ព្រះមហាក្សត្រ និង​ព្រះមហាក្សត្រី​ ចេញ​ព្រះរាជ​សារលិខិត​អបអរ​សម្តេច​ ហ៊ុន សែន​ទទួលបាន​រង្វាន់សន្តិភាព ស៊ុន ហាក់

ព្រះករុណា​ព្រះបាទ​សម្តេច​ព្រះ​បរមនាថ នរោត្តម សីហមុនី និង​សម្តេច​ព្រះមហាក្សត្រី ព្រះវររាជមាតា នរោត្តម​ មុនិនាថ សីហនុ ​បាន​ចេញព្រះរាជ​សារ​លិខិត​អបរអរសម្តេច​តេជោ ហ៊ុន​​ សែន​ ដែល​ទទួល​បាន​ជ័យលាភី​ពាន​រង្វាន់​សន្តិភាព ស៊ុន ហាក់ ឆ្នាំ​២០២២ ពីមូលនិធិ​សន្តិភាព​ស៊ុន ហាក់ របស់ប្រទេស​កូរ៉េ​ខាងត្បូង។

ក្នុង​ព្រះរាជ​សារ​លិខិត ចំពោះការទទួលពានរង្វាន់សន្តិភាព ស៊ុនហាក់ គឺជាមហាកិត្តិយសដ៏ធំធេង​សម្រាប់ប្រទេសជាតិ និងប្រជាជនកម្ពុជាទាំងមូល និងស័ក្តិសមបំផុតសម្រាប់ សម្តេចអគ្គមហាសេនាបតីតេជោ ដែលបានខិតខំប្រឹងប្រែងអស់ពីកម្លាំងកាយ កម្លាំងចិត្ត និងបញ្ញាញាណ ព្រមទាំងបានធ្វើពលិកម្មគ្រប់បែបយ៉ាងក្នុងបេសកកម្មដើម្បីបុព្វហេតុជាតិ មាតុភូមិ និងប្រជាជនកម្ពុជា។ ជាពិសេសការដឹកនាំបញ្ចប់សង្គ្រាមបង្ហូរឈាមនៅកម្ពុជា ធ្វើឱ្យប្រទេសជាតិមានសុខសន្តិភាពពេញលេញ មានការបង្រួបបង្រួមជាតិ និងឯកភាពទឹកដីពេញបរិបូរណ៍, មានការធានាឯករាជ្យ និងអធិបតេយ្យជាតិ, មានការលើកកម្ពស់លទ្ធិប្រជាធិបតេយ្យ សេរីពហុបក្ស និងនីតិរដ្ឋ ព្រមទាំងធ្វើឱ្យប្រទេសជាតិមានការអភិវឌ្ឍរីកចម្រើនលើគ្រប់វិស័យ និងមានកិត្យានុភាពនៅលើឆាកអន្តរជាតិ៕