យុទ្ធនាការចាក់វ៉ាក់សាំងដូសទី៤ សម្រេចបានជិត ៤០ម៉ឺននាក់ ក្នុងរយៈពេល២សប្តាហ៍

យោងតាមក្រសួងសុខាភិបាល បានឲ្យដឹងថា គិតត្រឹមថ្ងៃទី ២៧ ខែមករានេះ ក្រសួងបានបើកយុទ្ធនាការចាក់វ៉ាក់សាំងបង្ការជំងឺកូវីដ-១៩ ដូសជំរុញ (ដូសទី៤) ដែលជាប្រភេទវ៉ាក់សាំង Pfizer ជាជំនួយរបស់ប្រទេសអូស្ត្រាលីតាមរយៈយន្តការកូវ៉ាក់ ដល់ពលរដ្ឋខ្មែរ បានប្រមាណ ៣៩៣ ៦៨៤ នាក់ ក្នុងរយៈពេល២សប្តាហ៍។

ចំពោះក្រុមដែលមានអាយុចាប់ពី ១៨ឆ្នាំឡើងទៅ មានប្រជាពលរដ្ឋចំនួន ១០ ១៩៦ ៩២៥ នាក់ ដែលបានចាក់ដូសទី១ និងចំនួន ៩ ៨៤៤ ៩៣៤ នាក់ បានចាក់ដូសទី២ ដែលស្មើនឹង ១០១.៩៧% នៃប្រជាជនគោលដៅសរុប ១០លាននាក់។ ក្នុងនោះសម្រាប់ដូសជំរុញ (ដូសទី៣) សម្រេចចាក់បានចំនួន ៤ ៨៨១ ៥៦២ នាក់។

ចំណែកកុមារ និងយុវវ័យ អាយុចាប់ពី ១២ឆ្នាំ ដល់ក្រោម ១៨ឆ្នាំវិញ អ្នកចាក់ដូសទី១ មានចំនួន ១ ៨១៧ ៩២៣ នាក់ និងអ្នកចាក់ដូសទី២ មានចំនួន ១ ៧៣៩ ៤៣៧ នាក់ ដែលស្មើនឹង ៩៩.៤៨% នៃក្រុមគោលដៅសរុបដែលមានចំនួនជាង ១លាន៨សែននាក់។

កុមារ អាយុចាប់ពី ០៦ឆ្នាំ ដល់ក្រោម ១២ឆ្នាំ អ្នកចាក់ដូសទី១ មានចំនួន ២ ០០៨ ៨៩៨ នាក់ និងអ្នកចាក់ដូសទី២ មានចំនួន ១ ៩១៩ ៣៥០ នាក់ ដែលស្មើនឹង ១០៥.៨៨% នៃក្រុមគោលដៅសរុបជិត ១លាន៩សែននាក់។ សម្រាប់កុមារ អាយុ ០៥ឆ្នាំ ដែលមានចំនួនប្រមាណជាង ៣០ម៉ឺននាក់ សម្រេចចាក់បាន ៣២១ ៥៥៨ នាក់ សម្រាប់ដូសទី១ និងចំនួន ២៤៤ ១៨៣ នាក់ បានចាក់ដូសទី២ ដែលស្មើនឹង ១០៥.៦៧%។

បើតាមក្រសួងសុខាភិបាល ក្នុងចំណោមប្រជាពលរដ្ឋសរុប ១៦លាននាក់ នៅកម្ពុជា អ្នកទទួលបានវ៉ាក់សាំងមានចំនួន ៨៩.៦៦%ហើយ៕