ខេត្តព្រះសីហនុ នឹងមានអគារសាលាខេត្តកម្ពស់៤ជាន់ដែលមានរចនាបថតាមប្រាសាទសំបូរព្រៃគុក

លោក គួច ចំរើន អភិបាលខេត្តព្រះសីហនុបានមានប្រសាសន៍ថា រដ្ឋបាលខេត្តព្រះសីហនុ នឹងមានអគារសាលាខេត្តកម្ពស់៤ជាន់សាងសង់តាមរចនាបថប្រាសាទសំបូរព្រៃគុកដ៏ថ្មីស្រឡាង ដោយប្រើពេលសាងសង់រយៈពេល១៨ខែ។

នៅក្នុងកិច្ចប្រជុំត្រៀមរុះរើអគារសាលាខេត្តព្រះសីហនុចាស់ ដើម្បីសាងសង់ថ្មីកាលពីចុងខែមករា លោកអភិបាលខេត្ត បានបន្តថា អគារសាលាខេត្តព្រះសីហនុថ្មីនេះ គ្រោងបើកដំណើរការសាងសង់នៅថ្ងៃទី៧ ខែមីនា ឆ្នាំ២០២២។ លោកអភិបាលខេត្ត បានបន្ថែមថា អគារសាលាខេត្តនេះ មានកម្ពស់៤ជាន់ និងមានផ្ទៃក្រឡាសរុប ៤៤,០៩៣ម៉ែត្រការ៉េ។ ចំពោះស្ថាបត្យកម្មនៃអគារ គឺយកតាមរចនាបទប្រាសាទសំបូរព្រៃគុក ដែលជាអគារមានលក្ខណៈខ្មែរទំនើបស៊ីវីល័យ។

លោកអភិបាលខេត្ត បានមានប្រសាសន៍បន្ថែមទៀតថាថា ការសាងសង់អគារថ្មីនេះ បានទទួលការឯកភាពពីសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងមានការគាំទ្រពីលោកឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់៕

អត្ថបទ ៖ សំអឿន