ក្រសួងការងារ ស្នើឲ្យជំរុញការអប់រំផ្សព្វផ្សាយដល់កម្មករ អំពីភាពចាំបាច់នៃការចាក់វ៉ាក់សាំងដូសជំរុញ

ក្រសួងការងារ និងបណ្ដុះបណ្ដាលវិជ្ជាជីវៈ បានស្នើដល់ម្ចាស់រោងចក្រ-សហគ្រាស ត្រូវជំរុញការអប់រំផ្សព្វផ្សាយដល់កម្មករ-និយោជិត អំពីភាពចាំបាច់នៃការចាក់វ៉ាក់សាំងដូសជំរុញ។

លោក អ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានចេញសេចក្ដីជូនដំណឹងមួយ នៅថ្ងៃទី ១២ ខែមករា ឆ្នាំ ២០២២ ដោយលើកឡើងថា យោងតាមសារាចរលេខ ០១ សរ ចុះថ្ងៃទី ១១ ខែមករា ឆ្នាំ ២០២២ របស់រាជរដ្ឋាភិបាល ស្ដីពី ការជំរុញការចាក់វ៉ាក់សាំងកូវីដ-១៩ និងការពង្រឹងការអនុវត្តវិធានការ សុវត្ថិភាពផ្នែកសុខាភិបាល ដើម្បីទប់ស្កាត់ការឆ្លងរាលដាលជំងឺកូវីដ-១៩ ​ជាពិសេសមេរោគបំប្លែងខ្លួនថ្មី ប្រភេទអូមីក្រុង ក្រសួងការងារ និងបណ្ដុះបណ្ដាលវិជ្ជាជីវៈ បានជម្រាបជូនដំណឹង ដល់ម្ចាស់ ឬនាយករោងចក្រ សហគ្រាសទាំងអស់ ត្រូវជំរុញការអប់រំផ្សព្វផ្សាយ ដល់កម្មករ-និយោជិត អំពីភាពចាំបាច់ក្នុងការចាក់វ៉ាក់សាំងដូសជំរុញ។

លើសពីនេះទៀត ត្រូវសហការជាមួយអាជ្ញាធរមានសមត្ថកិច្ច និងក្រុមគ្រូពេទ្យ នៃកងយោធពលខេមរភូមិន្ទ រៀបចំការចាក់វ៉ាក់សាំងដូសជំរុញ ដល់កម្មករ-និយោជិតរបស់ខ្លួន នៅតាមទីតាំងរោងចក្រ សហគ្រាស ឬអនុញ្ញាតឲ្យកម្មករ-និយោជិត បានទៅចាក់វ៉ាក់សាំងដូសជំរុញ នៅតាមទីតាំងដែលបានកំណ​ត់ ព្រមទាំងផ្ដល់នូវការឈប់សម្រាក ១ថ្ងៃ ដោយមានប្រាក់ឈ្នួល នៅថ្ងៃដែលកម្មករ-នយោជិត ត្រូវចាក់វ៉ាក់សាំងដូសជំរុញ៕

អត្ថបទ៖ ឃួន សុភ័ក្រ