កម្ពុជា មានសារមន្ទីរបង្ហាញ​ប្រវត្តិរូបិយវត្ថុខ្មែរ ២,០០០ឆ្នាំ ចាប់ពីសម័យហ្វូណន​ដល់បច្ចុប្បន្ន

ធនាគារជាតិនៃកម្ពុជា បានបង្កើតសារមន្ទីរបង្ហាញពីប្រវត្តិសាស្រ្តរូបិយវត្ថុខ្មែររយៈពេល ២,០០០ឆ្នាំ ចាប់ពីសម័យកាលហ្វូណន មកដល់បច្ចុប្បន្ន។ សារមន្ទីរនេះ មានឈ្មោះថា សារមន្ទីរ​សេដ្ឋកិច្ច និង​រូបិយ​វត្ថុ “ព្រះ​ស្រី​ឦសាន​វរ្ម័ន” មានទីតាំងនៅជិតវត្តភ្នំ ក្នុងខណ្ឌដូនពេញ។ មានសាធារណជនជាច្រើន ដែលមិនទាន់ស្គាល់ និងបានចូលទៅទស្សនាក្នុងសារមន្ទីរដែលដាក់បង្ហាញពីរូបិយវត្ថុខ្មែរគ្រប់ជំនាន់នេះ។

លោក Blaise Killian សហប្រធានសារមន្ទីរ​សេដ្ឋកិច្ច និង​រូបិយ​វត្ថុព្រះស្រីឦសានវរ្ម័ន បានលើកឡើងថា គោលបំណងនៃការបង្កើតសារមន្ទីរនេះ គឺដើម្បីចងក្រងបង្ហាញពីប្រវត្តិសាស្រ្តប្រទេសកម្ពុជារយៈពេល ២,០០០ឆ្នាំ ចាប់ពីសម័យកាលហ្វូណន រហូតមកដល់បច្ចុប្បន្ន អំពីសេដ្ឋកិច្ច និងហិរញ្ញវត្ថុ។ លោកបន្តថា ភ្ញៀវជាតិ និងអន្តរជាតិទាំងអស់ អាចចូលទស្សនា ដើម្បីសិក្សាស្វែងយល់ពីប្រវត្តិសេដ្ឋកិច្ច និងហិរញ្ញវត្ថុរបស់កម្ពុជា ជាពិសេសសិស្សនិស្សិតដែលមានបំណងចង់ស្រាវជ្រាវឯកសារជុំវិញរូបិយវត្ថុខ្មែរ។

បើតាមលោក Blaise Killian សារមន្ទីរនេះ បានបើកសម្ពោធជាផ្លូវការកាលពីឆ្នាំ ២០១៩ ប៉ុន្តែត្រូវបានផ្អាកបណ្តោះអាសន្នទៅវិញ ដោយសារការរាលដាលជំងឺកូវីដ-១៩។ សារមន្ទីរនេះ បានបើកដំណើរការឡើងវិញនៅចុងឆ្នាំ ២០២១ ដោយអនុញ្ញាតឲ្យភ្ញៀវជាតិ និងអន្តរជាតិចូលទស្សនាដោយសេរី។

លោក Blaise Killian ជំរុញឲ្យសាធារណជន ចូលទស្សនានៅក្នុងសារមន្ទីរនេះ ដើម្បីទទួលបានចំណេះដឹងជាច្រើនអំពីសេដ្ឋកិច្ច និងហិរញ្ញវត្ថុ ព្រោះនៅក្នុងសារមន្ទីរមានដាក់តាំងរូបរូបិយវត្ថុសម័យបុរាណ រហូតដល់បច្ចុប្បន្ន ជាមួយនិងខ្លឹមសារមាននៅលើជញ្ជាំងទាំងអស់។

សម្តេចតេជោ ហ៊ុន សែន ​នាយក​រដ្ឋ​មន្រ្តីកម្ពុជា មានប្រសាសន៍ថា សារមន្ទីរ​នេះ​បង្ហាញ​យ៉ាង​លម្អិត​ពី​ការ​កសាង​ឡើង​វិញ​នៃ​សេដ្ឋកិច្ច​កម្ពុជា កិច្ច​ខិត​ខំ​ប្រឹង​ប្រែង​របស់​រាជ​រដ្ឋាភិបាល និង​សមិទ្ធផល​សំខាន់ៗ​ក្នុង​រយៈ​ពេល ៤ទសវត្សរ៍​ចុង​ក្រោយ​ បន្ទាប់​ពី​ការ​អនុវត្ត​ដោយ​ជោគជ័យ​នូវ​នយោបាយ ឈ្នះ-ឈ្នះ​។ សម្តេចថ្លែងបែបនេះ ពេលដែលអញ្ជើញជាអធិបតីចូលរួមសម្ពោធកាលពីឆ្នាំ ២០១៩។

សារមន្ទីរ​នេះ​ បាន​ចូល​រួម​ចំណែក​កាន់​តែ​សកម្ម​ក្នុង​បុព្វហេតុ​ពង្រឹង​ចំណេះ​ដឹង​ដល់​ប្រជាពល​រដ្ឋ​កម្ពុជា​ ឲ្យ​យល់​កាន់​តែ​ច្បាស់​អំពី​ប្រវត្តិ​រូបិយ​វត្ថុ​ ​នៅ​គ្រប់​សម័យ​កាល ជា​ពិសេសដើម្បី​លើក​ស្ទួយ​ប្រាក់​រៀល​កម្ពុជា​តាម​រយៈ​ការ​ប្រើប្រាស់​ប្រាក់​រៀល​ឲ្យបាន​ទូលំ​ទូលាយ​នៅ​ទូទាំង​ប្រទេស​។ នេះជាការបញ្ជាក់បន្ថែមរបស់សម្តេចតេជោ ហ៊ុន សែន។

លោក Blaise Killian បានឲ្យដឹងថា សារមន្ទីរព្រះស្រីឦសានវរ្ម័នចាប់ផ្តើមទទួលភ្ញៀវទេសចរចាប់ពីថ្ងៃអង្គារ ដល់ថ្ងៃអាទិត្យ សម្រាកថ្ងៃចន្ទ និងថ្ងៃបុណ្យជាតិ។ ចំពោះតម្លៃសំបុត្រសម្រាប់ភ្ញៀវខ្មែរ ១នាក់ ៤,០០០រៀល ភ្ញៀវបរទេស ២ម៉ឺនរៀល។ ដោយឡែកសិស្ស និងកូនក្មេងអាយុក្រោម ១៨ឆ្នាំ តម្លៃ ២,០០០រៀល៕ អត្ថបទ៖ ទួន សុផល