទេសចរណ៍និស្ស័យស្នេហ៍សេសាន។